ಭಟ್ಕಳ: ತಾಲೂಕಿನ ಕೋಣಾರದಲ್ಲಿ ಯುವಕನೊಬ್ಬ ದೂರವಾಣಿ ನೆಟ್ವರ್ಕ್ಗಾಗಿ ಮರವನ್ನೇರಿ ಸಂಪರ್ಕ ಸಾಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ನಗರದಿಂದ 8-10 ಕಿ.ಮೀ. ವ್ಯಾಪ್ತಿಯಲ್ಲಿರುವ ಕೋಣಾರದಲ್ಲಿ ಕೃಷಿ, ಜಮೀನು ಸಹಿತ ಕೂಲಿ ಕೆಲಸ ಮಾಡಿಕೊಂಡಿರುವ ಜನ ಹೆಚ್ಚು. ಸುಮಾರು 300 ರಿಂದ 400 ಮನೆಗಳಿರುವ ಈ ಪ್ರದೇಶದಲ್ಲಿ ಈವರೆಗೂ ನೆಟ್ವರ್ಕ್ ತಲುಪಿಲ್ಲ. ಡಿಜಿಟಲ್ ಇಂಡಿಯಾ ಪರಿಕಲ್ಪನೆ ಇಲ್ಲಿ ಬರಿ ಬಾಯಿ ಮಾತಿನಲ್ಲಿದೆ. ಸಂಸದ ಅನಂತಕುಮಾರ ಹೆಗಡೆ ಅವರಿಗೆ ಮನವಿ ನೀಡಿ ಬೇಸತ್ತ ಜನರು ಕೊನೆಗೆ ಶಾಸಕ ಸುನೀಲ ನಾಯ್ಕ ಅವರಿಗೆ ಮನವಿ ನೀಡಿದ್ದಾರೆ. ಟವರ್ ಸ್ಥಾಪಿಸಿ ಕೊಡುತ್ತೇನೆ ಎಂದು ಹೇಳಿ 8 ತಿಂಗಳಾದರೂ ಟವರ್ ಸ್ಥಾಪನೆ ಆಗಿಲ್ಲ. ಇದರಿಂದ ವಿದ್ಯಾರ್ಥಿಗಳು, ಉದ್ಯೋಗಿಗಳು, ತೀರಾ ಅವಶ್ಯಕತೆ ಇದ್ದವರು ಸಂಕಷ್ಟದಲ್ಲಿದ್ದಾರೆ.
ಪ್ರಸ್ತುತ ಲಾಕ್ಡೌನ್ ಕಾರಣ ವಿದ್ಯಾರ್ಥಿಗಳಿಗೆ ಆನ್ಲೈನ್ ತರಗತಿಗಳು ಪ್ರಾರಂಭವಾಗಿದೆ. ಇನ್ನು ಮಹಾನಗರಗಳಲ್ಲಿ ಉದ್ಯೋಗಕ್ಕಿದ್ದವರು ಹಳ್ಳಿಗಳಿಗೆ ಬಂದು ವರ್ಕ್ಫ್ರಮ್ ಹೋಂ ಮೂಲಕ ಕೆಲಸ ಮಾಡುತ್ತಿದ್ದಾರೆ. ಆದರೆ ಊರಲ್ಲಿ ದೂರವಾಣಿ ಕರೆ ಮಾಡಲು ಕೂಡ ಸಿಗ್ನಲ್ ಸಿಗುತ್ತಿಲ್ಲ.
ತುರ್ತು ಪರಿಸ್ಥಿತಿ, ಅನಾರೋಗ್ಯದಂಥ ಸಂದರ್ಭದಲ್ಲಿ ಯಾರಿಗಾದರೂ ಕರೆ ಮಾಡಬೇಕು ಎಂದರೆ 4 ಕಿ.ಮೀ. ದೂರ ಬರಬೇಕು. ಇತ್ತೀಚೆಗೆ ಯುವಕನೊಬ್ಬ ನೆಟ್ವರ್ಕ್ಗಾಗಿ ಆಳೆತ್ತರದ ಮರವನ್ನೇರಿ ನೆಟ್ವರ್ಕ್ ಅಂಟೆನಾ ಸಿಗ್ನಲ್ ಹಿಡಿದು ಹುಡುಕಾಟ ನಡೆಸಿ, ಲ್ಯಾಂಡ್ಲೈನ್ ಫೋನ್ಗೆ ಸಿಗ್ನಲ್ ಸಿಗುವಂತೆ ಮಾಡಿರುವ ವಿಡಿಯೋವನ್ನು ಫೇಸ್ಬುಕ್ನಲ್ಲಿ ಹರಿಬಿಟ್ಟಿದ್ದಾನೆ. ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಾಕಷ್ಟು ವೈರಲ್ ಆಗಿದೆ.
