ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಟೀ-ಕಾಫಿ ಕುಡಿತೀರಾ? 10 ವರ್ಷದ ಅಧ್ಯಯನ ನಂತ್ರ ಆಘಾತಕಾರಿ ಸಂಗತಿ ಬಯಲು! Tea or Coffee

Tea or Coffee : ಜಗತ್ತಿನ ಬಹುತೇಕ ಜನರ ದಿನ ಆರಂಭವಾಗುವುದೇ ಟೀ ಅಥವಾ ಕಾಫಿಯಿಂದ. ದಿನಕ್ಕೆ ಒಂದು ಕಪ್ ಕಾಫಿ-ಟೀ ಕುಡಿಯಲಿಲ್ಲ ಅಂದ್ರೆ ಆ ದಿನ ಏನೋ ಮಿಸ್​ ಮಾಡಿಕೊಂಡಂತೆ ಜನರು ಚಡಪಡಿಸುತ್ತಾರೆ. ಒಂದು ಹೊತ್ತು ಊಟ ಬೇಕಾದರೂ ಬಿಡುತ್ತೇನೆ ಆದರೆ, ಟೀ-ಕಾಫಿ ಬಿಡುವುದಿಲ್ಲ ಎಂದು ಹೇಳುವ ಜನರು ಕೂಡ ನಮ್ಮ ನಡುವೆ ಇದ್ದಾರೆ. ದಿನಕ್ಕೊಂದು ಗ್ಲಾಸ್​ ಟೀ ಅಥವಾ ಕಾಫಿ ಕುಡಿಯದಿದ್ದರೂ ಸುಸ್ತು, ಚಡಪಡಿಕೆ ಹಾಗೂ ತಲೆ ನೋವು ಅನುಭವಿಸುವವರೂ ಇದ್ದಾರೆ. ಅಷ್ಟೊಂದು ಜನಪ್ರಿಯವಾಗಿದೆ ಈ ಪಾನೀಯ.

ಅಂದಹಾಗೆ ಚಹಾ ಮತ್ತು ಕಾಫಿಯನ್ನು ಕುಡಿಯದೆ ಬದುಕುವುದು ಅಸಾಧ್ಯವೆಂದು ಎಂದು ಹೇಳಿದರೂ ಅದರ ದುಷ್ಪರಿಣಾಮಗಳ ಬಗ್ಗೆ ಜಗತ್ತಿನಲ್ಲಿ ಅನೇಕ ಅಧ್ಯಯನಗಳು ಹೊರಬರುತ್ತಿವೆ. ಕಾಫಿ ಕುಡಿಯುವುದರಿಂದ ಮಾರಕ ಕಾಯಿಲೆಗಳು ಉಂಟಾಗಬಹುದು ಮತ್ತು ಕಾಫಿ ಕುಡಿಯುವವರಲ್ಲಿ ಹೃದಯ ಕಾಯಿಲೆಯ ಅಪಾಯ ಕಡಿಮೆಯಾಗುತ್ತದೆ ಎಂದು ಹೇಳುವ ವಿವಿಧ ಅಧ್ಯಯನಗಳು ಈಗಾಗಲೇ ಪ್ರಕಟವಾಗಿವೆ. ಆದಾಗ್ಯೂ, ಈ ಹೊಸ ಅಧ್ಯಯನವು ಕಾಫಿಗಿಂತ ಕಾಫಿ ಕುಡಿಯುವ ಸಮಯವು ಮುಖ್ಯ ಎಂಬುದನ್ನು ಬಹಿರಂಗಪಡಿಸಿದೆ.

ಯುರೋಪಿಯನ್ ಹಾರ್ಟ್ ಜರ್ನಲ್‌ನಲ್ಲಿ ಪ್ರಕಟವಾದ ಹೊಸ ಅಧ್ಯಯನದಲ್ಲಿ ದೀರ್ಘಕಾಲದವರೆಗೆ ಅಮೆರಿಕ ಜನರ ಜೀವನಶೈಲಿ, ಆಹಾರ ಪದ್ಧತಿ ಮತ್ತು ಆರೋಗ್ಯವನ್ನು ಅಧ್ಯಯನ ಮಾಡಲಾಗಿದೆ. ಸುಮಾರು 40,000 ಜನರ ಡೇಟಾವನ್ನು ಈ ಅಧ್ಯಯನಕ್ಕಾಗಿ ಬಳಸಲಾಗಿದೆ.

