ಪಾತಪಾಳ್ಯ: ರಾಚವಾರಪಲ್ಲಿ ಸರ್ಕಾರಿ ಪ್ರಾಥಮಿಕ ಶಾಲೆಯಲ್ಲಿ ಹಲವು ವರ್ಷಗಳ ಹಿಂದೆ ನಿರ್ಮಿಸಿರುವ ಕಾಂಪೌಂಡ್ ಶಿಥಿಲಗೊಂಡಿದ್ದು, ದುರಸ್ತಿಗೊಳಿಸಬೇಕು ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ.
ಸೋಮನಾಥಪುರ ಗ್ರಾಪಂ ವ್ಯಾಪ್ತಿಯ ರಾಚವಾರಪಲ್ಲಿ ಸರ್ಕಾರಿ ಪ್ರಾಥಮಿಕ ಶಾಲೆ ಆವರಣದಲ್ಲಿ ಎರಡು ಕೊಠಡಿ, ಅಪೂರ್ಣವಾದ ಕಟ್ಟಡ, ಅಂಗನವಾಡಿ ಕೇಂದ್ರ ಇದೆ. ಶಾಲೆಯಲ್ಲಿ 32 ಮಕ್ಕಳು ವ್ಯಾಸಂಗ ಮಾಡುತ್ತಿದ್ದಾರೆ. ಅಂಗನವಾಡಿ ಕೇಂದ್ರಕ್ಕೆ 15ಕ್ಕೂ ಹೆಚ್ಚು ಮಕ್ಕಳು ಬರುತ್ತಾರೆ. ಶಾಲಾ ಆವರಣದಲ್ಲಿ 30 ವರ್ಷಗಳ ಹಿಂದೆ ಜಿಲ್ಲಾ ಪಂಚಾಯತಿ ಅನುದಾನದಲ್ಲಿ ಅಪೂರ್ಣಗೊಂಡ ಕಟ್ಟಡ ಇದ್ದು, ಪ್ರಯೋಜನಕ್ಕೆ ಬಾರದಂತಿದೆ.
ದುರಸ್ತಿ ಶೀಘ್ರಗತಿಯಲ್ಲಾಗಲಿ: ರಸ್ತೆ ಪಕ್ಕದಲ್ಲಿಯೇ ಇರುವ ಶಾಲೆಯ ಕಾಂಪೌಂಡ್ ಶಿಥಿಲಗೊಂಡಿರುವುದಲ್ಲದೆ, ಗೇಟ್ ಸಹ ಇರುವುದಿಲ್ಲ. ಮಳೆ ಬಂದರೆ ನೀರೆಲ್ಲ ಶಾಲಾ ಆವರಣದಲ್ಲಿ ಸಂಗ್ರಹವಾಗುತ್ತದೆ. ಮಕ್ಕಳು ವಿಧಿ ಇಲ್ಲದೆ ಇದರೊಳಗೆ ಓಡಾಡಬೇಕು. ಶಾಲೆಯ ರಜಾದಿನಗಳಲ್ಲಿ ಜಾನುವಾರುಗಳ ತಾಣವಾಗಿ ಮಾರ್ಪಡುತ್ತದೆ. ಇಲ್ಲಿ ಗೇಟ್ ಇಲ್ಲದೆ ಇರುವುದರಿಂದ ಶಾಲೆ ಬಿಟ್ಟ ತಕ್ಷಣ ಮಕ್ಕಳು ರಸ್ತೆಗೆ ಓಡುತ್ತಾರೆ. ವಾಹನಗಳು ಅಡ್ಡಾದಿಡ್ಡಿಯಾಗಿ ಇಲ್ಲಿ ಸಂಚರಿಸುತ್ತವೆ. ಇದರಿಂದ ಅಪಘಾತದ ಸಂಭಾವ್ಯತೆ ಹೆಚ್ಚಿದೆ. ಹೀಗಾಗಿ ಶಿಥಿಲಾವಸ್ಥೆ ತಲುಪಿರುವ ಕಾಂಪೌಂಡ್ ದುರಸ್ತಿಗೊಳಿಸಿ ಗೇಟ್ ಅಳವಡಿಸಬೇಕು. ಸಂಭವಿಸಬಹುದಾದ ಅವಘಡಗಳಿಗೆ ಬ್ರೇಕ್ ಹಾಕುವ ಕೆಲಸ ತಕ್ಷಣವೇ ನಡೆಯಬೇಕಿದೆ. ಇನ್ನೇನು ಶಾಲೆ ಆರಂಭವಾಗುತ್ತಿರುವುದರಿಂದ ಶಾಲಾ ಕೊಠಡಿ ಮತ್ತು ಆವರಣಗಳ ಭದ್ರತೆ ಅವಶ್ಯವಿದೆ. ಹೀಗಾಗಿ ತಕ್ಷಣವೇ ಕಾಂಪೌಂಡ್ ನವೀಕರಣಗೊಳಿಸಬೇಕು. ಶಾಲೆ ಆವರಣದಲ್ಲಿ ಮಳೆ ನೀರು ಸಂಗ್ರಹವಾಗದಂತೆ ಚರಂಡಿ ನಿರ್ಮಿಸಬೇಕು ಎಂದು ಗ್ರಾಪಂ ಮಾಜಿ ಅಧ್ಯಕ್ಷ ಎಂ.ಸಿ.ಕೃಷ್ಣಾರೆಡ್ಡಿ, ಎಸ್ಡಿಎಂಸಿ ಅಧ್ಯಕ್ಷ ರಾಮಾಂಜಿ, ಮುಖಂಡರಾದ ಖದ್ರಿಪತಿ ನಾಯಕ, ಬಿ.ವಿ. ಶ್ರೀನಿವಾಸ, ರಾಮಯ್ಯ, ವೆಂಕಟರವಣ ಆಗ್ರಹಿಸಿದ್ದಾರೆ.
