ಹೈನುಗಾರರಿಗಿಲ್ಲ ಪ್ರೋತ್ಸಾಹಧನ

ರಾಜೇಂದ್ರ ಶಿಂಗನಮನೆ ಶಿರಸಿ

ಸರ್ಕಾರವು ಪ್ರತಿ ಲೀಟರ್ ಹಾಲಿಗೆ ನೀಡುವ 5 ರೂಪಾಯಿ ಪ್ರೋತ್ಸಾಹಧನ ಹೈನುಗಾರರ ಪಾಲಿಗೆ ಗಗನ ಕುಸುಮವಾಗಿದೆ. ಪ್ರೋತ್ಸಾಹಧನ ಸಿಗದೆ 6 ತಿಂಗಳು ಕಳೆದಿದೆ. ಉತ್ತರ ಕನ್ನಡ ಜಿಲ್ಲೆಯೊಂದರಲ್ಲೇ ಅಂದಾಜು 4 ಕೋಟಿ ರೂಪಾಯಿ ಬಾಕಿ ಇದೆ.

ಜಿಲ್ಲೆಯಲ್ಲಿ ಸುಮಾರು 7800 ಹೈನುಗಾರರು 247 ಸಂಘಗಳಲ್ಲಿ ನಿತ್ಯವೂ ವ್ಯವಹರಿಸುತ್ತಿದ್ದಾರೆ. 43 ಸಾವಿರ ಲೀಟರ್ ಹಾಲನ್ನು ಹಾಲು ಸಂಘಗಳಿಗೆ ಹೈನುಗಾರರು ನೀಡುತ್ತಿದ್ದಾರೆ. ಪ್ರತಿ ದಿನ ಕೋಟ್ಯಂತರ ರೂಪಾಯಿ ವಹಿವಾಟು ಆಗುತ್ತಿದೆ. ಆದರೂ ಹೈನುಗಾರರಿಗೆ ಉತ್ತೇಜನಕ್ಕೆ ಸರ್ಕಾರದಿಂದ ಪ್ರತೀ ಲೀಟರ್ ಹಾಲಿಗೆ ನೀಡಬೇಕಿರುವ 5 ರೂ. ಪ್ರೋತ್ಸಾಹಧನ ಮಾತ್ರ ಬಿಡುಗಡೆಯಾಗಿಲ್ಲ. ತಿಂಗಳಿಗೆ ಅಂದಾಜು 65 ಲಕ್ಷ ರೂ.ಗಳಂತೆ ಈವರೆಗೆ 4 ಕೋಟಿ ರೂ.ಗಳಷ್ಟು ಮೊತ್ತ ಬಾಕಿಯಿದೆ.

ಐಡಿ ಇದ್ದರೆ ಮಾತ್ರ ಹಣ: ಸರ್ಕಾರದಲ್ಲಿ ಲೆಕ್ಕಪತ್ರ, ದಾಖಲಾತಿಗಳ ಸಮರ್ಪಕತೆಗಾಗಿ ಫಾರ್ಮರ್ ರಿಜಿಸ್ಟ್ರೇಶನ್ ಆಂಡ್ ಯುನಿಫೈಡ್ ಬೆನಿಫೀಶಿಯರಿ ಇನ್ಪಾರ್​ವೆುೕೕಶನ್ ಸಿಸ್ಟ್ಂ (ಫ್ರೂಟ್ಸ್) ಐಡಿ ರಚಿಸುವಂತೆ ನಾಲ್ಕೈದು ತಿಂಗಳ ಹಿಂದೆ ಪ್ರತಿ ಹಾಲು ಸಂಘಗಳಿಗೂ ತಿಳಿಸಲಾಗಿತ್ತು. ತಂತ್ರಾಂಶ ಸಮಸ್ಯೆಯ ಜತೆ ನೆಟ್ವರ್ಕ್ ಸಮಸ್ಯೆಯ ಕಾರಣಕ್ಕೆ ಈ ದಾಖಲಾತಿ ನೀಡುವಲ್ಲಿ ವಿಳಂಬವಾಗಿದೆ. ಇದನ್ನೇ ಮುಂದಿಟ್ಟುಕೊಂಡಿರುವ ಅಧಿಕಾರಿಗಳು ಐಡಿ ಇದ್ದವರಿಗೆ ಮಾತ್ರ ಪ್ರೋತ್ಸಾಹಧನ ನೀಡಲಾಗುವುದು ಎಂಬ ಹೊಸ ವರಸೆ ಶುರು ಮಾಡಿದ್ದಾರೆ. ಇದು ಹೈನುಗಾರರಿಗೆ ನುಂಗಲಾರದ ತುತ್ತಾಗಿದೆ ಎಂಬುದು ಹೆಸರು ಹೇಳಲಿಚ್ಛಿಸದ ಹಾಲು ಸಂಘದ ಮುಖ್ಯಸ್ಥರೊಬ್ಬರ ಮಾತು.

ಕರೊನಾ ನೆಪ, ದುಡ್ಡಿಲ್ಲ: ಪ್ರೋತ್ಸಾಹಧನ ಬಾಕಿಯ ಸಂಬಂಧ ಒಕ್ಕೂಟದ ಅಧಿಕಾರಿಗಳನ್ನು ಸಂರ್ಪಸಿದರೆ ಕರೊನಾ ಕಾರಣದಿಂದ ಸರ್ಕಾರದಲ್ಲಿ ಹಣವಿಲ್ಲ. ಹಾಗಾಗಿ ಬಿಡುಗಡೆ ಮಾಡಲಾಗಿಲ್ಲ. ಆದರೆ ಹಂತಹಂತವಾಗಿ ಹೈನುಗಾರರಿಗೆ ಮೊತ್ತ ಸಂದಾಯ ಮಾಡುವುದಾಗಿ ಸಮಜಾಯಿಷಿ ನೀಡುತ್ತಾರೆ.