ಈ ಸಂದರ್ಭದಲ್ಲಿ ಚಿತ್ತರಗಿ ಕುಮಾರ ವಿಜಯ ನಾಟ್ಯ ಸಂಘದ ಮಾಲೀಕರಾದ ಗಂಗಾಧರ ಶಾಸ್ತ್ರಿಗಳು ದಿನಕ್ಕೆ ೫೦೦ ರೂ. ದಂತೆ ಸಂಭಾವನೆ ನಿಗಧಿ ಪಡಿಸಿ ೫೦ ಸಾವಿರ ರೂ. ಇಡು ಗಂಟು ನೀಡಿ ೧೬೦ ನಾಟಕಗಳ ಒಪ್ಪಂದ ಮಾಡಿಕೊಂಡಿದ್ದರು. ಇದರಿಂದ ೧೯೬೦-೭೦ ದಶಕದಲ್ಲಿ ಕುಮಾರ ವಿಜಯ ನಾಟ್ಯ ಸಂಘದಿಂದ ಧಾರವಾಡ, ಹುಬ್ಬಳ್ಳಿ, ಬಾಗಲಕೋಟೆ, ವಿಜಯಪುರ ಸೇರಿದಂತೆ ಉತ್ತರ ಕರ್ನಾಟಕ ಭಾಗದಲ್ಲಿ ನಿರಂತರವಾಗಿ ನಡೆಯುತ್ತಿದ್ದ ಜೀವನ ಯಾತ್ರೆ, ಹೂವಿನ ಅಂಗಡಿ, ಜಗ ಜ್ಯೋತಿ ಬಸವೇಶ್ವರ, ಜೀವನ ಜ್ಯೋತಿ ಬಸವೇಶ್ವರ ವಿವಿಧ ನಾಟಕಗಳಲ್ಲಿ ಲೀಲಾವತಿ ಅತಿಥಿ ಹಾಗೂ ಪ್ರಮುಖ ಪಾತ್ರಗಳಿಗೆ ಬಣ್ಣ ಹಚ್ಚಿಸಿದ್ದರು. ಇದರಿಂದ ಸಿನೆಮಾಗಳು ಅಬ್ಬರಿಸುತ್ತಿದ್ದ ಕಾಲದಲ್ಲಿ ಸೊರಗಿದ್ದ ನಾಟಕ ಕಂಪನಿಗಳು ಲೀಲಾವತಿ ಅವರ ಆಗಮನದಿಂದ ಪ್ರೇಕ್ಷಕರ ಗ್ಯಾಲರಿ ತುಂಬಿ ತುಳುಕಿತ್ತು. ಕಂಪನಿಗಳಿಗೂ ಆರ್ಥಿಕ ಭದ್ರತೆ ಒದಗಿಸಿತ್ತು.
