ಕರೊನಾ ಹಾವಳಿಗೆ ಇಡೀ ಜಗತ್ತು ಬೆಚ್ಚಿಬಿದ್ದಿದೆ. ಇಡೀ ವ್ಯವಸ್ಥೆ ಕಂಗಾಲಾಗಿದೆ. ವರ್ಷಪೂರ್ತಿ ಶಾಲೆ, ಪುಸ್ತಕ, ಹೋಂ ವರ್ಕ್ ಪ್ರಜೆಕ್ಟ್, ಟೆಸ್ಟ್, ಎಕ್ಸಾಂ ಎಂದು ಹೈರಾಣಾಗುತ್ತಿದ್ದ ಮಕ್ಕಳು ಬೇಸಿಗೆ ರಜೆ ಸಂಭ್ರಮವನ್ನು ಕಸಿದಿದೆ. ಈ ಮಹಾಮಾರಿ ಯಾವಾಗ ತೊಲಗುತ್ತದೆಂದು ಇಡೀ ಜಗತ್ತು ಕಾತರವಾಗಿದೆ. ಈ ನಡುವೆ ಈ ವರ್ಷ ಹೊಸ ಶಾಲೆಗಳು ಆರಂಭವಾಗುತ್ತಿಲ್ಲ ಎಂಬುದು ಗಮನಾರ್ಹ ಸಂಗತಿ. ಕರೊನಾದಿಂದ ಈ ವರ್ಷ ಶಾಲಾ-ಕಾಲೇಜು ಆರಂಭಕ್ಕೆ ಹೊಡೆತ ಬಿದ್ದಿದೆ. ಪದವಿಪೂರ್ವ ಶಿಕ್ಷಣ ಇಲಾಖೆಯು ಈ ವರ್ಷ ಹೊಸ ಕಾಲೇಜುಗಳ ಆರಂಭಕ್ಕೆ ಅರ್ಜಿ ಆಹ್ವಾನಿಸುವ ಗೋಜಿಗೆ ಹೋಗಿಲ್ಲ. ಸಾರ್ವಜನಿಕ ಶಿಕ್ಷಣ ಇಲಾಖೆ ಹೊಸ ಶಾಲೆ ಆರಂಭಕ್ಕೆ ಅರ್ಜಿ ಅಹ್ವಾನಿಸಿ ವರದಿ ಪಡೆದಿದೆಯೇ ಹೊರತು ಇನ್ನೂ ಅರ್ಜಿಗಳ ಇತ್ಯರ್ಥ ಮಾಡಿಲ್ಲ. 2020-21ನೇ ಸಾಲಿನ ಶೈಕ್ಷಣಿಕ ವರ್ಷವೇ ತಲೆಕೆಳಗಾಗಿರುವುದರಿಂದ ಯಾರಿಗೂ ಯಾವ ತಿಂಗಳಿನಿಂದ ಶಾಲಾ-ಕಾಲೇಜು ಆರಂಭವಾಗಲಿದೆ ಎಂಬ ಕನಿಷ್ಠ ಅರಿವು ಇಲ್ಲದಿರುವುದರಿಂದ ಈ ವರ್ಷ ಒಂದು ವೇಳೆ ಶಾಲೆಗಳ ಆರಂಭಕ್ಕೆ ಮಾನ್ಯತೆ ಸಿಕ್ಕರೂ ನಷ್ಟವೇ ಹೆಚ್ಚು.
