ದಿನನಿತ್ಯ ಪೊಲೀಸರು ಹಾಗೂ ನೂರಾರು ಜನಸಂಚರಿಸುವ ಪೊಲೀಸ್ ವಸತಿಗೃಹ ಸಂಪರ್ಕ ರಸ್ತೆ ಇಕ್ಕೆಲಗಳಲ್ಲಿ ತ್ಯಾಜ್ಯ ತುಂಬಿದ್ದು, ಚರಂಡಿಯೇ ಮಾಯವಾಗಿದೆ. ಬೇಸಿಗೆಯಲ್ಲಿ ಇಲ್ಲಿ ತ್ಯಾಜ್ಯಕ್ಕೆ ಬೆಂಕಿ ಹಚ್ಚಿ ಹತೋಟಿಗೆ ತರುವ ಪ್ರಯತ್ನ ನಡೆಸಲಾಗಿತ್ತಾದರೂ, ಇದೀಗ ಮತ್ತೆ ತ್ಯಾಜ್ಯ ತುಂಬಿ ಮಳೆಗಾಲದಲ್ಲಿ ಸೊಳ್ಳೆ ಉತ್ಪತ್ತಿ ತಾಣವಾಗಿ ಮಾರ್ಪಾಡಾಗಿದೆ. ಇದೇ ರೀತಿ ಪಡುಬಿದ್ರಿ ಅಬ್ಬೇಡಿ ರಸ್ತೆ, ಅಲಂಗಾರು ರಸ್ತೆ, ಪಡುಬಿದ್ರಿ ಕೆಳಗಿನ ಪೇಟೆ ಹಳೇ ಎಂಬಿಸಿ ರಸ್ತೆ, ಬೀಡು ಮಂಜೊಟ್ಟಿ ರಸ್ತೆ ಚರಂಡಿಗಳಲ್ಲಿ ಮೂಟೆಗಟ್ಟಲೇ ತ್ಯಾಜ್ಯ ತುಂಬಿದೆ. ಲೋಕೋಪಯೋಗಿ ಇಲಾಖೆಗೆ ಸೇರಿದ ಪಡುಬಿದ್ರಿ ಕೆಳಗಿನ ಪೇಟೆ ಹಳೇ ಎಂಬಿಸಿ ರಸ್ತೆಯಲ್ಲಿ ಕಾಂಕ್ರೀಟ್ ಚರಂಡಿಯಿದ್ದರೂ ತ್ಯಾಜ್ಯ ಹಾಗೂ ಗಿಡಗಂಟಿಗಳಿಂದ ಆವರಿಸಿದ್ದು, ಗ್ರಾಪಂ ಅದರ ತೆರವಿಗೆ ಗಮನಹರಿಸಿದಂತಿಲ್ಲ. ವಿಪರೀತ ಮಳೆ ಬಂದಾಗ ದೇವಸ್ಥಾನ, ಶಾಲೆಗೆ ಸಂಚರಿಸುವ ಜನ ಹಾಗೂ ವಾಹನ ಸವಾರರು ಸಂಕಷ್ಟಪಡುವ ಸ್ಥಿತಿಯಿದೆ.
