ಹೊಸ ನಿರೀಕ್ಷೆಗಳ ಆಶಯ

ಕಾರವಾರ: ಸಾವು, ಸಾವಿನ ಭಯ…ಆರ್ಥಿಕ ಸಂಕಷ್ಟ, ಅವಮಾನದಿಂದ ಸಂಘರ್ಷ.. ಅಬ್ಬಾ ‘2020’ ಎಂಬ ವರ್ಷ ಭೀಕರವಾಗಿ ಕಾಡಿಬಿಟ್ಟಿತು. ‘ದೇವರೆ ಮತ್ತೆ ಬರದಿರಲಿ ಇಂಥ ವರ್ಷ’ ಎಂದು ಜನ ಪರಿ ಪರಿಯಾಗಿ ಬೇಡಿಕೊಳ್ಳುವಂತೆ ಮಾಡಿದೆ.

ಇವೆಲ್ಲದರ ನಡುವೆಯೂ ಈ ವರ್ಷದ ವಿದ್ಯಮಾನಗಳು ಮಾನವನ ಮುಖವಾಡವನ್ನು ಕಳಚಿ, ಅಸಲಿ ಅಸ್ತಿತ್ವವನ್ನು ತೋರಿಸುವಂತೆ ಮಾಡಿದ್ದಂತೂ ಹೌದು. ಶ್ರೀಮಂತಿಕೆಯ ದರ್ಪ,ಅಧಿಕಾರದ ಅಮಲು ಯಾವುದೂ ಶಾಶ್ವತವಲ್ಲ ಎಂಬುದನ್ನು ಸ್ವಷ್ಟವಾಗಿ ತಿಳಿಸಿಕೊಟ್ಟಿದೆ. ಹಳ್ಳಿ ಜೀವನದ ಮಹತ್ವ ಎತ್ತಿ ಹಿಡಿದಿದೆ ಎಂಬುದೂ ಸತ್ಯ.

ದುರಂತಗಳಿಂದಲೇ ತುಂಬಿದ ಕ್ಯಾಲೆಂಡರ್ ಬದಲಿಸುವ ಕಾಲ ಬಂದುಬಿಟ್ಟಿದೆ. ಈ ವರ್ಷದ ನೋವುಗಳನ್ನು ನೆನಪಿನ ಪೆಟ್ಟಿಗೆಯಲ್ಲಿಟ್ಟು ಹೊಸ ಯೋಚನೆ, ಯೋಜನೆ, ಸಕಾರಾತ್ಮಕ ಚಿಂತನೆಗಳ ಮೂಲಕ ನಾವು ಹೊಸ ವರ್ಷವನ್ನು ಸ್ವಾಗತಿಸಲೇಬೇಕಿದೆ. ಹೋದ ಕಾಲಕ್ಕೆ ಚಿಂತಿಸಿ ಫಲವಿಲ್ಲ. ಏನೆ ಕಷ್ಟ, ನಷ್ಟವಿದ್ದರೂ ಮರೆತು ಮುನ್ನುಗ್ಗಿದರೇ ಭರವಸೆಯ ಬೆಳಕು ಕಾಣಹುದಾಗಿದೆ. ‘ವಿಜಯವಾಣಿ’ ಕಳೆದ ಎರಡು ದಿನದಿಂದ 2020ರ ಹಿನ್ನೋಟ ಪ್ರಕಟಿಸಿತ್ತು. ಹಳೆಯ ವರ್ಷದ ಕಹಿ ಅನುಭವವನ್ನಾಧರಿಸಿ ಹೊಸ ವರ್ಷ ಹೀಗಿರಲಿ ಎಂಬ ಆಶಗಳ ರೂಪುರೇಷೆ ಇಲ್ಲಿದೆ. ಈ ಯೋಜನೆಯಂತೆಯೇ ನಡೆಯಬೇಕು ಎನ್ನುವಂತಿಲ್ಲ. ನಡೆಯುತ್ತದೆ ಎನ್ನುವ ಹಾಗೂ ಇಲ್ಲ. ಆದರೂ ಒಳ್ಳೆಯದೇ ಆಗಲಿ ಎಂಬ ಸದಾಶಯ ಇಲ್ಲಿದೆಯಷ್ಟೆ.

• 2021 ರ ನಿರೀಕ್ಷೆಗಳು :
• ಕರೊನಾ ಸಂಕಷ್ಟಕ್ಕೆ ಬ್ರೆಕ್ ಬೀಳಲಿ. ಲಸಿಕೆ ಬಂದು ರೋಗ ದೂರವಾಗಲಿ.
• ಜನಜೀವನ ಶೀಘ್ರ ಸಹಜ ಸ್ಥಿತಿಯತ್ತ ಮರಳಲಿ. ಶಾಲೆ, ಕಾಲೇಜ್​ಗಳು ಮತ್ತೆ ಪ್ರಾರಂಭವಾಗಿ ಕಳೆದ ವರ್ಷದಲ್ಲಿ ಅಧ್ಯಯನ ನಷ್ಟ ತುಂಬಿಕೊಳ್ಳುವಂತಾಗಲಿ.
• ಜಿಲ್ಲೆಯ ಜನರ ಬಹು ವರ್ಷದದ ಆಗ್ರಹಕ್ಕೆ ಸರ್ಕಾರ ಮನ್ನಣೆ ನೀಡಿ ಸೂಪರ್ ಸ್ಪೆಷಾಲಿಟಿ ಹಾಗೂ ಎಮರ್ಜೆನ್ಸಿ ವ್ಯವಸ್ಥೆಗಳಿರುವ ಆಸ್ಪತ್ರೆ ನಿರ್ವಣವಾಗಲಿ.
• ಗ್ರಾಪಂ ಚುನಾವಣೆ ಮುಕ್ತಾಯವಾಗಿ ಹೊಸ ಸದಸ್ಯರು ಆಯ್ಕೆಯಾಗಿದ್ದಾರೆ. ಗ್ರಾಮಾಭಿವೃದ್ಧಿಗೆ ಇವರು ಮುನ್ನುಡಿ ಬರೆಯಲಿ.
• 2021 ರಲ್ಲಿ ಜಿಪಂ ಹಾಗೂ ತಾಪಂ ಚುನಾವಣೆಗಳು ನಡೆಯಲಿವೆ. ಉತ್ತಮ ಅಭ್ಯರ್ಥಿಗಳ ಆಯ್ಕೆಯಾಗಲಿ ಎಂಬ ಸದಾಶಯ.
• ಬಂದರುಗಳ ನಿರ್ಮಾಣ ಸಂಬಂಧ ವಿವಾದ ಎದ್ದಿದೆ. ಅವು ಬಗೆಹರಿದು ಅಭಿವೃದ್ಧಿ ಹಾಗೂ ಜನರ ಹಿತದೃಷ್ಟಿ ಎರಡೂ ಆಗಲಿ.