ದೊರೆಯದ ಬೆಳೆ ಹಾನಿ ವಿಮೆ

ಕಾರವಾರ: ಬೆಳೆ ಹಾನಿಯಾಗಿದ್ದರೂ ವಿಮಾ ಪರಿಹಾರ ದೊರೆಯದೆ ಇರುವ ಕುರಿತು ಜಿಲ್ಲಾ ಗ್ರಾಹಕರ ನ್ಯಾಯಾಲಯದಲ್ಲಿ ಇನ್ನೂ 57 ಪ್ರಕರಣಗಳು ದಾಖಲಾಗಿವೆ.

2016-17 ನೇ ಸಾಲಿನಲ್ಲಿ ಪ್ರಧಾನಮಂತ್ರಿ ಫಸಲ್ ಬಿಮಾ ಯೋಜನೆ ಹಾಗೂ ಹವಾಮಾನ ಆಧಾರಿತ ಬೆಳೆ ವಿಮೆ ಯೋಜನೆ ಜಾರಿಯ ಗುತ್ತಿಗೆ ಪಡೆದ ಯುನಿವರ್ಸಲ್ ಸೊಂಪೊ ಎಂಬ ಕಂಪನಿ ಅರ್ಹ ರೈತರಿಗೆ ವಿಮಾ ಪರಿಹಾರ ಕೊಡದೇ ಮೋಸ ಮಾಡಿರುವ ಕುರಿತು ಅಂಕೋಲಾ ತಾಲೂಕಿನ ಕುಂಟಗಣಿಯ ರಾಮಚಂದ್ರ ಹೆಗಡೆ, ದೇವಪ್ಪ ಹೆಗಡೆ ಇಬ್ಬರು ಹಾಗೂ ಧಾರವಾಡ ಜಿಲ್ಲೆಯ ಯಲ್ಲಪ್ಪ ಒಬ್ಬ ರೈತ ಉತ್ತರ ಕನ್ನಡ ಜಿಲ್ಲಾ ಗ್ರಾಹರ ನ್ಯಾಯಾಲಯದ ಮೊರೆ ಹೋಗಿದ್ದರು. ನ್ಯಾಯಾಲಯ ರೈತರ ಪರವಾಗಿ ಮಹತ್ವದ ತೀರ್ಪು ನೀಡಿತ್ತು. ಅದನ್ನು ಗಮನಿಸಿ ಇನ್ನೂ ಹಲವು ರೈತರು ನ್ಯಾಯಾಲಯದ ಮೆಟ್ಟಿಲೇರಿದ್ದಾರೆ.

2018 ನೇ ಸಾಲಿನಲ್ಲಿ ಅತಿವೃಷ್ಟಿಯಿಂದ ಬೆಳೆ ಹಾನಿಯಾಗಿದೆ. ಬೆಳೆ ವಿಮೆಯನ್ನು ತುಂಬಿದರೂ ವಿಮಾ ಯೋಜನೆಯ ಮಾನದಂಡದಂತೆ ಪರಿಹಾರಕ್ಕೆ ಅರ್ಹರಾಗಿದ್ದರೂ ರೈತರಿಗೂ ಪರಿಹಾರ ಬಂದಿಲ್ಲ. ಎಂದು ಎಸ್​ಬಿಐ ಇನ್ಶೂರೆನ್ಸ್ ವಿರುದ್ಧ ಶಿರಸಿ ತಾಲೂಕಿನ ಮೆಣಸಿ ಭಾಗದ 57 ರೈತರು ದಾವೆ ಹೂಡಿದ್ದು, ವಿಚಾರಣೆ ನಡೆದಿದೆ.