ಪಾಸ್ಗೆ ವಿಳಂಬ: ಲಾಕ್ಡೌನ್ ಮುಂದುವರಿಯುವ ಲಕ್ಷಣದ ಹಿನ್ನೆಲೆಯಲ್ಲಿ ಜಿಲ್ಲಾಡಳಿತಕ್ಕೆ ಪಾಸ್ಗಾಗಿ ಭಾರಿ ಒತ್ತಡ ಬರುತ್ತಿದೆ. ಜಿಲ್ಲೆಯಿಂದ ಹೊರ ಹೋಗಲು, ಜಿಲ್ಲೆಯೊಳಗೆ ವಿವಿಧ ಸ್ಥಳಗಳಿಗೆ ಓಡಾಡಲು ಪಾಸ್ ಬೇಕು ಎಂದು ಕೇಳಿಕೊಂಡು ಕಚೇರಿಗೆ ಬರುವವರ ಸಂಖ್ಯೆ ಹೆಚ್ಚಿದ್ದು, ಅಧಿಕಾರಿಗಳಿಗೆ ತಲೆನೋವಾಗಿ ಪರಿಣಮಿಸಿದೆ. ವಶೀಲಿ, ಒತ್ತಡದ ನಡುವೆ ಗಂಭೀರ ಸಮಸ್ಯೆ ಇದ್ದವರಿಗೂ ಪಾಸ್ ನೀಡಲು ವಿಳಂಬ ಉಂಟಾಗುತ್ತಿದೆ. ಪಾಸ್ ನೀಡುವ ವ್ಯವಸ್ಥೆ ಇಷ್ಟು ದಿನ ತಹಸೀಲ್ದಾರ್, ಉಪವಿಭಾಗಾಧಿಕಾರಿ ಹಾಗೂ ಅಪರ ಜಿಲ್ಲಾಧಿಕಾರಿ ಹಂತದಲ್ಲಿತ್ತು. ಈಗ ಅದನ್ನು ಪೊಲೀಸ್ ಇಲಾಖೆಗೆ ವರ್ಗಾಯಿಸಲಾಗಿದೆ. ತುರ್ತು ಆರೋಗ್ಯ ಸಮಸ್ಯೆ, ಶವ ಸಾಗಣೆ ಮುಂತಾದ ಕಾರ್ಯಕ್ಕಾಗಿ ಅರ್ಜಿ ಸಲ್ಲಿಸಿದರೂ ಅನುಮತಿ ನೀಡಲು ಒಂದೆರಡು ದಿನ ಕಳೆಯುತ್ತಿದೆ ಎಂದು ಹಲವರು ಅಳಲು ತೋಡಿಕೊಂಡಿದ್ದಾರೆ.
