ಐಪಿಎಲ್​ ದಿನಾಂಕ ಫಿಕ್ಸ್​, ಧೋನಿ ಅಭಿಮಾನಿಗಳಲ್ಲಿ ಸಂತಸ

ಬೆಂಗಳೂರು: ಐಪಿಎಲ್​ 13ನೇ ಆವೃತ್ತಿ ಸೆಪ್ಟೆಂಬರ್​ 19ರಿಂದ ನವೆಂಬರ್​ 8ರವರೆಗೆ ಮರುನಿಗದಿಯಾಗಿರುವ ವಿಷಯ ಕೇಳಿ, ಟೀಮ್​ ಇಂಡಿಯಾದ ಮಾಜಿ ನಾಯಕ ಎಂಎಸ್​ ಧೋನಿ ಅವರ ಅಭಿಮಾನಿಗಳಲ್ಲಿ ಸಂಭ್ರಮ ಮೂಡಿದೆ. ಕರೊನಾ ವೈರಸ್​ ಹಾವಳಿಯಿಂದಾಗಿ ಈ ವರ್ಷ ಧೋನಿ ಆಟವನ್ನು ನೋಡಲು ಸಾಧ್ಯವಾಗುವುದೋ, ಇಲ್ಲವೋ ಎಂಬ ಆತಂಕದಲ್ಲಿದ್ದ ಅಭಿಮಾನಿಗಳು ಈಗ ಸಂತಸದಿಂದ ನಿಟ್ಟುಸಿರು ಬಿಟ್ಟಿದ್ದಾರೆ. ಭಾರತದ ಬ್ಯಾಡ್ಮಿಂಟನ್​ ತಾರೆ ಕಿಡಂಬಿ ಶ್ರೀಕಾಂತ್​ ಕೂಡ ಈ ಸಾಲಿನಲ್ಲಿರುವುದು ವಿಶೇಷವಾಗಿದೆ.

'2020ರಲ್ಲಿ ಐಪಿಎಲ್​ ನಡೆಯುತ್ತದೆ ಎಂಬ ಸುದ್ದಿಯನ್ನು ಕೇಳಿ ಖುಷಿಯಾಯಿತು. ಎಂಎಸ್​ ಧೋನಿ ಅವರ ಆಟವನ್ನು ಮತ್ತೆ ನೋಡಲು ನಾನು ಕಾತರಗೊಂಡಿದ್ದೇನೆ' ಎಂದು ಕಿಡಂಬಿ ಶ್ರೀಕಾಂತ್​ ಶುಕ್ರವಾರ ಟ್ವೀಟ್​ ಮಾಡಿ ಸಂಭ್ರಮ ಹಂಚಿಕೊಂಡಿದ್ದಾರೆ. ಅವರೊಂದಿಗೆ ಧೋನಿ ಮತ್ತು ಚೆನ್ನೈ ಸೂಪರ್​ ಕಿಂಗ್ಸ್​ ತಂಡದ ಹಲವಾರು ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಕೂಡ ಸಂಭ್ರಮ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ಐಪಿಎಲ್ ಸೆಪ್ಟೆಂಬರ್ 19ರಂದು ಶುರು- ನವೆಂಬರ್​ನಲ್ಲಿ ಫೈನಲ್​?

39 ವರ್ಷದ ಧೋನಿ 2019ರ ಏಕದಿನ ವಿಶ್ವಕಪ್​ನಲ್ಲಿ ಕೊನೆಯದಾಗಿ ಸ್ಪರ್ಧಾತ್ಮಕ ಕ್ರಿಕೆಟ್​ ಪಂದ್ಯ ಆಡಿದ್ದರು. ಈ ವರ್ಷದ ಐಪಿಎಲ್​ ಮೂಲಕ ಟಿ20 ವಿಶ್ವಕಪ್​ ತಂಡದಲ್ಲೂ ಸ್ಥಾನ ಪಡೆಯುವ ಯೋಜನೆ ಅವರದಾಗಿತ್ತು. ಆದರೆ ಕರೊನಾ ಹಾವಳಿಯಿಂದಾಗಿ ಐಪಿಎಲ್​ ನಿಗದಿಯಂತೆ ನಡೆಯದಿದ್ದರೆ, ಟಿ20 ವಿಶ್ವಕಪ್​ ಮುಂದೂಡಿಕೆಯಾಗಿದೆ.

ಐಪಿಎಲ್​ ದಿನಾಂಕ ಮರುನಿಗದಿಯಾಗಿರುವುದಕ್ಕೆ ಆರ್​ಸಿಬಿ ತಂಡ ಕೂಡ ಸಂಭ್ರಮ ವ್ಯಕ್ತಪಡಿಸಿದ್ದು, ಮರಳಿ ಕಣಕ್ಕಿಳಿಯಲು ನಾವು ಕಾತರಗೊಂಡಿದ್ದೇವೆ. ನೀವೂ ನಮ್ಮೊಂದಿಗೆ ಇರುವುದಿರಲ್ಲವೇ? ಎಂದು ಅಭಿಮಾನಿಗಳಿಗೆ ಪ್ರಶ್ನಿಸಿದೆ.