ವಯನಾಡು: ಅಸಹಾಯಕರು, ಸಂಕಷ್ಠದಲ್ಲಿರುವವರನ್ನು ತಮ್ಮ ಜೀವ ಪಣಕ್ಕಿಟ್ಟು ರಕ್ಷಿಸುವ ಹೀರೋಗಳನ್ನು ನಾವು ಚಲನಚಿತ್ರಗಳಲ್ಲಿ ಕಾಣಬಹುದು. ಅವರೆಲ್ಲ ರೀಲ್ ಹೀರೋಗಳಾದರೆ..ಕೆಲವರು ಆಪತ್ಕಾಲದಲ್ಲಿ ಸಹಾಯ ಮಾಡುವ ಮೂಲಕ ನಿಜವಾದ ಸೂಪರ್ ಹೀರೋಗಳಂತೆ ಕಾಣುತ್ತಾರೆ. ಕೇರಳದ ವಯನಾಡಿನಲ್ಲಿ ಸಂಭವಿಸಿದ ಭೂಕುಸಿತದಲ್ಲಿ 300 ಕ್ಕೂ ಹೆಚ್ಚು ಜನ ಮೃತಪಟ್ಟು, 100 ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ದುರಂತ ಸಂಭವಿಸಿದಾಗ ಬೆಟ್ಟಗಳಲ್ಲಿ ಸಿಲುಕಿರುವ ಸಂತ್ರಸ್ತರನ್ನು ರಕ್ಷಿಸಲು ಎನ್ಡಿಆರ್ಎಫ್ ತಂಡಗಳ ಜತೆಗೆ ಸ್ಥಳೀಯ ಕೆಲವು ಯುವಕರು ಸಕ್ರಿಯವಾಗಿ ಭಾಗವಹಿಸುತ್ತಿದ್ದಾರೆ. ಅವರಲ್ಲಿ ಹತ್ತಿಪ್ಪತ್ತು ಜನರ ಜೀವ ಉಳಿಸಲು ಶ್ರಮಿಸಿದ ಪ್ರಜೀಶ್ ಎಂಬ ರಿಯಲ್ ಹೀರೋ ಆಗಿ ಕಂಡಿದ್ದ ಯುವಕ ಈಗ ನಾಪತ್ತೆಯಾಗಿದ್ದಾರೆ.
