ಅಸಲಿ ಚಾಲೆಂಜ್​ ಈಗ ಶುರುವಾಗಿದೆ; ಕೊನೇ ಹಂತದಲ್ಲಿ ಕಿಚ್ಚನ ‘ಫ್ಯಾಂಟಮ್​’ ಶೂಟಿಂಗ್​

ಬೆಂಗಳೂರು: ಕಿಚ್ಚ ಸುದೀಪ್​ ನಾಯಕನಾಗಿ ನಟಿಸುತ್ತಿರುವ ಫ್ಯಾಂಟಮ್​ ಅದ್ದೂರಿ ವೆಚ್ಚದಲ್ಲಿ ಸಿದ್ಧವಾಗುತ್ತಿದೆ. ಬಹುತೇಕ ಸೆಟ್​ನಲ್ಲಿಯೇ ಈ ಸಿನಿಮಾ ನಿರ್ಮಾಣವಾಗುತ್ತಿರುವುದರಿಂದ ಮಿನಿ ಅರಣ್ಯವನ್ನೇ ಹೈದರಾಬಾದ್​ನ ಅನ್ನಪೂರ್ಣ ಮತ್ತು ರಾಮೋಜಿ ರಾವ್​ ಸ್ಟುಡಿಯೋದಲ್ಲಿ ನಿರ್ಮಿಸಲಾಗಿದೆ. ಈಗಾಗಲೇ ಚಿತ್ರದ ಫಸ್ಟ್ ಲುಕ್ ಮತ್ತು ಸಣ್ಣ ಪುಟ್ಟ ಸ್ನೀಕ್ ಪಿಕ್ ಮೂಲಕವೇ ಹೆಚ್ಚು ಗಮನ ಸೆಳೆಯುತ್ತಿದೆ. ಇದೀಗ ಚಿತ್ರದ ನಾಯಕ ಅಭಿಮಾನಿಗಳಿಗೆ ಸಿಹಿ ಸುದ್ದಿಯೊಂದನ್ನು ನೀಡಿದ್ದಾರೆ.

ಇದನ್ನೂ ಓದಿ: ಪ್ರಿಯಾಂಕಾ ಮೆಗಾ ಸೂಪರ್​ಸ್ಟಾರ್; ಹುಟ್ಟುಹಬ್ಬಕ್ಕೆ ಸಿಕ್ಕಿತು ಹೊಸ ಬಿರುದು

ಹೌದು, ಲಾಕ್​ಡೌನ್ ಸಡಿಲವಾಗುತ್ತಿದ್ದಂತೆ ಫ್ಯಾಂಟಮ್ ಚಿತ್ರದ ಶೂಟಿಂಗ್​ಗೆ ಚಾಲನೆ ನೀಡಲಾಗಿತ್ತು. ಇದೀಗ ಬಹುತೇಕ ಚಿತ್ರೀಕರಣ ಮುಗಿಸಿಕೊಂಡು, ಕೊನೇ ಹಂತದ ಶೂಟಿಂಗ್​ಗೆ ತಂಡ ಸಿದ್ಧತೆ ಮಾಡಿಕೊಳ್ಳುತ್ತಿದೆ. ಚಿತ್ರದ ಕೊನೇ ಭಾಗದ ದೃಶ್ಯವನ್ನು ಸೆರೆಹಿಡಿಯುತ್ತಿದ್ದು, ಇನ್ನೇನು ಶೀಘ್ರದಲ್ಲಿ ಕುಂಬಳಕಾಯಿ ಒಡೆದು ಮುಂದಿನ ಕೆಲಸಗಳತ್ತ ದೃಷ್ಟಿ ಹಾಯಿಸುವ ಲೆಕ್ಕಾಚಾರದಲ್ಲಿದೆ ತಂಡ. ಅಂದಹಾಗೆ, ಇಲ್ಲಿಗೆ ಶೂಟಿಂಗ್ ಮುಗಿಯಿತು ಎಂದಲ್ಲ. ಹೈದರಾಬಾದ್ ಶೂಟಿಂಗ್​ ಮುಗಿಸಿ, ಮುಂದಿನ ದಿನಗಳಲ್ಲಿ ಕುಂದಾಪುರದಲ್ಲಿ ಒಂದಷ್ಟು ಶೂಟಿಂಗ್​ ನಡೆಯಲಿದೆ. ಬಳಿಕ ಹಾಡುಗಳ ಚಿತ್ರೀಕರಣವೂ ನಡೆಯಬೇಕಿದೆ.

ಈ ವಿಚಾರವನ್ನು ಸ್ವತಃ ಸುದೀಪ್​ ಸೋಷಿಯಲ್ ಮೀಡಿಯಾದಲ್ಲಿ ಶೇರ್ ಮಾಡಿಕೊಂಡಿದ್ದು, ‘ಕೊನೇ ಭಾಗದ ಫ್ಯಾಂಟಮ್​ ಶುರುವಾಗಿದೆ. ತುಂಬ ಸವಾಲಿನ ಚಿತ್ರೀಕರಣಕ್ಕೆ ಸಜ್ಜಾಗಿದ್ದೇವೆ. ಅದನ್ನು ದೃಶ್ಯ ರೂಪಕ್ಕೆ ತರುವುದೇ ದೊಡ್ಡ ಟಾಸ್ಕ್​ ಆಗಿದೆ. ಹೈದರಾಬಾದ್​ನಲ್ಲಿ ಕೊನೇ ಹಂತದ ಶೂಟಿಂಗ್’ ಎಂದು ಸುದೀಪ್ ಟ್ವಿಟ್​ ಮಾಡಿದ್ದಾರೆ.

ಇದನ್ನೂ ಓದಿ: ‘ಕನ್ನಡಿಗ’ ತಂಡ ಸೇರಿಕೊಂಡ ವಿದೇಶಿ ಕನ್ನಡಿಗ

ಇನ್ನು ಜಾಕ್​ ಮಂಜು ಜತೆಗೆ ಅಲಂಕಾರ್ ಪಾಂಡಿಯನ್ ನಿರ್ಮಾಣದಲ್ಲಿ ಕೈ ಜೋಡಿಸಿದ್ದು, ಇತ್ತೀಚೆಗಷ್ಟೇ ಅವರನ್ನು ತಂಡ ಬರಮಾಡಿಕೊಂಡಿದೆ. ಅನೂಪ್​ ಭಂಡಾರಿ ನಿರ್ದೇಶನದಲ್ಲಿ ಸಿದ್ಧವಾಗುತ್ತಿರುವ ಫ್ಯಾಂಟಮ್​ ಚಿತ್ರದಲ್ಲಿ ಕಿಚ್ಚ ಸುದೀಪ್​ ವಿಕ್ರಾಂತ್​ ರೋಣ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

https://www.vijayavani.net/meghanaraj-chiranjeevisarja-dhruvasarja/