ಶನಿವಾರ ಶ್ರೀ ಗಂಗಾದೇವತಾ ಪೂಜೆಗಳೊಂದಿಗೆ ಶ್ರೀ ಸ್ವಾಮಿಯವರ ನೂತನ ಚರಬಿಂಬವನ್ನು ರಾಜಬೀದಿಗಳಲ್ಲಿ ಮಂಗಳವಾದ್ಯದೊಂದಿಗೆ ಮೆರವಣಿಗೆ ನಡೆಸಲಾಯಿತು. ಶ್ರೀ ಬೀರಲಿಂಗೇಶ್ವರ, ಕರಗಲ್ ಬೀದಿಯಲ್ಲಿ ನೆಲೆಸಿರುವ ಬೇಟೆ ರಂಗನಾಥಸ್ವಾಮಿ ಮತ್ತು ಅಂತರಘಟ್ಟಮ್ಮ, ಮಾರ್ಗದ ಕ್ಯಾಂಪ್ನ ಚೊಕ್ಕಾಪುರದ ಚೌಡೇಶ್ವರಿ ಹಾಗೂ ಲಕ್ಷ್ಮೀ ದೇವರುಗಳ ಜತೆಗೂಡಿ ದೇವಾಲಯಕ್ಕೆ ಆಗಮಿಸಿ ಶ್ರೀ ಗಣಪತಿ, ಶ್ರೀ ವಾಸ್ತು ಪೂಜೆಯನ್ನು ನೆರವೇರಿಸಿ ನಂತರ ಪುಣ್ಯಾಹ, ದೇವಾನಂದಿ, ರಕ್ಷಾಬಂಧನ, ಋತ್ವಿಗ್ವರಣ, ರಾಕ್ಷೋಘ್ನ ಪೂಜಾ, ಪ್ರಧಾನ ಕಳಸ ಪೂಜಾ ವಿಗ್ರಹ ಸಂಸ್ಕಾರ ಮತ್ತು ಪೀಠ ಸಂಸ್ಕಾರ ನೆರವೇರಿಸಿದರು.
ಭಾನುವಾರ ಬೆಳಗ್ಗೆ ಶ್ರೀ ಸ್ವಾಮಿಯವರ ನೂತನ ಪೀಠದಲ್ಲಿ ಯಂತ್ರಸ್ಥಾಪನೆ ನೆರವೇರಿಸಲಾಯಿತು. ಹುಣಸಘಟ್ಟ ಶ್ರೀಗುರು ಹಾಲುಸ್ವಾಮಿ ಮಠದ ಶ್ರೀ ಗುರುಮೂರ್ತಿ ಶಿವಾಚಾರ್ಯ ಸ್ವಾಮೀಜಿ ಸಾನಿಧ್ಯ ವಹಿಸಿದ್ದರು. ನಂತರ ಶ್ರೀ ಸ್ವಾಮಿಗೆ ಅಭಿಷೇಕ, ಪರಿವಾರ ದೇವತಾ ಹೋಮ, ಶ್ರೀ ರಾಮತಾರಕ ಹೋಮ, ಜಯಾದಿ ಪ್ರಾಯಶ್ಚಿತ ಹೋಮ, ಶ್ರೀ ಸ್ವಾಮಿಯವರಿಗೆ ನೇತ್ರೋನ್ಮಿಲನ, ಕೂಷ್ಮಾಂಡ ಕದಲಿ ಛೇದನ, ಪೂರ್ಣಾಹುತಿ, ನಾಮಕರಣ ಹಾಗೂ ಮಹಾಮಂಗಳಾರತಿ ಮತ್ತು ಪ್ರಸಾದ ವಿನಿಯೋಗ ನೆರವೇರಿತು. ಸ್ಥಳೀಯರು, ಭಕ್ತರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.
