ಪಾಠ ಮಾಡುವವರು ಬ್ರಷ್ ಹಿಡಿದರು!

ರಮೇಶ ಹಾರ್ಸಿಮನೆ ಸಿದ್ದಾಪುರ

ಶಿಕ್ಷಕರು ಶಾಲೆಗೆ ಬರುತ್ತಿದ್ದಾರೆ. ಆದರೆ, ಪಾಠ ಹೇಳಿಕೊಡಲು ಮಕ್ಕಳೇ ಇಲ್ಲ. ಏಕೆಂದರೆ, ಕರೊನಾ ಹಾವಳಿ. ಮತ್ತೇನು ಮಾಡಬೇಕು? ಇಂಥ ಸಂದರ್ಭದಲ್ಲಿ, ಸಿದ್ದಾಪುರ ತಾಲೂಕಿನ ಬೇಡ್ಕಣಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಶಿಕ್ಷಕರಿಗೆ ಹೊಳೆದದ್ದು ವಿನೂತನ ಆಲೋಚನೆ. ಅದನ್ನು ತಕ್ಷಣವೇ ಕಾರ್ಯರೂಪಕ್ಕೆ ತಂದೇ ಬಿಟ್ಟಿದ್ದಾರೆ.

ಶಾಲೆಯ ಹಳೆಯ ಪೀಠೋಪಕರಣಗಳಿಗೆ ಬಣ್ಣ ಬಳಿದು ಸುಂದರಗೊಳಿಸುವ ಕೆಲಸ ಇದು!

ಶಾಲಾ ಮುಖ್ಯಾಧ್ಯಾಪಕ ಕೆ.ಪಿ.ರವಿ, ಸಹಶಿಕ್ಷಕರಾದ ಕರುಣಾ ಎಂ.ಶೇಟ್, ವಂದನಾ ಕಲಭಾಗ, ಇಂದಿರಾ ಪಾವಸ್ಕರ್, ಸಂಧ್ಯಾಬಾಯಿ ಪಿನ್ನುಮನೆ ಹಾಗೂ ಮಹಾದೇವಿ ಪಟಗಾರ ಅವರು ಶಾಲೆಯಲ್ಲಿ ಎಷ್ಟೋ ವರ್ಷಗಳಿಂದ ಇದ್ದ ತುಕ್ಕು ಹಿಡಿಯಲಾರಂಬಿಸಿದ್ದ ಕಬ್ಬಿಣದ ಡೆಸ್ಕ್, ಟೇಬಲ್, ಅಲ್ಮೇರಾಗಳಿಗೆ ಬ್ರೆಷ್ ಹಾಗೂ ರೋಲರ್​ನಿಂದ ಬಣ್ಣ ಹೊಡೆದು ಹೊಸ ರೂಪ ನೀಡಿದ್ದಾರೆ.

ಇವರೊಂದಿಗೆ ಶಾಲಾ ಅಡುಗೆ ಸಿಬ್ಬಂದಿಯಾದ ಇಂದಿರಾ ನಾಯ್ಕ, ಕುಮುದಾ ಚನ್ನಯ್ಯ, ಸುಜಾತ ನಾಯ್ಕ ಅವರೂ ಬ್ರೆಷ್ ಹಿಡಿದು ಬಣ್ಣ ಹೊಡೆದು ಶಿಕ್ಷಕರಿಗೆ ಸಹಕರಿಸಿದ್ದಾರೆ. ಕರೊನಾ ನಿಯಮಾವಳಿ ಮೀರದೆ ಎಲ್ಲರೂ ಮಾಸ್ಕ್ ಧರಿಸಿ ಪರಸ್ಪರ ಅಂತರ ಕಾಯ್ದುಕೊಳ್ಳುವುದರ ಮೂಲಕ ಕೆಲಸ ಮಾಡಿರುವುದು ವಿಶೇಷವಾಗಿದೆ.