ಹೆಚ್ಚು ಸ್ಥಾನ ಗಳಿಸಿದ ಕೆಎನ್​ಸಿಎಂಎಸ್ ಅಭ್ಯರ್ಥಿಗಳು

ಕಾರವಾರ: ಇಲ್ಲಿನ ಕದಂಬ ನೌಕಾನೆಲೆಯ ಸಿವಿಲಿಯನ್ ನೌಕರರ ವರ್ಕ್ ಕಮಿಟಿ ಚುನಾವಣೆಯಲ್ಲಿ ಸಂಘ ಪರಿವಾರ ಹಿನ್ನೆಲೆಯ ಭಾರತೀಯ ಪ್ರತಿ ರಕ್ಷಾ ಮಜ್ದೂರ್ ಸಂಘ(ಬಿಪಿಎಂಎಸ್) ಸಂಯೋಜಿತ ಕಾರವಾರ ನೇವಲ್ ಸಿವಿಲಿಯನ್ ಮಜ್ದೂರ್ ಸಂಘ (ಕೆಎನ್​ಸಿಎಂಎಸ್) ಅತಿ ಹೆಚ್ಚು ಸ್ಥಾನಗಳಲ್ಲಿ ಜಯಶಾಲಿಯಾಗಿದೆ.

ಶುಕ್ರವಾರ ನೇವಲ್ ಶಿಪ್ ರಿಪೇರ್ ಯಾರ್ಡ್​ನಲ್ಲಿ ಚುನಾವಣೆ ನಡೆಯಿತು. ಸಾವಿರಕ್ಕೂ ಅಧಿಕ ನೌಕರರು ಮತದಾನ ಮಾಡಿದ್ದರು. 6 ಸ್ಥಾನಗಳಲ್ಲಿ 4 ಸ್ಥಾನಗಳನ್ನು ಕೆಎನ್​ಸಿಎಂಎಸ್ ಪಡೆದಿದೆ. ಎದುರಾಳಿ ಸಿಐಟಿಯು ಸಂಯೋಜಿತ ಸಂಘಟನೆ 2 ಸ್ಥಾನಗಳಲ್ಲಿ ಗೆದ್ದಿದೆ.

ಸುಬ್ರಹ್ಮಣ್ಯ ಹರಿಕಂತ್ರ, ವಿಶ್ವನಾಥ ಯು. ನಾಯ್ಕ, ಮನೋಜ ಕುಮಾರ ಚೌಗಲೆ, ಜಯಶೇಖರ ಪಂಡಿತ ಆಯ್ಕೆಯಾದರು. ಅಲ್ಲದೆ, ಕ್ಯಾಂಟೀನ್ ಸಮಿತಿಗೆ ಬಿಎಂಎಸ್​ನ ಮಂಗಲದಾಸ ನಾಯ್ಕ ಮತ್ತು ದಾಮೋದರ, ಸುರಕ್ಷಾ ಸಮಿತಿಗೆ ಮಂಜುನಾಥ ಟಿ.ಬಿ.ಯೋಗೇಶ ಶೆಟ್ಟಿ ಆಯ್ಕೆಯಾದರು ಎಂದು ಕಾರವಾರ ನೇವಲ್ ಸಿವಿಲಿಯನ್ ಮಜ್ದೂರ್ ಸಂಘದ ಕಾರ್ಯಾಧ್ಯಕ್ಷ ಅಮೃತ ಮುದ್ಗೇಕರ್ ಹಾಗೂ ಪ್ರಧಾನ ಕಾರ್ಯದರ್ಶಿ ವಿನಾಲ ರತ್ನಾಕರ ನಾಗೇಕರ್ ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.