ಫಾಸ್ಟ್ಯಾಗ್​ಗಿಲ್ಲ ರಿಯಾಯಿತಿ

ಭಟ್ಕಳ: ಫಾಸ್ಟ್ಯಾಗ್ ಹಾಕಿಕೊಂಡ ವಾಹನ ಮಾಲೀಕರಿಂದ ಕುಮಟಾ ಟೋಲ್​ಗೇಟ್​ಗಳಲ್ಲಿ ರಿಯಾಯಿತಿ ನೀಡದೆ, ಹೆಚ್ಚಿನ ಹಣ ವಸೂಲಿ ಮಾಡಲಾಗುತ್ತಿದೆ ಎನ್ನುವ ಆರೋಪ ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿದೆ. ಈ ಕುರಿತು ಕುಮಟಾ ಉಪವಿಭಾಗಾಧಿಕಾರಿ ಬಳಿ ಹಲವರು ದೂರು ನೀಡಿದ್ದಾರೆ.

ಉತ್ತರ ಕನ್ನಡ ಜಿಲ್ಲೆಯ ಕುಮಟಾದ ಹಳದೀಪುರದ ಬಳಿಯ ಹೊಳೆಗದ್ದೆ ಟೋಲ್​ಗೇಟ್ ಒಂದಲ್ಲ ಒಂದು ರೀತಿಯಲ್ಲಿ ಸುದ್ದಿ ಮಾಡುತ್ತಿದೆ. ಅಲ್ಲಿ ಆಗಾಗ ಪ್ರತಿಭಟನೆಗಳು ನಡೆಯುವುದು ಸಾಮಾನ್ಯ ಎನ್ನುವಂತಾಗಿದೆ. ಇತ್ತೀಚೆಗೆ ನಡೆಸಲಾದ ಪ್ರತಿಭಟನೆಯಲ್ಲಿ ಕುಮಟಾ ಶಾಸಕರು ಎಚ್ಚರಿಕೆ ನೀಡಿದ ಬಳಿಕ ಕುಮಟಾ ಮತ್ತು ಹೊನ್ನಾವರದ ವಾಹನ ಸವಾರರಿಗೆ ಟೋಲ್ ಗೇಟ್​ನಲ್ಲಿ ವಿನಾಯಿತಿ ನೀಡಲಾಗಿತ್ತು. ಕೆಎ 47 ನೋಂದಣಿ ಹೊಂದಿರುವ ವಾಹನಗಳಿಗೆ ಟೋಲ್ ಶುಲ್ಕದಲ್ಲಿ ರಿಯಾಯಿತಿ ಕಲ್ಪಿಸಲಾಗಿದೆ. ಆದರೆ, ಫಾಸ್ಟ್ಯಾಗ್ ಹೊಂದಿದ ಭಟ್ಕಳದ ಉದ್ಯಮಿಯೊಬ್ಬರಿಗೆ 75 ರೂ.ಗಳಂತೆ ಹಣ ಕಟ್ ಆಗಿದೆ. ಭಟ್ಕಳದ ಹಲವರಿಗೂ ಇದೇ ರೀತಿಯಾಗಿದೆ.

ಅಲ್ಲಿನ ಐಆರ್​ಬಿ ಅಧಿಕಾರಿಗಳಿಗೆ ಕೇಳಿದರೆ ಹಾರಿಕೆ ಉತ್ತರ ನೀಡುತ್ತಾರೆ. ಕನಿಷ್ಠ ಸೂಚನಾ ಫಲಕವನ್ನಾದರೂ ಹಾಕಿ ಸ್ಥಳೀಯ ವಾಹನ ಸವಾರರಿಗೆ ಈ ಕುರಿತು ಮಾಹಿತಿ ನೀಡಬೇಕು ಎಂದು ಭಟ್ಕಳದ ಉದ್ಯಮಿ ಜೈರಾಮ ಶಾನಭಾಗ ಆಗ್ರಹಿಸಿದ್ದಾರೆ.