ಶುಂಠಿಗೆ ಹಳದಿ ಕೊಳೆ ರೋಗ

ಶಿರಸಿ: ನಿರಂತರವಾಗಿ ಸುರಿಯುತ್ತಿರುವ ಮಳೆಯ ಕಾರಣ ಶುಂಠಿ ಬೆಳೆಗೆ ಹಳದಿ ಕೊಳೆರೋಗ ತಗುಲಿದೆ. ಇದರಿಂದ ಉತ್ತಮ ಬೆಳೆಯ ನಿರೀಕ್ಷೆಯಲ್ಲಿದ್ದ ಬೆಳೆಗಾರರು ಆತಂಕಗೊಂಡಿದ್ದಾರೆ.

ಕಳೆದ ಕೃಷಿ ಹಂಗಾಮಿನಲ್ಲಿ ಶುಂಠಿಗೆ ಉತ್ತಮ ಬೆಲೆ ಬಂದ ಕಾರಣ ಅರೆ ಬನವಾಸಿ ಹೋಬಳಿಯಾದ್ಯಂತ 650 ಎಕರೆಗೂ ಹೆಚ್ಚು ಕ್ಷೇತ್ರದಲ್ಲಿ ಸಾವಿರಾರು ರೈತರು ಶುಂಠಿಯನ್ನು ಹೆಚ್ಚಾಗಿ ನಾಟಿ ಮಾಡಿದ್ದಾರೆ. ಆರಂಭದಲ್ಲಿ ಉತ್ತಮ ಮಳೆಯಾಗಿ ನಾಟಿ ಮಾಡಿದ ಶುಂಠಿ ಬೆಳೆ ಸಮೃದ್ಧವಾಗಿ ಬೆಳೆದಿತ್ತು. ಹೀಗಾಗಿ, ಬೆಳೆಗಾರರು ಈ ಬಾರಿ ಉತ್ತಮ ಇಳುವರಿ ನಿರೀಕ್ಷೆಯಲ್ಲಿದ್ದರು. ಆದರೆ, ವಾರದಿಂದ ಬಿದ್ದ ನಿರಂತರ ಮಳೆಯಿಂದ ಶುಂಠಿ ಬೆಳೆದ ಜಮೀನಿನಲ್ಲಿ ನೀರು ನಿಂತು ಹಳದಿ ಕೊಳೆರೋಗ ವ್ಯಾಪಕವಾಗಿ ಹರಡುತ್ತಿದೆ. ಮಳೆ ಹೆಚ್ಚಾದ ಕಾರಣ ಬ್ಯಾಕ್ಟಿರಿಯಲ್ ವಿಲ್ಟ್, ಪಿಜೋರಿಯಂ ವಿಲ್ಟ್ ಎಂಬ ಕೀಟಾಣುಗಳ ದಾಳಿಯಿಂದ ಬೆಳೆ ಕೊಳೆಯಲು ಆರಂಭಿಸಿದೆ.

ಬನವಾಸಿ, ಅಂಗಡಿ, ಸಂತೊಳ್ಳಿ, ವದ್ದಲ, ಕಾಳಂಗಿ, ಮಧುರವಳ್ಳಿ ಸೇರಿ ಹೋಬಳಿಯ ಬಹುತೇಕ ಕಡೆ ಶುಂಠಿ ಬೆಳೆ ಕೊಳೆ ರೋಗಕ್ಕೆ ತುತ್ತಾಗಿದೆ. ಹಂತ ಹಂತವಾಗಿ ಇಡೀ ಬೆಳೆಯನ್ನು ಈ ರೋಗ ಆಕ್ರಮಿಸುತ್ತಿರುವುದು ಬೆಳೆಗಾರರನ್ನು ಹೈರಾಣಾಗಿಸಿದೆ.

ಕೀಟನಾಶಕ ದುಬಾರಿ: ಶುಂಠಿಗೆ ತಗುಲಿರುವ ಕೊಳೆ ರೋಗಕ್ಕೆ ಸ್ಥಳೀಯವಾಗಿ ಕ್ವಿನಾಲ್ ಫಾಸ್ಟ್, ಮಾನೋಕ್ಟೇರಿ ಫಾಸ್ಟ್​ಲಿಂಡನ್ ಕೀಟನಾಶಕ ಸಿಂಪಡಿಸಲಾಗುತ್ತಿದೆ. ಇದರ ಬೆಲೆ ದುಬಾರಿ ಕೂಡ. ಆದರೆ, ಮಳೆ ಬಿಡುವು ನೀಡದೆ ಸುರಿಯುತ್ತಿರುವ ಕಾರಣ ಕೀಟನಾಶಕ ಸಿಂಪಡಿಸಿದರೂ ರೋಗ ನಿಯಂತ್ರಣಕ್ಕೆ ಬರುತ್ತಿಲ್ಲ ಎಂದು ಬೆಳೆಗಾರರು ಅಸಹಾಯಕತೆ ವ್ಯಕ್ತಪಡಿಸುತ್ತಿದ್ದಾರೆ. ಒಂದು ಶುಂಠಿ ಗಿಡಕ್ಕೆ ಕೊಳೆ ರೋಗ ಬಂದರೆ ಅದು ಇಡೀ ಗದ್ದೆಯನ್ನೇ ಆಕ್ರಮಿಸುತ್ತದೆ. ಕೊಳೆ ರೋಗದಿಂದ ಶುಂಠಿಯ ಇಳುವರಿ ಕಡಿಮೆಯಾಗುತ್ತದೆ. ಅಲ್ಲದೆ, ಶುಂಠಿಯ ಗಡ್ಡೆಗಳು ಬೆಳವಣಿಗೆ ಆಗುವುದಿಲ್ಲ. ಇದರಿಂದಾಗಿ ಸಾಲ ಮಾಡಿ ಶುಂಠಿ ಮಾಡಿದ ರೈತರು ದಿಕ್ಕು ತೋಚದಂತಾಗಿದ್ದಾರೆ.