ಬಿಳಿಗಿರಿರಂಗನಾಥ ಸ್ವಾಮಿ ದೇಗುಲದ ಬಾಬ್ತುಗಳ ಹರಾಜು

ಯಳಂದೂರು: ತಾಲೂಕಿನ ಬಿಳಿಗಿರಿರಂಗನ ಬೆಟ್ಟದಲ್ಲಿ ಇತ್ತೀಚೆಗೆ ಬಿಳಿಗಿರಿರಂಗನಾಥ ಸ್ವಾಮಿ ದೇಗುಲದ ವಿವಿಧ ಬಾಬ್ತುಗಳ ಹರಾಜು ಪ್ರಕ್ರಿಯೆಯು ವ್ಯವಸ್ಥಾಪನಾ ಸಮಿತಿ ಹಾಗೂ ದೇಗುಲದ ಆಡಳಿತ ಮಂಡಳಿ ನೇತೃತ್ವದಲ್ಲಿ ಬೆಟ್ಟದ ಬಿಳಿಗಿರಿ ಭನದಲ್ಲಿ ನಡೆಯಿತು.

ಲಾಡು ಪ್ರಸಾದ ಮಾರಾಟ ಹಕ್ಕು, ಕಲ್ಲು ಸಕ್ಕರೆ ಕೊಬ್ಬರಿ ಪ್ರಸಾದ, ದೇವರ ಫೋಟೋ ಮಾರಾಟ ಹಕ್ಕು, ವಾಹನ ಪ್ರವೇಶ ಶುಲ್ಕ, ನೆಲಸುಂಕ ವಸೂಲಾತಿ, ಹಕರೆ ಮುಡಿ ಹಕ್ಕು, ಕ್ಷಣಮಾತ್ರದಲ್ಲಿ ಛಾಯಾಚಿತ್ರ ತೆಗೆಯುವ ಹಕ್ಕು ಮತ್ತು ಪಾದರಕ್ಷೆ ಸಂರಕ್ಷಣೆ ಹಕ್ಕುಗಳಿಗೆ ಹರಾಜು ನಡೆಯಿತು. ಇದರಲ್ಲಿ ಪಾದರಕ್ಷೆ ಸಂರಕ್ಷಣೆಗೆ ಯಾರೂ ಹರಾಜಿನಲ್ಲಿ ಭಾಗವಹಿಸದಿರುವುದರಿಂದ ಇದನ್ನು ಹೊರತುಪಡಿಸಿ ಇತರ ಬಾಬ್ತುಗಳನ್ನು ಹರಾಜು ಮಾಡಲಾಯಿತು. ಒಟ್ಟು 29.29 ಲಕ್ಷ ರೂ.ಗಳಿಗೆ ಹರಾಜು ಮಾಡಲಾಯಿತು.

ಶ್ರೀ ಬಿಳಿಗಿರಿರಂಗನಾಥ ಸ್ವಾಮಿ ದೇಗುಲದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಜೆ.ಶ್ರೀನಿವಾಸ್ ಮಾತನಾಡಿ, ಈ ಹಿಂದೆ ಅನೇಕ ಟೆಂಡರ್‌ದಾರರು ಬಿಡ್ ಮಾಡಿದ ಬಾಕಿ ಮೊತ್ತವನ್ನು ಪಾವತಿಸಿಲ್ಲ ಎಂಬ ದೂರಿದೆ. ಅಂತಹವರಿಂದ ಬಾಕಿ ಮೊತ್ತವನ್ನು ವಸೂಲಿ ಮಾಡಲು ಕ್ರಮ ವಹಿಸಬೇಕು. ಈಗ ಭಾಗವಹಿಸಿ ಟೆಂಡರ್ ತಮ್ಮದಾಗಿಸಿಕೊಂಡಿರುವ ಬಿಡ್‌ದಾರರು ಮೂರು ತಿಂಗಳೊಳಗೆ ಟೆಂಡರ್‌ನ ಪೂರ್ಣ ಮೊತ್ತವನ್ನು ಕಟ್ಟಬೇಕು. ಇಲ್ಲವಾದಲ್ಲಿ ಈ ಟೆಂಡರ್ ರದ್ದುಪಡಿಸಿ ಮತ್ತೆ ಹೊಸ ಟೆಂಡರ್ ಮಾಡಲಾಗುವುದು. ಈ ಬಗ್ಗೆ ಸಂಬಂಧಪಟ್ಟ ದೇಗುಲದ ಅಧಿಕಾರಿ ಹಾಗೂ ನೌಕರ ವರ್ಗ ಎಲ್ಲರಿಗೂ ಮಾಹಿತಿ ನೀಡಿ ದೇಗುಲಕ್ಕೆ ಆದಾಯ ಬರುವಂತೆ ನೋಡಿಕೊಳ್ಳಬೇಕು ಎಂದು ಸಲಹೆ ನೀಡಿದರು.

ದೇಗುಲದ ಕಾರ್ಯನಿರ್ವಾಹಕ ಅಧಿಕಾರಿ ಮೋಹನ್‌ಕುಮಾರ್, ವ್ಯವಸ್ಥಾಪನಾ ಸಮಿತಿ ಸದಸ್ಯರಾದ ಗುಂಬಳ್ಳಿ ರಾಜಣ್ಣ, ಕೇತಮ್ಮ, ಸ್ಫೂರ್ತಿ, ವೆಂಕಟರಾಮು, ಸಿದ್ದರಾಜು, ಸುರೇಶ್, ನಾರಾಯಣಸ್ವಾಮಿ, ಪಾರುಪತ್ತೇದಾರ ರಾಜು, ಶೇಷಾದ್ರಿ, ಬಿಡ್‌ದಾರರು ಇದ್ದರು.