5 ಲಕ್ಷಕ್ಕೂ ಅಧಿಕ ಕಟ್ಟು ವಹಿವಾಟು: ಹೊನ್ನಾವರ ತಾಲೂಕಿನಲ್ಲಿ ಅಂದಾಜು 200 ಹೆಕ್ಟೇರ್ ಭೂಮಿಯಲ್ಲಿ ವೀಳ್ಯದೆಲೆ ಬೆಳೆಯಲಾಗುತ್ತದೆ. ತಾಲೂಕಿನ ಹೊಸಾಕುಳಿ, ಸಾಲಕೋಡ, ಮುಗ್ವಾ, ಖರ್ವಾ, ಕಡತೋಕ, ಕಡ್ಲೆ, ನಗರಬಸ್ತಿಕೇರಿ, ಹೆರಂಗಡಿ, ಚಂದಾವರ ಸೇರಿ ಇನ್ನೂ ಹಲವು ಭಾಗಗಳಲ್ಲಿ ರೈತರು ವೀಳ್ಯದೆಲೆ ಬೆಳೆಗೆ ಹೆಚ್ಚಿನ ಒತ್ತು ನೀಡುತ್ತಿದ್ದಾರೆ. ವಾರ್ಷಿಕವಾಗಿ ತಾಲೂಕಿನಿಂದ ಅಂದಾಜು 5,55,300 ಕಟ್ಟು (1 ಕಟ್ಟು =100 ಎಲೆ) ರಫ್ತಾಗುತ್ತದೆ. ಹೈದರಾಬಾದ್, ಭೋಪಾಲ್, ಗೋವಾ, ಲಖನೌಗಳಿಗೂ ಇಲ್ಲಿನ ವೀಳ್ಯದೆಲೆ ರಫ್ತಾಗುತ್ತದೆ. ರಾಜ್ಯದ ರಾಣೆಬೆನ್ನೂರು, ಸವಣೂರು, ಸಾಗರ, ಶಿವಮೊಗ್ಗ ಮಾರುಕಟ್ಟೆಗೆ ವರ್ಷದ ಎಲ್ಲ ದಿನವೂ ವೀಳ್ಯದೆಲೆ ಸಾಗಿಸಲಾಗುತ್ತದೆ. ಬೆಳೆಗಾರರು, ಕೊಯ್ಲು ಮಾಡುವವರು, ಸಾಗಾಣಿಕೆ ಮಾಡುವವರು, ವ್ಯಾಪಾರಿಗಳು ಸೇರಿ 1200ಕ್ಕೂ ಅಧಿಕ ನೇರ ಅವಲಂಬಿತರು ತಾಲೂಕಿನಲ್ಲಿದ್ದಾರೆ.