ಟುಲೇನ್ ವಿಶ್ವವಿದ್ಯಾಲಯದ ಸಂಶೋಧಕರು ಈ ಅಧ್ಯಯನವನ್ನು ನಡೆಸಿದ್ದಾರೆ. ಅಧ್ಯಯನದಲ್ಲಿ ಜನರನ್ನು ಎರಡು ಗುಂಪುಗಳಾಗಿ ವಿಂಗಡಿಸಲಾಯಿತು. ಮೊದಲನೆಯದು ದಿನಕ್ಕೆ ಎರಡು ಬಾರಿ ಕಾಫಿ ಕುಡಿಯುವವರು ಮತ್ತು ಎರಡನೆಯದು ಬೆಳಗ್ಗೆ ಮಾತ್ರ ಕಾಫಿ ಕುಡಿಯುವವರು. ಭಾಗವಹಿಸಿದವರಲ್ಲಿ ಶೇ. 14 ರಷ್ಟು ಜನರು ಒಂದು ದಿನಕ್ಕೆ ಹಲವಾರು ಬಾರಿ ಕಾಫಿ ಕುಡಿಯುತ್ತಿದ್ದರು. ಶೇ. 36 ರಷ್ಟು ಜನರು ಬೆಳಿಗ್ಗೆ ಮಾತ್ರ ಕಾಫಿ ಕುಡಿಯುತ್ತಿದ್ದರು. ಸುಮಾರು ಹತ್ತು ವರ್ಷಗಳ ಕಾಲ ಅಧ್ಯಯನದಲ್ಲಿ ಭಾಗವಹಿಸಿದವರ ಮೇಲೆ ನಿಗಾ ಇರಿಸಲಾಯಿತು. ಈ ಅವಧಿಯಲ್ಲಿ ಅಧ್ಯಯನದಲ್ಲಿ ಭಾಗವಹಿಸಿದವರಲ್ಲಿ 4,295 ಜನರು ಮೃತಪಟ್ಟರು.

ಇದನ್ನೂ ಓದಿ: ಯಾವುದೇ ಕಾರಣಕ್ಕೂ ಬೇಡ… ಸೌತ್​ ಬ್ಯೂಟಿ ನಿತ್ಯಾ ಮೆನನ್​​ ನಿರ್ಧಾರದಿಂದ ಅಭಿಮಾನಿಗಳಿಗೆ ಬೇಸರ! Nithya Menen

ಈ ಬಗ್ಗೆ ಪರೀಕ್ಷೆ ಮಾಡಿದಾಗ ಬೆಳಿಗ್ಗೆ ಮಾತ್ರ ಕಾಫಿ ಕುಡಿದವರಲ್ಲಿ ಅಕಾಲಿಕ ಮರಣ ಹೊಂದುವ ಸಾಧ್ಯತೆ ಕಡಿಮೆ ಎಂದು ಕಂಡುಬಂದಿದೆ. ಇದಲ್ಲದೆ, ಅವರು ಇತರರಿಗಿಂತ ಹೃದಯ ಕಾಯಿಲೆಯಿಂದ ಸಾಯುವ ಸಾಧ್ಯತೆಯೂ ತುಂಬಾ ಕಡಿಮೆ ಎಂಬುದು ಬಹಿರಂಗವಾಗಿದೆ. ಹೀಗಾಗಿ ಬೆಳಗ್ಗೆ ಬಿಟ್ಟು ದಿನದ ಇತರೆ ಸಮಯದಲ್ಲಿ ಕಾಫಿ ಕುಡಿಯುವುದು ಉತ್ತಮವಲ್ಲ ಎಂದು ಕಂಡುಬಂದಿದೆ.

ದಿನಕ್ಕೆ ಹಲವಾರು ಬಾರಿ ಕಾಫಿ ಕುಡಿಯುವುದಕ್ಕಿಂತ ಬೆಳಿಗ್ಗೆ ಮಾತ್ರ ಕಾಫಿ ಕುಡಿಯುವುದು ಉತ್ತಮ ಎಂದು ಸಂಶೋಧಕರು ಹೇಳುತ್ತಾರೆ. ಆದರೆ, ಹೆಚ್ಚಿನ ಪ್ರಮಾಣದಲ್ಲಿ ಕಾಫಿ ಕುಡಿಯುವುದರಿಂದ ಸಾವಿನ ಅಪಾಯ ಹೆಚ್ಚಾಗುತ್ತದೆ ಎಂದು ಸಂಶೋಧಕರು ಕಂಡುಕೊಂಡಿದ್ದಾರೆ. ಬೆಳಿಗ್ಗೆ ಕಾಫಿ ಕುಡಿಯುವುದರಿಂದ ಇತರ ಸಮಯಗಳಲ್ಲಿ ಕಾಫಿ ಕುಡಿಯುವುದಕ್ಕಿಂತ ಸಾವಿನ ಅಪಾಯ ಕಡಿಮೆ ಎಂದು ಯುರೋಪಿಯನ್ ಹಾರ್ಟ್ ಜರ್ನಲ್‌ನಲ್ಲಿಯೂ ಪ್ರಕಟವಾಗಿದೆ.

