ಚುನಾವಣೆ & ಪಕ್ಷ ನನ್ನ ಮಗಳ ಜೀವ ತೆಗೆದಿದೆ; ಹಿಮಾನಿ ನರ್ವಾಲ್ ತಾಯಿ ಹೀಗೇಳಿದ್ದೇಕೆ? | Himani Narwal

ಚಂಡೀಗಢ : ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರೊಂದಿಗೆ ಭಾರತ್ ಜೋಡೋ ಯಾತ್ರೆಯಲ್ಲಿ ಕಾಣಿಸಿಕೊಂಡು ಸುದ್ದಿಗೆ ಗ್ರಾಸವಾಗಿದ್ದ ಹಿಮಾನಿ ನರ್ವಾಲ್(Himani Narwal) ಹತ್ಯೆಯಿಂದ ಹರಿಯಾಣ ರಾಜಕೀಯ ಬಿಸಿಯಾಗುತ್ತಿದ್ದರೆ, ಮತ್ತೊಂದೆಡೆ ಪೊಲೀಸ್ ತನಿಖೆಯಲ್ಲಿ ದೊಡ್ಡ ವಿಷಯವೊಂದು ಬೆಳಕಿಗೆ ಬಂದಿದೆ.

ಇದನ್ನು ಓದಿ: ಗೆಳತಿಯನ್ನು ಕೊಂದಿದ್ದು ಈ ಕಾರಣಕ್ಕಾಗಿ..; ಪೊಲೀಸರ ಮುಂದೆ ಅಘಾತಕಾರಿ ಮಾಹಿತಿ ಬಿಚ್ಚಿಟ್ಟ ಆರೋಪಿ| Kerala Mass Murder

ಹಿಮಾನಿ ನರ್ವಾಲ್ ಅವರ ದೇಹದ ಮೇಲೆ ಗಾಯದ ಗುರುತುಗಳು ಕಂಡುಬಂದಿದ್ದು, ಹಿಮಾನಿ ನರ್ವಾಲ್ ಸಾಯುವ ಮೊದಲು ಅವರನ್ನು ತೀವ್ರವಾಗಿ ಥಳಿಸಲಾಗಿತ್ತು ಎಂದು ಊಹಿಸಲಾಗುತ್ತಿದೆ. ಶನಿವಾರ (ಮಾರ್ಚ್ 1) ಬೆಳಗ್ಗೆ ರೋಹ್ಟಕ್‌ನ ಸಂಪ್ಲಾ ಪಟ್ಟಣದ ಬಸ್ ನಿಲ್ದಾಣದ ಬಳಿ ಹಕ್ಕುದಾರರಿಲ್ಲದ ನೀಲಿ ಸೂಟ್‌ಕೇಸ್ ಪತ್ತೆಯಾಗಿದೆ. ಪೊಲೀಸರು ಸೂಟ್‌ಕೇಸ್ ತೆರೆದಾಗ ಅದರಲ್ಲಿ ಯುವತಿಯ ಮೃತದೇಹವಿತ್ತು. ನಂತರ ಮೃತದೇಹವನ್ನು ಕಾಂಗ್ರೆಸ್ ನಾಯಕಿ ಹಿಮಾನಿ ನರ್ವಾಲ್ ಎಂದು ಗುರುತಿಸಲಾಯಿತು.

ಹಿಮಾನಿ ನರ್ವಾಲ್ ತಾಯಿ ಸವಿತಾ ನ್ಯಾಯಕ್ಕಾಗಿ ಒತ್ತಾಯಿಸಿದ್ದಾರೆ. ಕೊಲೆ ಮಾಡಿ ಮಗಳ ಶವವನ್ನು ಸೂಟ್‌ಕೇಸ್‌ನಲ್ಲಿ ಎಸೆದಿದ್ದಾರೆ ಎಂದು ಆರೋಪಿಸಿದ್ದಾರೆ. ಜನರಿಗೆ ನನ್ನ ಮಗಳ ಮೇಲೆ ದ್ವೇಷವಿದೆ. ಇಷ್ಟು ಚಿಕ್ಕ ವಯಸ್ಸಿನಲ್ಲಿ ಅವಳು ಹೇಗೆ ಇಷ್ಟೊಂದು ಮುಂದೆ ಬಂದಳು ಎಂದು ಜನರು ಆಶ್ಚರ್ಯ ಪಡುತ್ತಿದ್ದರು. ತಮ್ಮ ಮಗಳ ಕೊಲೆಯ ಹಿಂದೆ ಪಕ್ಷದ ಯಾರೋ ಸದಸ್ಯರ ಕೈವಾಡವಿದೆ ಎಂದು ಅವರು ಶಂಕಿಸಿದ್ದಾರೆ.

