ನಗರದಲ್ಲಿ 15ಕ್ಕೂ ಹೆಚ್ಚು ಕಡೆಗಳಲ್ಲಿ ಗಣಪತಿ ವಿಗ್ರಹಗಳು ತಯಾರಾಗುತ್ತವೆ. ಗ್ರಾಮೀಣ ಪ್ರದೇಶಗಳಲ್ಲಿ ಗುಡಿಗಾರರ ಜೊತೆಗೆ ಹವ್ಯಾಸಿ ಕಲಾವಿದರು ಮಣ್ಣಿನಲ್ಲಿ ಗಣೇಶನನ್ನು ಅರಳಿಸುತ್ತಾರೆ. ಈ ಬಾರಿ ಕೋವಿಡ್ 19 ಸಾಂಕ್ರಾಮಿಕ ಕಾಯಿಲೆ ಇರುವುದರಿಂದ ಸಾರ್ವಜನಿಕ ಗಣೇಶೋತ್ಸವಗಳು ಸರಳವಾಗಿ ನಡೆಯುತ್ತವೆ. ಆದರೆ, ಮನೆಗಳಲ್ಲಿ ಹಬ್ಬದ ಆಚರಣೆಗೆ ಇದು ಅಡ್ಡಿಯಾಗಲಾರದು. ಹೀಗಾಗಿ, ಚಿಕ್ಕ ಮೂರ್ತಿಗಳ ರಚನೆ ಹೆಚ್ಚಿದೆ. ಒಂದೂವರೆ ತಿಂಗಳಿಂದ ಮೂರ್ತಿ ತಯಾರಿಕೆ ಕಾರ್ಯ ನಿರಂತರವಾಗಿ ಸಾಗಿದೆ. 250ಕ್ಕೂ ಹೆಚ್ಚು ಮೂರ್ತಿಗಳನ್ನು ತಯಾರಿಸಿದ್ದೇವೆ. ಈಗ ಮೂರ್ತಿಗೆ ಬಣ್ಣ ಬಳಿಯುವ ಕೆಲಸ ನಡೆಯುತ್ತಿದೆ. ಕೆಲಸಗಾರರು, ಮನೆಯ ಸದಸ್ಯರು ಈ ಕಾರ್ಯದಲ್ಲಿ ತೊಡಗಿಕೊಂಡಿದ್ದೇವೆ. ಮನೆಯಲ್ಲಿ ಗಣೇಶನ ಮೂರ್ತಿ ಪ್ರತಿಷ್ಠಾಪಿಸುವ ಎಲ್ಲ ಗ್ರಾಹಕರು, ಪ್ರತಿ ವರ್ಷದಂತೆ ಈ ವರ್ಷವೂ ಮೂರ್ತಿಗೆ ಬೇಡಿಕೆ ಸಲ್ಲಿಸಿದ್ದಾರೆ ಎನ್ನುತ್ತಾರೆ ಚನ್ನಪಟ್ಟಣ ಬಜಾರದಲ್ಲಿರುವ ಮೋಹನ ಗುಡಿಗಾರ ಕುಟುಂಬದವರು. ಕೋವಿಡ್ 19 ಕಾರಣಕ್ಕೆ ಮೂರ್ತಿಗಳ ಬೇಡಿಕೆಯಲ್ಲಿ ವ್ಯತ್ಯಾಸವಾಗಿಲ್ಲ. ಮಧ್ಯಮ ಗಾತ್ರದ ಮೂರ್ತಿ 1000 ದಿಂದ 1300 ರೂ. ಹಾಗೂ ಚಿಕ್ಕ ಮೂರ್ತಿಗಳು 650 ರಿಂದ 800 ರೂಪಾಯಿಗಳಿಗೆ ದೊರೆಯುತ್ತಿವೆ.
