ಬಾಗಲಕೋಟೆ: ಮಲಪ್ರಭಾ ನದಿ ಪ್ರವಾಹ ,ಮಳೆ ಹಾನಿಯಿಂದ ಆದ ಬಾದಾಮಿ ಮತಕ್ಷೇತ್ರದ ಪ್ರವಾಹ ಪೀಡಿತ ಪ್ರದೇಶಗಳಿಗೆ ಕ್ಷೇತ್ರದ ಶಾಸಕ, ವಿ.ಪಕ್ಷ ನಾಯಕ ಸಿದ್ದರಾಮಯ್ಯ ಶನಿವಾರ ಭೇಟಿ ನೀಡಿ ಪರಿಶೀಲಿಸಿದರು. ಅಲ್ಲದೆ ಸಂತ್ರಸ್ತರಿಗೆ ಸರ್ಕಾರದಿಂದ ನೀಡುವ ಪರಿಹಾರ ಸಮರ್ಪಕವಾಗಿ ತಲುಪಿಸುವುದಾಗಿ ಅಭಯ ನೀಡಿದರು. ಈ ಸಂದರ್ಭದಲ್ಲಿ ಮುಂದಿನ ಸಾರಿ ನಮ್ಮ ಸರ್ಕಾರ ಬರುತ್ತದೆ. ಈ ಗ್ರಾಮಗಳ ಸ್ಥಳಾಂತರ ಮಾಡುವುದಾಗಿ ಭರವಸೆ ನೀಡಿದರು. ಹಾನಿ ವೀಕ್ಷಣೆ ವೇಳೆ ಸಿದ್ದರಾಮಯ್ಯಗೆ ಮಳೆ ಅಡ್ಡಿ ಪಡಿಸಿತು.
ನಿಮ್ಮಪ್ಪನ ಮನೆ ಗಂಟು ಹೋಗಲ್ಲ:
ಗೋವನಕೊಪ್ಪ ಗ್ರಾಮಕ್ಕೆ ಭೇಟಿ ನೀಡಿ ಹಳೇ ಸೇತುವೆ ಹಾಗೂ ಸುತ್ತಲಿನ ಕಬ್ಬು, ಪೇರಲ ಬೆಳೆ ಹಾನಿ ವೀಕ್ಷಣೆ ಮಾಡಿದರು. ಈ ಸಂದರ್ಭದಲ್ಲಿ ಮೂರು ವರ್ಷದಿಂದ ಸತತ ಬೆಳೆಹಾನಿ ಆದರು ಪರಿಹಾರ ಕೊಟ್ಟಿಲ್ಲ ಎಂದು ರೈತರು ಅಳಲು ತೋಡಿಕೊಂಡರು. ಮಳೆಯಿಂದ ಹಾನಿಯಾಗಿರೋ ಬಗ್ಗೆ ಅಧಿಕಾರಿಗಳಿಂದ ಮಾಹಿತಿ ಪಡೆದ ಸಿದ್ದರಾಮಯ್ಯ. ಎನ್ ಡಿ ಆರ್ ಎಫ್ ನಾರ್ಮಸ್ ಪ್ರಕಾರ ಪರಿಹಾರ ನೀಡುತ್ತಿದ್ದೇವೆ ಎಂದು ಬಾದಾಮಿ ತಹಸೀಲ್ದಾರ ಜೆ.ಬಿ.ಮಜ್ಜಗೆ ಹೇಳಿದರು. ಈ ವೇಳೆ ಸಿದ್ದರಾಮಯ್ಯ ಲಿಬರಲ್ ಆಗಿ ಪರಿಹಾರ ಕೊಡಿ. ನಿಮ್ಮಪ್ಪನ ಮನೆ ಗಂಟೇನು ಹೋಗಲ್ಲ ಎಂದು ಅಧಿಕಾರಿ ಜಿ.ಬಿ ಮಜ್ಜಗಿಗೆ ಸೂಚನೆ ನೀಡಿದರು.ಈ ವೇಳೆ ವ್ಯಕ್ತಿವೋರ್ವ ಡೊಳ್ಳು ಬಡಿಯುವ ಕೆಲಸ ಮಾಡ್ತಿದ್ದೇನೆ. ಸರ್ಕಾದಿಂದ ತಮಗೆ ಸಹಾಯ ಮಾಡಿಸುವಂತೆ ಕೋರಿದರು. ಇದಕ್ಕೆ ಪ್ರತಿಕ್ರಿಯೆ ನೀಡಿದ್ದ ಸಿದ್ದರಾಮಯ್ಯ, ಅವರು(ಸರ್ಕಾರ) ನಮ್ಮ ಮಾತು ಕೇಳಲ್ಲ. ಅವರಿಗೆ ಬೇಕಾದವರಿಗೆ ಮಾಡಿ ಕೊಡ್ತಾರೆ. ಆದ್ರೂ ಪತ್ರ ಬರೆಯುತ್ತೇನೆ ಎಂದು ಅಭಯ ನೀಡಿದರು.