ನನ್ನ ಮಗಳಿಗೆ ನ್ಯಾಯ ಸಿಗಬೇಕು. ಏಕೆಂದರೆ ನನ್ನ ಮಗಳು ಇಷ್ಟು ಚಿಕ್ಕ ವಯಸ್ಸಿನಲ್ಲಿ ಬಹಳಷ್ಟು ಅಪಾಯಗಳನ್ನು ಎದುರಿಸಿದ್ದಾಳೆ. ನನಗೆ ಯಾರ ಪರಿಚಯವಿಲ್ಲ, ಆದರೆ ಪಕ್ಷದ ಅನೇಕ ಜನರು ನನ್ನ ಮನೆಗೆ ಬರುತ್ತಿದ್ದರು. ಅಂತಹ ಪರಿಸ್ಥಿತಿಯಲ್ಲಿ ಇದರ ಹಿಂದೆ ಯಾರಾದರೂ ಇರಬಹುದು. ನನ್ನ ಮಗಳಿಗೆ ನ್ಯಾಯ ಒದಗಿಸುವಂತೆ ನಾನು ಸರ್ಕಾರ ಮತ್ತು ಆಡಳಿತವನ್ನು ವಿನಂತಿಸುತ್ತೇನೆ.

ಫೆಬ್ರವರಿ 27ರಂದು ಸಂಜೆ 4 ಗಂಟೆಯವರೆಗೆ ನಾನು ನನ್ನ ಮಗಳ ಜತೆ ಇದ್ದೆ ಎಂದು ಹಿಮಾನಿಯ ತಾಯಿ ಹೇಳಿದರು. ಇದಾದ ನಂತರ ನಾನು ಮನೆಯಿಂದ ಹೊರಬಂದೆ. ನಾನು 28 ರಂದು ಕರೆ ಮಾಡಿದಾಗ ಫೋನ್ ಸ್ವಿಚ್ ಆಫ್ ಆಗಿತ್ತು. ಕಠ್ಮಂಡುವಿನಲ್ಲಿ ಹೂಡಾ ಸಾಹಿಬ್ ಬರುವ ಒಂದು ಕಾರ್ಯಕ್ರಮವಿತ್ತು. ಅವರೂ ಆ ಕಾರ್ಯಕ್ರಮಕ್ಕೆ ಹೋಗಬೇಕಿತ್ತು. ತನ್ನ ಮಗಳು ಕಳೆದ 10 ವರ್ಷಗಳಿಂದ ಕಾಂಗ್ರೆಸ್‌ನೊಂದಿಗೆ ಸಂಬಂಧ ಹೊಂದಿದ್ದಾಳೆ. ನನ್ನ ಮಗಳು ಸ್ವಚ್ಛ ರಾಜಕೀಯ ಮಾಡಲು ಬಯಸಿದ್ದಳು. ಚುನಾವಣೆ ಮತ್ತು ಪಕ್ಷ ನನ್ನ ಮಗಳ ಜೀವ ತೆಗೆದುಕೊಂಡಿತು ಎಂದು ಹಿಮಾನಿ ತಾಯಿ ಆರೋಪಿಸಿದ್ದಾರೆ.

ಕಾಂಗ್ರೆಸ್ ನಾಯಕಿ ಹಿಮಾನಿ ನರ್ವಾಲ್ ಹತ್ಯೆಗೆ ಸಂಬಂಧಿಸಿದಂತೆ ಪೊಲೀಸರು ಐದು ತಂಡಗಳನ್ನು ರಚಿಸಿದ್ದಾರೆ. ಸುಳಿವುಗಳನ್ನು ಪಡೆಯಲು ಹಿಮಾನಿ ಮನೆ ಮತ್ತು ಸುತ್ತಮುತ್ತ ಅಳವಡಿಸಲಾಗಿರುವ ಸಿಸಿಟಿವಿ ಕ್ಯಾಮೆರಾಗಳ ದೃಶ್ಯಾವಳಿಗಳನ್ನು ಪರಿಶೀಲಿಸಲಾಗುತ್ತಿದೆ. ಹಿಮಾನಿ ಅವರ ಸಾಮಾಜಿಕ ಜಾಲತಾಣ ಖಾತೆಗಳನ್ನು ಸಹ ತನಿಖೆ ಮಾಡಲಾಗುತ್ತಿದೆ.(ಏಜೆನ್ಸೀಸ್​​)

https://www.vijayavani.net/death-toll-rises-to-six-in-uttarakhand-avalanche