ಬಾಕ್ಸ್​ ಆಫೀಸಲ್ಲಿ 'ಸೂರ್ಯವಂಶಿ'ಗೆ ಬಂಪರ್​! ಮೊದಲನೇ ದಿನದ ಕಲೆಕ್ಷನ್​ ಎಷ್ಟು ಗೊತ್ತಾ?

ಮಲ್ಟಿಸ್ಟಾರರ್​ ಹಿಂದಿ ಚಲನಚಿತ್ರ ಸೂರ್ಯವಂಶಿ ಶುಕ್ರವಾರ(ನ.5) ಸಿನಿಮಾ ಮಂದಿರಗಳಲ್ಲಿ ತೆರೆಕಂಡಿದ್ದು, ಮೊದಲನೇ ದಿನವೇ ಬಾಕ್ಸ್​​ ಆಫೀಸಿನಲ್ಲಿ ಬರೋಬ್ಬರಿ 26 ಕೋಟಿ ರೂಪಾಯಿ ಸಂಪಾದಿಸಿದೆ. ಅಕ್ಷಯ್​ಕುಮಾರ್​​, ಕತ್ರೀನಾ ಕೈಫ್​, ಅಜಯ್​ ದೇವಗನ್​ ಮತ್ತು ರಣವೀರ್​ ಸಿಂಗ್​ ಮುಂಚೂಣಿ ಪಾತ್ರಗಳಲ್ಲಿರುವ ಸೂರ್ಯವಂಶಿಗೆ ಚಿತ್ರಪ್ರಿಯರಿಂದ ಮೆಚ್ಚುಗೆ ಕೂಡ ಸಿಕ್ಕಿದೆ.

ತಮ್ಮ ಚಿತ್ರಕ್ಕೆ ಸಿಕ್ಕಿರುವ ಬಂಪರ್​​ ಪ್ರತಿಕ್ರಿಯೆಗೆ ಧನ್ಯವಾದ ಹೇಳುತ್ತಾ, ಬಾಲಿವುಡ್​ ನಟ ಅಕ್ಷಯ್​ಕುಮಾರ್​​ ಇನ್​​ಸ್ಟಾಗ್ರಾಂನಲ್ಲಿ ಕುಣಿದು ಕುಪ್ಪಳಿಸುತ್ತಿರುವ ತಮ್ಮ ವಿಡಿಯೋ ತುಣುಕನ್ನು ಶೇರ್ ಮಾಡಿದ್ದಾರೆ. ಜೊತೆಗೆ, "ನನಗೆ ಅತಿಯಾದ ಸಂತಸವಾಗಿದೆ. ನಿಮ್ಮ ಜೀವನಗಳಲ್ಲಿ ಸಿನಿಮಾಗಳನ್ನು ಮತ್ತೆ ಆಲಿಂಗಿಸಿಕೊಂಡಿರುವುದಕ್ಕೆ ತುಂಬಾ ಧನ್ಯವಾದ. ಈ ಸೂಪರ್​ ಪ್ರತಿಕ್ರಿಯೆ ಸೂರ್ಯವಂಶಿ ತಂಡಕ್ಕೆ ಮಾತ್ರವಲ್ಲ ನಮ್ಮ ಚಿತ್ರೋದ್ಯಮಕ್ಕೇ ಸಂತೋಷ ಮತ್ತು ಸಮೃದ್ಧಿ ತರುತ್ತದೆ ಎನ್ನುವುದರ ಗುರುತು. ನೀವಿಲ್ಲದೇ ನಾವೇನೂ ಅಲ್ಲ. ನಾನು ಚಿರಋಣಿ" ಎಂದು ಬರೆದಿದ್ದಾರೆ.

ಸೂರ್ಯವಂಶಿ ಚಿತ್ರವು ಒಂದೇ ಸಮಯದಲ್ಲಿ ಭಾರತದಾದ್ಯಂತ 3,500 ಸ್ಕ್ರೀನ್​ಗಳಲ್ಲಿ ಮತ್ತು ವಿದೇಶಗಳಲ್ಲಿ 1,500 ಸ್ಕ್ರೀನ್​​ಗಳಲ್ಲಿ ತೆರೆ ಕಂಡಿದೆ. ಅದರ ಬಿಡುಗಡೆಯು ಹಾಲಿವುಡ್​ ಚಿತ್ರ 'ಎಟರ್ನಲ್ಸ್​​'ನೊಂದಿಗೆ ಆಗಿದ್ದು, ಆ ಚಿತ್ರಕ್ಕೆ ಮೊದಲ ದಿನ 8 ಕೋಟಿ ರೂ. ನಿವ್ವಳ ಆದಾಯ ಲಭಿಸಿದೆ ಎನ್ನಲಾಗಿದೆ. ದೀಪಾವಳಿ ರಜೆಯ ಹಿನ್ನೆಲೆಯಲ್ಲಿ ಉತ್ತಮ ಗಲ್ಲಾಪೆಟ್ಟಿಗೆ ಫಲಿತಾಂಶ ಕಂಡುಬಂದಿದೆ. ಮಹಾರಾಷ್ಟ್ರದಲ್ಲಿ ಚಿತ್ರಮಂದಿರಗಳನ್ನು ಅರ್ಧದಷ್ಟು ಸಾಮರ್ಥ್ಯಕ್ಕೆ ಮಾತ್ರ ತುಂಬುವ ಅವಕಾಶವಿದ್ದರೂ ಇಷ್ಟು ಕಲೆಕ್ಷನ್​​ ಆಗಿರುವುದು ಸಕಾರಾತ್ಮಕ ಬೆಳವಣಿಗೆ ಎನ್ನಲಾಗಿದೆ. (ಏಜೆನ್ಸೀಸ್)

https://www.vijayavani.net/ncb-officer-sameer-wankhede-had-stopped-srk-a-decade-ago/

https://www.vijayavani.net/video-people-force-girl-to-remove-burkha-in-public/