ಮಾಘ ಅಮವಾಸ್ಯೆಯ ಅಂಗವಾಗಿ ಶ್ರದ್ಧಾಳುಗಳು ಸಮುದ್ರ ಸ್ನಾನ ಮಾಡುವುದು ವಾಡಿಕೆ. ಆದರೆ, ಇಲ್ಲಿ ದೇವಾನು ದೇವತೆಗಳೂ ಸಮುದ್ರ ಸ್ನಾನ ಮಾಡಿದರು. ಮಾಜಾಳಿಯ ರಾಮನಾಥ ದೇವರು ಹಾಗೂ ಆರು ಪರಿವಾರ ದೇವರನ್ನು ಛತ್ರ, ಚಾಮರ, ವಾದ್ಯ ಮೇಳಗಳೊಂದಿಗೆ ಸೋಮವಾರ ಪಲ್ಲಕ್ಕಿಯಲ್ಲಿ ಮಾಜಾಳಿ ಕಡಲ ತೀರಕ್ಕೆ ತಂದು ಸಮುದ್ರ ಸ್ನಾನ ಮಾಡಿಸಿ, ಪೂಜಿಸಿ ಕರೆದೊಯ್ಯಲಾಯಿತು. ಈ ಸಂದರ್ಭದಲ್ಲಿ ಸಾವಿರಾರು ಭಕ್ತರು ಸೇರುವುದರಿಂದ ಇಲ್ಲಿ ದೊಡ್ಡ ಜಾತ್ರೆಯೇ ನೆರೆದಿತ್ತು.
ಸೋಮವಾರ ಮಾಜಾಳಿ ಕಡಲ ತೀರದಲ್ಲಿ ಭಕ್ತರು ಸಮುದ್ರದಲ್ಲಿ ಮಿಂದೆದ್ದರು. ಯುವಕರು ಮಾನವ ಫಿರಮಿಡ್ ಮಾಡಿ ಖುಷಿಪಟ್ಟರು. ಮರಳಿನ ಶಿವ ಲಿಂಗ ಮಾಡಿ ಭಕ್ತಿ ಮೆರೆದರು. ಅಷ್ಟೊತ್ತಿಗಾಗಲೇ ದಡಕ್ಕೆ ಪಲ್ಲಕ್ಕಿಯಲ್ಲಿ ಬಂದ ದೇವರಿಗೆ ಹಣ್ಣು, ಕಾಯಿ ಮಾಡಿಸಿ ಪೂಜೆ ಸಲ್ಲಿಸಿದರು. ಕೆಲವರು ಅರ್ಚಕರ ಮಾರ್ಗದರ್ಶನದಲ್ಲಿ ಪಿಂಡ ಪ್ರಧಾನ ಮಾಡಿದರು. ವಾಪಸ್ ತೆರಳುವ ರಸ್ತೆಯ ಇಕ್ಕೆಲಗಳಲ್ಲಿ ಹಾಸಿಟ್ಟ ಸೀರೆಯಲ್ಲಿ ಪಡಿ (ಅಕ್ಕಿ ಹಾಗೂ ಇತರ ಧಾನ್ಯ)ಬೀರುತ್ತ ಸಾಗಿದರು. ಗೋವಾ ಭಾಗದಿಂದಲೂ ಸಾಕಷ್ಟು ಭಕ್ತರು ಆಗಮಿಸಿದ್ದರು.
