ಆರ್ಡರ್​ ಮಾಡಿದ ಫುಡ್​ ಕೊಡಲು ಯಾಕ್​ ಲೇಟು ಎಂದು ಪ್ರಶ್ನಿಸಿದ ಗ್ರಾಹಕನನ್ನು ಕೊಂದ ಹೋಟೆಲ್ ಮಾಲೀಕ

ನವದೆಹಲಿ: ಆರ್ಡರ್​ ಮಾಡಿದ ಫುಡ್​ಅನ್ನು ಯಾಕೆ ಲೇಟಾಗಿ ಕೊಟ್ಟೆ ಎಂದು ಜಗಳ ಮಾಡಿದ್ದಕ್ಕೆ ವ್ಯಕ್ತಿಯೋರ್ವನನ್ನು ಹೋಟೆಲ್​ ಸಿಬ್ಬಂದಿ ದಾರುಣವಾಗಿ ಹೊಡೆದು ಕೊಲೆ ಮಾಡಿರುವ ಘಟನೆ ರಾಷ್ಟ್ರ ರಾಜಧಾನಿ ನವದೆಹಲಿಯ ಟ್ಯಾಗೋರ್​ ಗಾರ್ಡನ್​ನಲ್ಲಿ ನಡೆದಿದೆ.

ಮೃತರನ್ನು ದೆಹಲಿಯ ಚಂದ್ರ ವಿಹಾರ್‌ನ ನಿವಾಸಿ ಹರ್ನೀತ್ ಸಿಂಗ್ ಸಚ್‌ದೇವ (29) ಎಂದು ಗುರುತಿಸಲಾಗಿದ್ದು, ಸ್ನೇಹಿತರೊಂದಿಗೆ ಕೇತ್​ನ ಫುಡ್​ ಕೋರ್ಟ್​ಗೆ ತೆರಳಿದ್ದಾಗ ಈ ದುರ್ಘಟನೆ ನಡೆದಿದೆ. ಘಟನೆ ಸಂಬಂಧ ಹೋಟೆಲ್​ ಮಾಲೀಕ, ಅವರ ಪುತ್ರ ಹಾಗೂ ಸಿಬ್ಬಂದಿಯನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ಇದನ್ನೂ ಓದಿ: ಭಾರತದ ಕೊನೆಯ ಭಾಗಕ್ಕೆ ಭೇಟಿ ನೀಡಿದ ಮಾಜಿ ಪ್ರಧಾನಿ ಎಚ್​ಡಿಡಿ

ಈ ಕುರಿತು ಮಾತನಾಡಿರುವ ಹಿರಿಯ ಪೊಲೀಸ್​ ಅಧಿಕಾರಿಯೊಬ್ಬರು, ಆಗಸ್ಟ್​ 28ರ ಬೆಳಗಿನ ಜಾವ ಹರ್ನೀತ್​ ಸಿಂಗ್​ ತನ್ನ ಸ್ನೇಹಿತರೊಂದಿಗೆ ಕಬಾಬ್ ತಿನ್ನಲೆಂದು ಟ್ಯಾಗೋರ್​ ಗಾರ್ಡನ್​ನಲ್ಲಿರುವ ಫುಡ್​ ಕೋರ್ಟ್​ಗೆ ತೆರಳಿದ್ದಾನೆ. ಆತ ಆರ್ಡರ್​ ಮಾಡಿ ಅರ್ಧಗಂಟೆಗೂ ಹೆಚ್ಚು ಕಾಲ ಕಳೆದರೂ ಹೋಟೆಲ್​ನವರು ಕಬಾಬ್​ ನೀಡಿರಲಿಲ್ಲ. ಇದರಿಂದ ಸಿಟ್ಟಿಗೆದ್ದ ಆತ ಈ ಬಗ್ಗೆ ಹೋಟೆಲ್​ನವರ ಬಳಿ ವಿಚಾರಿಸಿದ್ದಾನೆ. ಈ ವೇಳೆ ಇಬ್ಬರ ನಡುವೆ ಮಾತಿಗೆ ಮಾತು ಮಾಲೀಕ, ಆತನ ಪುತ್ರ ಹಾಗೂ ಸಿಬ್ಬಂದಿ ಹರ್ನೀತ್​ ಮೇಲೆ ಮಾರಣಾಂತಿಕ ಹಲ್ಲೆ ನಡೆಸಿದ್ದಾರೆ. ಈ ದೃಶ್ಯ ಸಂಪೂರ್ಣವಾಗಿ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಕೂಡಲೇ ಗಾಯಾಳುವನ್ನು ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ ಗಂಭೀರವಾಗಿ ಗಾಯಗೊಂಡಿದ್ದ ಹರ್ನೀತ್​ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ. ಮೃತರಿಗೆ ಪತ್ನಿ ಹಾಗೂ ತಾಯಿ ಇದ್ದು ಹರ್ನೀತ್​ ಅವರ ಮೇಲೆ ಇಡೀ ಕುಟುಂಬ ಅವಲಂಬಿತವಾಗಿತ್ತು. ಮರಣೋತ್ತರ ಪರೀಕ್ಷೆಯ ನಂತರ ಶವವನ್ನು ಕುಟುಂಬದವರ ಬಳಿ ಹಸ್ತಾಂತರಿಸಲಾಗಿದ್ದು, ಆರೋಪಿಗಳನ್ನು ವಶಕ್ಕೆ ಪಡೆಯಲಾಗಿದೆ. ಇದಲ್ಲದೆ ಸ್ಥಳೀಯರು ಇಲ್ಲಿನ ಹೋಟೆಲ್​ಗಳು ತಡರಾತ್ರಿವರೆಗೂ ತೆರೆದಿರುತ್ತವೆ ಎಂದು ಆರೋಪಿಸಿದ್ದು, ಈ ಬಗ್ಗೆಯೂ ಕ್ರಮ ಜರುಗಿಸಲಾಗುವುದು ಎಂದು ಹಿರಿಯ ಪೊಲೀಸ್​ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

https://www.vijayavani.net/congress-mla-brutally-assaulted-with-punches-slaps-by-veteran-crpf-jawan

https://www.vijayavani.net/shabana-azmi-questions-selective-outrage-over-crimes-against-women