ಶೌಚಗೃಹಕ್ಕಾಗಿ ಸಾವಿರಾರು ಅರ್ಜಿ ಸಲ್ಲಿಕೆ

ರಾಜೇಂದ್ರ ಶಿಂಗನಮನೆ ಶಿರಸಿ

ಬಯಲು ಬಹಿರ್ದೆಸೆ ಮುಕ್ತ (ಒಡಿಎಫ್) ಜಿಲ್ಲೆಯಾಗಿ ಘೊಷಿಸಿಕೊಂಡಿದ್ದ ಉತ್ತರ ಕನ್ನಡದಲ್ಲಿ ಶೌಚಗೃಹ ನಿರ್ವಣಕ್ಕಾಗಿ ಪ್ರಸಕ್ತ ವರ್ಷ ಸಾವಿರಾರು ಅರ್ಜಿಗಳು ಸಲ್ಲಿಕೆಯಾಗಿವೆ!

ಹಳೇ ಸಮೀಕ್ಷೆಯ ಪಟ್ಟಿಯನ್ನು ಆಧರಿಸಿ ಒಡಿಎಫ್ ಡಿಕ್ಲೇರ್ ಮಾಡಿಕೊಂಡಿರುವ ಜಿಲ್ಲೆಯಲ್ಲಿ ಬಯಲು ಬಹಿರ್ದೆಸೆಯನ್ನು ಅವಲಂಬಿಸಿದವರ ಸಂಖ್ಯೆಯೇನೂ ಕಡಿಮೆಯಾಗಿಲ್ಲ. 11 ಸಾವಿರಕ್ಕಿಂತ ಹೆಚ್ಚಿನ ಸಂಖ್ಯೆಯಲ್ಲಿದ್ದ ಅರ್ಜಿಗಳನ್ನು ಶೂನ್ಯಕ್ಕಿಳಿಸಿ 2019-20ನೇ ಸಾಲಿನಲ್ಲಿ ಒಡಿಎಫ್​ಗೆ ಜಿಲ್ಲೆಯನ್ನು ಪರಿಗಣಿಸಲಾಗಿತ್ತು. ಆದರೆ, ಕಳೆದೊಂದು ವರ್ಷದಲ್ಲಿ ಕೌಟುಂಬಿಕ ವಿಭಜನೆ, ವಸತಿ ಯೋಜನೆಗಳ ಫಲಾನುಭವಿಗಳು, ಕೈ ತಪ್ಪಿದ ಕುಟುಂಬಗಳ ಹೆಚ್ಚುವರಿ ಸೇರ್ಪಡೆಗೆ ಅವಕಾಶ ನೀಡಿದ ಮೇಲೆ ಶೌಚಗೃಹ ವಂಚಿತರ ದೊಡ್ಡ ಪಟ್ಟಿ ಬೆಳೆದಿದ್ದು, ಹೊಸ ಅರ್ಜಿಗಳು ಸಲ್ಲಿಕೆಯಾಗುತ್ತಿವೆ.

1390 ಅರ್ಜಿಗಳು: ಜಿಲ್ಲೆಯು ಬಯಲು ಬಹಿರ್ದೆಸೆಯಿಂದ ಮುಕ್ತವಾಗಿವೆ ಎಂದು ಪ್ರಕಟಿಸಿದ ಬೆಳವಣಿಗೆಯ ನಂತರ ಸಂಬಂಧಪಟ್ಟ ಅಧಿಕಾರಿಗಳು ಫಜೀತಿಗೆ ಸಿಲುಕಿದ್ದರು. ತರಾತುರಿಯಲ್ಲಿ ಪಟ್ಟಿಯಲ್ಲಿದ್ದವರನ್ನು ಡಿಲೀಟ್ ಮಾಡಿ ಗುರಿ ಸಾಧನೆ ಮಾಡಿದ ದೂರುಗಳೂ ಆಗ ಕೇಳಿ ಬಂದಿದ್ದವು. ಇದಕ್ಕೆ ಗ್ರಾಪಂ ವ್ಯಾಪ್ತಿಗಳಲ್ಲಿ ಜನರಿಂದ ಭಾರಿ ವಿರೋಧ ವ್ಯಕ್ತವಾದ ಬಳಿಕ ಹೊಸ ಸೇರ್ಪಡೆಯ ಅವಕಾಶ ನೀಡಲಾಗಿತ್ತು. ಇದರ ಫಲವಾಗಿ ಕಳೆದ 4 ತಿಂಗಳಲ್ಲಿ 1390ಕ್ಕೂ ಹೆಚ್ಚಿನ ಶೌಚಗೃಹ ವಂಚಿತರ ಅರ್ಜಿ ಸ್ವೀಕೃತಗೊಂಡಿವೆ. ಅಗತ್ಯ ದಾಖಲೆಯೊಂದಿಗೆ ಶೌಚಗೃಹ ಕಟ್ಟಿಕೊಡುವಂತೆ ಕೇಳಿದ್ದು, ಬೇಡಿಕೆ ಪಟ್ಟಿ ಬೆಳೆಯುತ್ತಿರುವುದು ಅಧಿಕಾರಿಗಳಲ್ಲಿ ದಿಗಿಲು ಹುಟ್ಟಿಸಿದೆ.

ವರ್ಷದಿಂದ ತಾಪತ್ರಯ: ಕಳೆದೊಂದು ವರ್ಷದಿಂದ ಶೌಚಗೃಹ ಇಲ್ಲದವರು ತಮಗೂ ನಿರ್ವಿುಸಿಕೊಡುವಂತೆ ಸ್ಥಳೀಯ ಗ್ರಾಮ ಪಂಚಾಯಿತಿಗೆ ದುಂಬಾಲು ಬೀಳುತ್ತಿದ್ದಾರೆ. ಅಚ್ಚರಿಯ ಸಂಗತಿ ಏನೆಂದರೆ ಈ ಹಿಂದೆ ಬಯಲು ಬಹಿರ್ದೆಸೆ ಮುಕ್ತ ಗ್ರಾಮಗಳಿಂದಲೂ ಶೌಚಗೃಹದ ಬೇಡಿಕೆ ಬರುತ್ತಿದೆ. ಇದರಿಂದ ಒಡಿಎಫ್ ಜಿಲ್ಲೆಯಾಗಿ ಘೊಷಿಸಿಕೊಳ್ಳುವಲ್ಲಿ ತರಾತುರಿಯಿಂದ ಅರ್ಹ ಫಲಾನುಭವಿಗಳನ್ನು ಬಿಟ್ಟು ಮುಂದೆ ಸಾಗುತ್ತಿರುವ ಸ್ಥಳೀಯ ಪಂಚಾಯಿತಿ ಕಾರ್ಯಶೈಲಿಯ ಜತೆ ಮೇಲುಸ್ತುವಾರಿ ನೋಡುವ ಜಿಲ್ಲಾ ಪಂಚಾಯಿತಿಯ ನಡೆಯೆಡೆಗೂ ಸಂಶಯ ವ್ಯಕ್ತವಾಗುತ್ತಿದೆ ಎಂಬುದು ಶೌಚಗೃಹಕ್ಕೆ ಅರ್ಜಿ ಸಲ್ಲಿಸಿದ ಹಲವು ಫಲಾನುಭವಿಗಳ ಮಾತಾಗಿದೆ.