ನಿತ್ಯ ಅರ್ಧಕೋಟಿ ರೂ. ನಷ್ಟ

ಶಿರಸಿ: ಲಾಕ್​ಡೌನ್ ಬಳಿಕ ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯ ಬಸ್ ಸಂಚಾರಕ್ಕೆ ಪ್ರಯಾಣಿಕರು ಹಿಂದೇಟು ಹಾಕುತ್ತಿರುವ ಪರಿಣಾಮ ಉತ್ತರ ಕನ್ನಡ ವಿಭಾಗವು ದಿನಕ್ಕೆ ಸರಾಸರಿ 48 ಲಕ್ಷ ರೂಪಾಯಿ ನಷ್ಟ ಅನುಭವಿಸುತ್ತಿದೆ.

ಕೋವಿಡ್- 19 ನಿಯಂತ್ರಣಕ್ಕೆ ಘೊಷಿಸಿದ್ದ ಲಾಕ್​ಡೌನ್ ತೆರವುಗೊಳಿಸಿದ ನಂತರ ಮೇ 19ರಿಂದ ಬಸ್ ಸಂಚಾರ ಪ್ರಾರಂಭವಾಗಿದೆ. ಮೊದಲ ದಿನ 70 ಬಸ್ ಓಡಿಸುವ ಯೋಚನೆಯಲ್ಲಿದ್ದ ಅಧಿಕಾರಿಗಳಿಗೆ, ಪ್ರಯಾಣಿಕರ ಕೊರತೆಯಿಂದಾಗಿ ಕೇವಲ 11 ಬಸ್ ಸಂಚಾರಕ್ಕೆ ಸಾಧ್ಯವಾಯಿತು. ಪೇಟೆ- ಅಂಗಡಿ ಮುಂಗಟ್ಟುಗಳು ಬಾಗಿಲು ತೆರೆದು, ಜನಜೀವನ ಸಹಜ ಸ್ಥಿತಿಗೆ ಬಂದರೂ, ಜನರು ಬಸ್​ನಲ್ಲಿ ಪ್ರಯಾಣಕ್ಕೆ ಮುಂದಾಗುತ್ತಿಲ್ಲ.

ಕೋವಿಡ್-19 ಪೂರ್ವದಲ್ಲಿ ಜಿಲ್ಲೆಯಿಂದ ದಿನಕ್ಕೆ 105 ಬಸ್​ಗಳ ಕಾರ್ಯಾಚರಣೆ ಇರುತ್ತಿತ್ತು. ಈಗ ದಿನಕ್ಕೆ ಸರಾಸರಿ 35 ಬಸ್​ಗಳು ಕಾರ್ಯಾಚರಣೆ ನಡೆಸುತ್ತಿವೆ. ಆಗ ಪ್ರತಿದಿನ 50 ಲಕ್ಷ ರೂ. ನಷ್ಟು ಆದಾಯ ಸಂಗ್ರಹವಾಗುತ್ತಿತ್ತು. ಆದರೆ, ಈಗ ದಿನವೊಂದಕ್ಕೆ 1.5 ಲಕ್ಷ ರೂ. ಮಾತ್ರ ಸಂಗ್ರಹವಾಗುತ್ತಿದೆ. ಜಿಲ್ಲೆಯಲ್ಲಿ ಎಲ್ಲ ತಾಲೂಕು, ಹೊರ ಜಿಲ್ಲೆ, ಬೆಂಗಳೂರಿಗೆ ಬಸ್ ಸಂಚರಿಸುತ್ತಿವೆ. ಆದರೆ, ಪ್ರಯಾಣಿಕರ ಸಂಖ್ಯೆ ತೀರಾ ಕಡಿಮೆಯಿದೆ. ಇಲ್ಲಿಂದ ಹೊರಡುವ ಬಸ್​ಗಳು ತಾಲೂಕು ಕೇಂದ್ರದ ನಿಲ್ದಾಣದಲ್ಲಿ ಮಾತ್ರ ನಿಂತು, ಮುಂದೆ ಸಾಗುತ್ತವೆ ಎನ್ನುತ್ತಾರೆ ಅಧಿಕಾರಿಗಳು.

ಉತ್ತರ ಕನ್ನಡ ಸಾರಿಗೆ ವಿಭಾಗ: *ದಿನವೊಂದಕ್ಕೆ ಒಟ್ಟು ಟ್ರಿಪ್ 3,400 *ದಿನಕ್ಕೆ ಸಂಚರಿಸುತ್ತಿದ್ದ ಬಸ್​ಗಳು 501 * ಒಟ್ಟು ಚಾಲಕ-ನಿರ್ವಾಹಕರು 1,650

ಸುರಕ್ಷಾ ಕ್ರಮ ಇದ್ದರೂ ಹಿಂದೇಟು: ಶಿರಸಿಯಲ್ಲಿ ಹೊಸ ಬಸ್ ನಿಲ್ದಾಣದಿಂದಲೇ ಬಸ್ ಕಾರ್ಯಾಚರಣೆ ನಡೆಸುತ್ತಿವೆ. ನಿಲ್ದಾಣ ಪ್ರವೇಶಿಸಲು ಒಂದೇ ಗೇಟ್ ತೆರೆಯಲಾಗಿದ್ದು, ಅಲ್ಲಿಂದ ಬರುವ ಪ್ರಯಾಣಿಕರ ಥರ್ಮಲ್ ಸ್ಕ್ರೀನಿಂಗ್ ನಡೆಸಿ, ಅವರ ವಿವರ ಪಡೆದು ಪ್ರಯಾಣಕ್ಕೆ ಅನುವು ಮಾಡಿಕೊಡಲಾಗುತ್ತದೆ. ಒಂದು ಬಸ್​ನಲ್ಲಿ 30 ಜನರು ಪ್ರಯಾಣಿಸಲು ಅವಕಾಶವಿದೆ. ಇಷ್ಟೆಲ್ಲ ಸುರಕ್ಷತಾ ಕ್ರಮ ಅನುಸರಿಸುತ್ತಿದ್ದರೂ ಪ್ರಯಾಣಿಕರು ಬಸ್​ನಲ್ಲಿ ತೆರಳಲು ಭಯಡುತ್ತಿರುವುದು ನಷ್ಟಕ್ಕೆ ಕಾರಣವಾಗಿದೆ ಎಂಬುದು ಅಧಿಕಾರಿಗಳ ಅಭಿಪ್ರಾಯ.