ಕೇಪ್ಟೌನ್: ಐಪಿಎಲ್ನಲ್ಲಿ ಬಲಿಷ್ಠ ಚೆನ್ನೈ ಸೂಪರ್ಕಿಂಗ್ಸ್ ತಂಡದ ಪರ ಆಡಲು ಸಜ್ಜಾಗುತ್ತಿರುವ ದಕ್ಷಿಣ ಆಫ್ರಿಕಾದ ಮಾಜಿ ನಾಯಕ ಹಾಗೂ ಸ್ಟಾರ್ ಬ್ಯಾಟ್ಸ್ಮನ್ ಫಾಫ್ ಡು ಪ್ಲೆಸಿಸ್ ಗುರುವಾರ ಗುಡ್ನ್ಯೂಸ್ ಪಡೆದಿದ್ದಾರೆ. ಅವರ ಪತ್ನಿ ಇಮಾರಿ ವಿಸೆರ್ ಕಳೆದ ಮಂಗಳವಾರ 2ನೇ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದು, ಈ ಬಗ್ಗೆ ಸಂಭ್ರಮಿಸಿ ಪ್ಲೆಸಿಸ್ ಸಾಮಾಜಿಕ ಜಾಲತಾಣದಲ್ಲಿ ವಿಶೇಷ ಸಂದೇಶವನ್ನೂ ಪ್ರಕಟಿಸಿದ್ದಾರೆ.
ದೀರ್ಘಕಾಲದ ಗೆಳತಿ ಇಮಾರಿ ವಿಸೆರ್ ಅವರನ್ನು 2013ರಲ್ಲಿ ವರಿಸಿದ್ದ ಫಾಫ್ ಡು ಪ್ಲೆಸಿಸ್, 2017ರಲ್ಲಿ ಅಮೇಲಿ ಎಂಬ ಮೊದಲ ಹೆಣ್ಣು ಮಗುವಿನ ತಂದೆಯಾಗಿದ್ದರು. 2ನೇ ಮಗುವಿನ ಆಗಮನದ ನಿರೀಕ್ಷೆಯಲ್ಲಿ ಈ ವಾರ ದಕ್ಷಿಣ ಆಫ್ರಿಕಾ ತಂಡದ ತರಬೇತಿ ಶಿಬಿರದಿಂದ ಹೊರಗುಳಿದಿದ್ದ ಫಾಫ್ ಡು ಪ್ಲೆಸಿಸ್, ಐಪಿಎಲ್ ಟೂರ್ನಿಗೆ ಪೂರ್ವಭಾವಿಯಾಗಿ ಸೆಪ್ಟೆಂಬರ್ 1ರಂದು ದುಬೈನಲ್ಲಿ ಚೆನ್ನೈ ಸೂಪರ್ಕಿಂಗ್ಸ್ ತಂಡವನ್ನು ಕೂಡಿಕೊಳ್ಳುವ ನಿರೀಕ್ಷೆ ಇದೆ.
ಇದನ್ನೂ ಓದಿ: ಯುಎಇಯಲ್ಲೂ ಕರೊನಾ ಪ್ರಕರಣ ಏರಿಕೆ, ಐಪಿಎಲ್ಗೆ ಆತಂಕ!
ಹೊಸ ಜೀವನದ ಪವಾಡ ಈ ಜಗತ್ತಿಗೆ ಆಗಮಿಸಿದೆ. ನಮ್ಮದು ಎಷ್ಟು ಅಮೋಘ ಸೃಷ್ಟಿ ಎಂಬುದು ಇದರಿಂದ ಮನವರಿಕೆಯಾಗಿದೆ ಎಂದಿರುವ ಫಾಫ್ ಡು ಪ್ಲೆಸಿಸ್, 2ನೇ ಮಗುವಿಗೆ ಜೋಯಿ ಎಂದು ನಾಮಕರಣ ಮಾಡಿರುವುದನ್ನೂ ತಿಳಿಸಿದ್ದಾರೆ. ನಾವು ನಿನಗೆ ಬೇಷರತ್ ಪ್ರೀತಿ ನೀಡುವೆವು ಮತ್ತು ನಾನು ಹೊಂದಿರುವ ಎಲ್ಲವನ್ನೂ ನೀಡಿ ನಿನ್ನನ್ನು ಸಲಹುವೆ ಎಂದು ಪ್ಲೆಸಿಸ್ ಬರೆದುಕೊಂಡಿದ್ದಾರೆ.
ಪ್ಲೆಸಿಸ್ ಜೆರ್ಸಿ ಸಂಖ್ಯೆಯ ದಿನಾಂಕದಂದೇ ಜನನ!
2ನೇ ಪುತ್ರಿ ತಂದೆಯ ಜೆರ್ಸಿ ಸಂಖ್ಯೆಯ (18) ದಿನಾಂಕದಂದೇ ಜನಿಸಿರುವ ವಿಶೇಷತೆಯನ್ನು ಫಾಫ್ ಡು ಪ್ಲೆಸಿಸ್ ಪತ್ನಿ ಇಮಾರಿ ವಿಸೆರ್ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಪ್ಲೆಸಿಸ್ ದಕ್ಷಿಣ ಆಫ್ರಿಕಾ ಪರ 18 ಸಂಖ್ಯೆಯ ಜೆರ್ಸಿ ನಂಬರ್ನೊಂದಿಗೆ ಆಡುತ್ತಾರೆ. 2011ರಿಂದ ಚೆನ್ನೈ ಸೂಪರ್ಕಿಂಗ್ಸ್ ತಂಡದ ಭಾಗವಾಗಿರುವ ಪ್ಲೆಸಿಸ್ ತಂಡದ ಪರ 71 ಪಂದ್ಯಗಳಲ್ಲಿ 1,853 ರನ್ ಬಾರಿಸಿದ್ದಾರೆ.