ದುರಸ್ತಿ, ನವೀಕರಣ: ಲೋಕೋಪಯೋಗಿ ಇಲಾಖೆಯು 20 ಲಕ್ಷ ರೂ. ವೆಚ್ಚದಲ್ಲಿ ದುಸಗಿ ಸೇತುವೆ ದುರಸ್ತಿ ಕಾರ್ಯ ಕೈಗೊಂಡಿದೆ. 5 ಕೋಟಿ ರೂ. ವೆಚ್ಚದಲ್ಲಿ ತೇರಗಾಂವದಿಂದ ಕೆಸರೊಳ್ಳಿವರೆಗೆ ಹಾಳಾಗಿರುವ ರಾಷ್ಟ್ರೀಯ ಹೆದ್ದಾರಿಯ ಡಾಂಬರೀಕರಣ ಕಾಮಗಾರಿ ಆರಂಭಗೊಂಡಿತ್ತು. ಇಂಜಿನಿಯರಿಂಗ್ ಕಾಲೇಜ್ನಿಂದ ಕೆಸರೊಳ್ಳಿ ಕ್ರಾಸ್ವರೆಗೆ ರಸ್ತೆ ಡಾಂಬರೀಕರಣ ಕಾರ್ಯ ಮುಗಿದಿದೆ. ತೇರಗಾಂವದಿಂದ ಗುತ್ತಿಗೆರೆ ಕೆರೆಯವರೆಗಿನ ಡಾಂಬರೀಕರಣ ಕಾರ್ಯ ಲಾಕ್ಡೌನ್ದಿಂದ ನಿಂತು ಹೋಗಿದೆ. ರಾಜ್ಯ ಆಯವ್ಯಯದಲ್ಲಿ 50 ಲಕ್ಷ ರೂ. ಅನುದಾನದಲ್ಲಿ ಜನಗಾ ಸೇತುವೆ ನಿರ್ಮಾಣ ಕಾರ್ಯ ಆರಂಭಗೊಂಡಿದ್ದು, ಸಾರ್ವಜನಿಕರ ಸಂಚಾರಕ್ಕಾಗಿ ಪಕ್ಕದ ಹೊಲದಿಂದ ತಾತ್ಕಾಲಿಕ ರಸ್ತೆಯ ವ್ಯವಸ್ಥೆ ಮಾಡಲಾಗಿದೆ. ಅಮ್ಮನಕೊಪ್ಪ ಸೇತುವೆ ಸಂಪೂರ್ಣ ಶಿಥಿಲಗೊಂಡಿದ್ದರಿಂದ ನಬಾರ್ಡ್ ಯೋಜನೆಯಡಿ 50 ಲಕ್ಷ ರೂ. ವೆಚ್ಚದಲ್ಲಿ ನೂತನ ಸೇತುವೆ ಕಾಮಗಾರಿ ಆರಂಭಗೊಂಡಿದ್ದು, ಜನಗಾ ಮತ್ತು ಅಮ್ಮನಕೊಪ್ಪ ಸೇತುವೆಯ ಸ್ಲಾ್ಯಬ್ ಕಾಮಗಾರಿ ನಡೆಯಬೇಕಿದೆ. ಲಾಕ್ಡೌನ್ದಿಂದ ದಿನಗೂಲಿಗಳಾಗಲಿ, ರಸ್ತೆ, ಸೇತುವೆ ನಿರ್ಮಾಣ ಸಾಮಗ್ರಿಗಳು ದೊರೆಯುವ ಸಾಧ್ಯತೆಗಳು ಕಡಿಮೆಯಾಗಿವೆ. ಮಳೆಗಾಲಕ್ಕೂ ಪೂರ್ವ ರಸ್ತೆ ಮತ್ತು ಸೇತುವೆಗಳ ಹಾಗೂ ಇನ್ನಿತರ ಅವಶ್ಯಕ ಕಾಮಗಾರಿ ಪೂರ್ಣಗೊಳಿಸಲು ಮುಂದಾಗಿರುವ ಶಾಸಕ ಆರ್.ವಿ. ದೇಶಪಾಂಡೆ ಶುಕ್ರವಾರ ಅಧಿಕಾರಿಗಳ ಸಭೆ ನಡೆಸಿ, ಜಿಲ್ಲಾಧಿಕಾರಿಗಳಿಗೆ ಪ್ರಸ್ತಾವನೆ ಕಳಿಸಲು ತಿಳಿಸಿದ್ದಾರೆ.