ಕಾಫಿ ಕುಡಿಯುವವರಿಗೆ ಹೃದಯ ಕಾಯಿಲೆ ಬರುವ ಅಪಾಯ ಕಡಿಮೆ ಎಂದು ಇಲ್ಲಿಯವರೆಗಿನ ಸಂಶೋಧನೆಗಳು ಸೂಚಿಸುತ್ತವೆ. ಅಲ್ಲದೆ, ಟೈಪ್ 2 ಮಧುಮೇಹದಂತಹ ದೀರ್ಘಕಾಲದ ಕಾಯಿಲೆಗಳ ಅಪಾಯವೂ ಕಡಿಮೆ ಎಂದು ತೋರಿಸಲಾಗಿದೆ. ಕಾಫಿಯಲ್ಲಿರುವ ಕೆಫೀನ್ ನಮ್ಮ ದೇಹದ ಮೇಲೆ ಬೀರುವ ಪರಿಣಾಮಗಳ ಕುರಿತು ಅನೇಕ ಅಧ್ಯಯನಗಳು ನಡೆದಿವೆ. ಆದರೆ, ಕಾಫಿ ಸೇವನೆಯ ಸಮಯವನ್ನು ತಿಳಿಸುವ ಮೊದಲ ಅಧ್ಯಯನ ಇದಾಗಿದೆ.

ನೀವು ಕಾಫಿ ಕುಡಿಯುತ್ತೀರೋ ಇಲ್ಲವೋ ಎಂಬುದು ಮಾತ್ರವಲ್ಲ, ನಮ್ಮ ಅಧ್ಯಯನವು ಕಾಫಿ ಕುಡಿಯಲು ಸೂಕ್ತ ಸಮಯವನ್ನು ಸಹ ನೋಡಿದೆ. ನಮ್ಮ ಅಧ್ಯಯನವು ನೀವು ಕಾಫಿ ಕುಡಿಯಲೇಬೇಕೆಂದು ಸೂಚಿಸುವುದಿಲ್ಲ. ಇದು ನಿಮ್ಮ ದೇಹದಲ್ಲಿ ಯಾವುದೇ ಬದಲಾವಣೆಗಳನ್ನು ಮಾಡುತ್ತದೆಯೇ ಎಂದು ನೋಡಲು ಇದು ಒಂದು ಪ್ರಯೋಗವಾಗಿತ್ತು ಎಂದು ಲೂಸಿಯಾನದ ಟುಲೇನ್ ವಿಶ್ವವಿದ್ಯಾಲಯದ ಪ್ರಮುಖ ಸಂಶೋಧಕ ಡಾ. ಲುಕಿ ಹೇಳಿದರು.

ಅಂದಹಾಗೆ ಮಧ್ಯಾಹ್ನದ ನಂತರ ಕಾಫಿ ಕುಡಿಯುವುದರಿಂದ ಸಿರ್ಕಾಡಿಯನ್ ಲಯಗಳು ಮತ್ತು ಮೆಲಟೋನಿನ್‌ನಂತಹ ಹಾರ್ಮೋನುಗಳ ಮಟ್ಟಗಳನ್ನು ಅಡ್ಡಿಪಡಿಸಬಹುದು. ಇದು ರಕ್ತದೊತ್ತಡ ಮತ್ತು ಹೃದಯದ ಅಪಾಯವನ್ನು ಹೆಚ್ಚಿಸಬಹುದು. ಈ ಅಧ್ಯಯನವನ್ನು ಅಮೆರಿಕ ಜನರ ಮೇಲೆ ಮಾತ್ರ ನಡೆಸಲಾಗಿದೆ. ಹೀಗಾಗಿ ಪ್ರಪಂಚದಾದ್ಯಂತದ ಜನರಿಗೆ ಇದು ಬೇರೆ ರೀತಿಯ ಪ್ರಭಾವ ಬೀರಬಹುದು ಎಂದು ಸಂಶೋಧಕರು ಹೇಳುತ್ತಾರೆ. (ಏಜೆನ್ಸೀಸ್​)

https://www.vijayavani.net/maha-kumbh-mela-2025-all-about-kumbh-dates-types-of-kumbh-shahi-snan-dates-and-all-you-need-to-know

https://www.vijayavani.net/no-one-can-blame-when-that-actress-came-instead-of-honey-rose