ಛೇ! ಏನ್ ಝುಳಾ..ಉರಿರೀ...!

ರಾಣೆಬೆನ್ನೂರ: ದಿನದಿಂದ ದಿನಕ್ಕೆ ಏರುತ್ತಿರುವ ಬಿಸಿಲಿನ ಪ್ರಖರತೆಗೆ ಜಿಲ್ಲೆಯ ಜನರು ಬಸವಳಿದಿದ್ದಾರೆ. ದಿನಬೆಳಗಾದರೆ ವಿವಿಧ ಕೆಲಸಗಳಿಗಾಗಿ ನಗರ ಪ್ರದೇಶಗಳಿಗೆ ಬರುವವರು ಜಳ ತಡೆಯಲಾರದೆ ತಂಪು ಪಾನೀಯಕ್ಕೆ ಮೊರೆ ಹೋಗುತ್ತಿದ್ದಾರೆ.

ತಾಲೂಕಿನಲ್ಲಿ ಒಂದು ವಾರದಿಂದ ನಿತ್ಯವೂ ಉಷ್ಣಾಂಶ 37.06 ಡಿಗ್ರಿ ಸೆಲ್ಸಿಯಸ್​ನಿಂದ 38.5 ಡಿಗ್ರಿ ಸೆಲ್ಸಿಯಸ್​ವರೆಗೆ ದಾಖಲಾ ಗುತ್ತಿದ್ದರೆ, ಜಿಲ್ಲೆಯಲ್ಲಿ 37.08 ಡಿಗ್ರಿ ಸೆಲ್ಸಿಯಸ್ ಬಿಸಿಲು ದಾಖಲಾ ಗುತ್ತಿದೆ. ಗಾಳಿಯಲ್ಲಿ ತೇವಾಂಶ ಸಂಪೂರ್ಣ ಕಡಿಮೆ ಆಗಿರುವುದರಿಂದ ಉಷ್ಣಾಂಶ ಹೆಚ್ಚಳವಾಗುತ್ತಿದೆ.

ದರ ಹೆಚ್ಚಳ: ಬಿಸಿಲಿನ ಪ್ರರಖತೆ ಏರಿಕೆಯಾಗುತ್ತಿದ್ದಂತೆ ಜನತೆ ಹೆಚ್ಚಾಗಿ ತಂಪು ಪಾನೀಯಗಳ ಮೊರೆ ಹೋಗುತ್ತಿದ್ದಾರೆ. ಹೀಗಾಗಿ ಅನಿವಾರ್ಯ ಎಂಬಂತೆ ಪಾನೀಯಗಳ ದರ ಕೂಡ ಏರಿಕೆಯಾಗಿವೆ. ರಸ್ತೆಗಳ ಅಕ್ಕಪಕ್ಕದ ಫುಟ್​ಪಾತ್​ಗಳಲ್ಲಿ ಕಲ್ಲಂಗಡಿ, ಕರಬೂಜ್ ಹಣ್ಣುಗಳನ್ನು ಗುಡ್ಡೆ ಹಾಕಿ ಮಾರಾಟ ಮಾಡಲಾಗುತ್ತಿದೆ. ಸಾಮಾನ್ಯ ದಿನಗಳಲ್ಲಿ ಎಳನೀರನ್ನು 25 ರೂ.ಗೆ ಒಂದರಂತೆ ಮಾರಾಟ ಮಾಡಿದರೆ, ಈಗ 30 ರೂಪಾಯಿಯಿಂದ 35 ರೂಪಾಯಿ ವರೆಗೂ ಮಾರಾಟ ಮಾಡಲಾಗುತ್ತಿದೆ. ಕಲ್ಲಂಗಡಿ ಹಣ್ಣನ್ನು ಪ್ಲೇಟ್​ಗೆ 15 ರೂಪಾಯಿಯಿಂದ 20 ರೂಪಾಯಿವರೆಗೆ ಮಾರಾಟ ಮಾಡುತ್ತಿದ್ದಾರೆ.

ಕಳೆದ ವರ್ಷಕ್ಕಿಂತ ಈ ಬಾರಿ ಹೆಚ್ಚುತ್ತಿದೆ ಬಿಸಿಲು...

ಕಳೆದೊಂದು ವಾರದಿಂದ ಜಿಲ್ಲೆಯ ವಾತಾವರಣದಲ್ಲಿ ಉಷ್ಣಾಂಶ ಪ್ರಮಾಣ ಗಣನೀಯವಾಗಿ ಹೆಚ್ಚಾಗಿದೆ. ಶಿವರಾತ್ರಿಗೂ ಮುನ್ನ ಜಿಲ್ಲೆಯಲ್ಲಿ 34 ಡಿಗ್ರಿ ಸೆಲ್ಸಿಯಸ್​ನಿಂದ 35 ಡಿಗ್ರಿವರೆಗೂ ಬಿಸಿಲು ದಾಖಲಾಗುತ್ತಿತ್ತು. ಆದರೀಗ 37.08 ಡಿಗ್ರಿ ಸೆಲ್ಸಿಯಸ್ ಬಿಸಿಲು ದಾಖಲಾಗುತ್ತಿದೆ. ತಿಂಗಳ ಕೊನೆ ಹಾಗೂ ಮುಂದಿನ ತಿಂಗಳ ಮೊದಲ ವಾರದಲ್ಲಿ 38 ಡಿಗ್ರಿ ಸೆಲ್ಸಿಯಸ್​ನಿಂದ 40 ಡಿಗ್ರಿ ಸೆಲ್ಸಿಯಸ್​ನವರೆಗೂ ದಾಖಲಾಗಬಹುದು. ಕಳೆದ 2020ರ ಮಾರ್ಚ್ ತಿಂಗಳ ಆರಂಭದಲ್ಲಿ 36.09 ಡಿಗ್ರಿ ಸೆಲ್ಸಿಯಸ್ ಬಿಸಿಲು ದಾಖಲಾಗಿದ್ದರೆ, ಅದೇ ತಿಂಗಳ ಕೊನೆಯಲ್ಲಿ 38.03 ಡಿಗ್ರಿಯಷ್ಟು ಉಷ್ಣಾಂಶ ಹೆಚ್ಚಳವಾಗಿತ್ತು. ಕಳೆದ ವರ್ಷಕ್ಕೆ ಹೋಲಿಸಿದರೆ, ಈ ವರ್ಷ ಬಿಸಿಲಿನ ಪ್ರಖರತೆ ಹೆಚ್ಚಳವಾಗಲಿದೆ.

ಕಳೆದ ವರ್ಷದ ಬೇಸಿಗೆ ತಿಳಿಯಲೇ ಇಲ್ಲ

ಕಳೆದ ವರ್ಷ ಬಿಸಿಲು ಹೆಚ್ಚಾಗುವ ಮಾರ್ಚ್ ತಿಂಗಳ ಸಮಯಕ್ಕೆ ಕರೊನಾ ಹಿನ್ನೆಲೆಯಲ್ಲಿ ಲಾಕ್​ಡೌನ್ ಘೊಷಿಸಲಾಗಿತ್ತು. ಆದ್ದರಿಂದ ಜನತೆ ಮನೆಯಿಂದ ಹೊರಗೆ ಬಂದಿರಲಿಲ್ಲ. ಹೀಗಾಗಿ ಜನತೆಗೆ ಬಿಸಿಲಿನ ಸ್ಪರ್ಷ ಅಷ್ಟಾಗಿ ತಟ್ಟಿರಲಿಲ್ಲ.