ವರದೆಯ ಮರಳು: ಪೂರ್ವ ಭಾಗದ ಹಳ್ಳಿಗರ ಜೀವನದಿಯಾದ ವರದಾ ಅವಧಿಗೂ ಮುನ್ನವೇ ಬತ್ತತೊಡಗಿದೆ. ಜತೆಗೆ ನೂರಾರು ಪಂಪ್ಸೆಟ್ಗಳು ನದಿಯ ಎರಡೂ ತಟಗಳಲ್ಲಿ ಕಾಣುತ್ತಿದ್ದು, ಇನ್ನಷ್ಟು ನೀರು ಕಡಿಮೆಯಾಗಲು ಕಾರಣವಾಗಿವೆ. ಅನಾನಸ್, ಅಡಕೆ, ಬಾಳೆ ಸೇರಿ ಬೇಸಿಗೆ ಬೆಳೆ ಬೆಳೆಯಲು ವಿದ್ಯುತ್ ಇರುವಷ್ಟು ಸಮಯದ ನಿರಂತರ ನೀರೆತ್ತುವ ಕ್ರಮದಿಂದ ಅವಧಿಗೂ ಮುನ್ನ ನೀರು ಬತ್ತಿದೆ. ಇದರಿಂದ ಬನವಾಸಿ ನವಗ್ರಾಮ ಸೇರಿ ಹಲವು ಭಾಗದಲ್ಲಿ ಕುಡಿಯಲು ಶುದ್ಧ ನೀರಿನ ಸಮಸ್ಯೆ ಕಾಡತೊಡಗಿದೆ. ನದಿಗೆ ಎದುರಾದ ಪರಿಸ್ಥಿತಿಯನ್ನೇ ಬಂಡವಾಳ ಮಾಡಿಕೊಂಡ ಮರಳು ಮಾಫಿಯಾದವರೂ ಕೂಡ ನದಿಯೊಡಲು ಬಗೆದು ಮರಳನ್ನು ಕೊಂಡೊಯ್ಯುತ್ತಿದ್ದಾರೆ ಎಂಬುದು ಬನವಾಸಿಗರ ದೂರಾಗಿದೆ.
