ಸರ್ಕಾರಿ ಫಲಕದಲ್ಲಿ ಖಾಸಗಿ ಜಾಹೀರಾತು

ರಾಣೆಬೆನ್ನೂರ: ಕೇಂದ್ರ ಹಾಗೂ ರಾಜ್ಯ ಸರ್ಕಾರ ರೂಪಿಸುವ ಯೋಜನೆಗಳನ್ನು ಸಾರ್ವಜನಿಕರಿಗೆ ತಿಳಿಯಪಡಿಸುವ ಉದ್ದೇಶದಿಂದ ಮಿನಿ ವಿಧಾನಸೌಧ, ನಗರಸಭೆ, ತಾಪಂ ಹಾಗೂ ವಿವಿಧ ಸರ್ಕಾರಿ ಕಚೇರಿಗಳ ಎದುರು ನಾಮಫಲಕ ಅಳವಡಿಸಲಾಗಿದೆ. ಆದರೆ, ಅವುಗಳನ್ನು ಖಾಸಗಿಯವರು ಬಳಸುತ್ತಿದ್ದಾರೆ.

ನಗರದ ಮಿನಿ ವಿಧಾನಸೌಧ, ನಗರಸಭೆ, ತಾಪಂ, ಬಸ್ ನಿಲ್ದಾಣ, ಪೋಸ್ಟ ವೃತ್ತದಲ್ಲಿರುವ ಸರ್ಕಾರಿ ನಾಮಫಲಕದ ಮೇಲೆ ಖಾಸಗಿಯವರು ತಮ್ಮ ನಾಮಫಲಕ ಅಳವಡಿಸುತ್ತಿದ್ದಾರೆ. ಹೀಗಾಗಿ, ಸರ್ಕಾರದ ಯೋಜನೆಗಳ ಮಾಹಿತಿ ಸಾರ್ವಜನಿಕವಾಗಿ ಜನತೆಗೆ ಕಾಣಿಸದಂತಾಗಿದೆ.

ಮುಂದಿನ ತಿಂಗಳು ಶಾಲಾ-ಕಾಲೇಜ್ ಪ್ರವೇಶ ಆರಂಭವಾಗುವ ಮುನ್ಸೂಚನೆ ದೊರೆತಿದ್ದರಿಂದ ಹಾಗೂ ಪಿಯುಸಿ ಪರೀಕ್ಷೆಯಲ್ಲಿ ತಮ್ಮ ಕಾಲೇಜ್​ಗಳ ವಿದ್ಯಾರ್ಥಿಗಳು ಮಾಡಿದ ಸಾಧನೆಗಳನ್ನು ಆಯಾ ಕಾಲೇಜ್​ನವರು ನಗರದ ಪ್ರಮುಖ ರಸ್ತೆಗಳ ಬದಿಯಲ್ಲಿ ಜಾಹೀರಾತು ಫಲಕಗಳ ಮೂಲಕ ಅಳವಡಿಸಿದ್ದಾರೆ. ಅಲ್ಲದೆ, ಸರ್ಕಾರಿ ಜಾಹೀರಾತು ಫಲಕದ ಮೇಲೆಯೂ ತಮ್ಮ ಶಾಲಾ-ಕಾಲೇಜ್​ನ ಜಾಹೀರಾತು ಫಲಕ ಅಳವಡಿಸುತ್ತಿದ್ದಾರೆ. ಆದರೆ, ಇದನ್ನು ತಡೆಯಬೇಕಾಗಿರುವ ಆಯಾ ಇಲಾಖೆಯ ಅಧಿಕಾರಿಗಳು ಹಾಗೂ ನಗರಸಭೆ ಅಧಿಕಾರಿಗಳು ಕ್ರಮ ಕೈಗೊಳ್ಳದಿರುವುದು ಆಶ್ಚರ್ಯ ಮೂಡಿಸುತ್ತಿದೆ.