ಪ್ರತಿಯೊಂದು ಭಾಷೆಗೂ ತನ್ನದೇ ಆದ ಸೊಗಡು, ಮಹತ್ವ, ಭವ್ಯ ಇತಿಹಾಸ ಮತ್ತು ಸುಂದರ ವರ್ತಮಾನ ಇದೆ. ಅದರಲ್ಲೂ ಕನ್ನಡ ಪ್ರಾಚೀನ ಭಾಷೆ ಆಗಿರುವುದರಿಂದಲೇ ಶಾಸ್ತ್ರೀಯ ಭಾಷೆ ಮನ್ನಣೆಯ ಗರಿಯನ್ನು ಅಲಂಕರಿಸಿಕೊಂಡಿದೆ. ಸಾಹಿತ್ಯ ಕ್ಷೇತ್ರದಲ್ಲಿ ಅಮೋಘ ಸಾಧನೆಗಾಗಿ 8 ಜ್ಞಾನಪೀಠ ಪ್ರಶಸ್ತಿಗಳನ್ನು ಮತ್ತು ಇತ್ತೀಚೆಗಷ್ಟೇ ಅಂತಾರಾಷ್ಟ್ರೀಯ ಬುಕರ್ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿದೆ. ಅಲ್ಲದೆ, ಕನ್ನಡಿಗರು ಭಾಷೆಯ ಬಗ್ಗೆ ಅಭಿಮಾನ ಹೊಂದಿ, ರಚನಾತ್ಮಕ, ಸೃಜನಶೀಲ ಚಟುವಟಿಕೆಗಳಲ್ಲಿ ತೊಡಗಿಕೊಂಡಿದ್ದಾರೆಯೇ ಹೊರತು ದುರಾಭಿಮಾನ ಬೆಳೆಸಿಕೊಂಡಿಲ್ಲ. ಹಾಗಂತ ಕನ್ನಡಿಗರ ತಾಳ್ಮೆ, ಸ್ವಾಭಿಮಾನವನ್ನು ಕೆಣಕುವ ದುಸ್ಸಾಹಸಕ್ಕೆ ಯಾರೂ ಕೈಹಾಕಬಾರದು.
