ಬಾಗಲಕೋಟೆ: ಜಿಲ್ಲೆಯಲ್ಲಿ ಚುನಾವಣೆ ಕಾವು ರಂಗೇರ ತೊಡಗಿದೆ. ಶುಭ ಮಹೂರ್ತ ನೋಡಿಕೊಂಡು ನಾಮಪತ್ರ ಸಲ್ಲಿಸುತ್ತಿರುವ ಅಭ್ಯರ್ಥಿಗಳು ತಮ್ಮ ಶಕ್ತಿ ಪ್ರದರ್ಶನ ತೋರುತ್ತಿದ್ದಾರೆ. ಸೋಮವಾರ ಜಿಲ್ಲೆಯ ಏಳು ವಿಧಾನಸಭಾ ಮತಕ್ಷೇತ್ರಗಳಲ್ಲಿ ಸೋಮವಾರದಂದು ೧೨ ಅಭ್ಯರ್ಥಿಗಳಿಂದ ಒಟ್ಟು ೧೭ ನಾಮಪತ್ರಗಳು ಸಲ್ಲಿಕೆಯಾಗಿವೆ.
ಬಾಗಲಕೋಟೆ ಮತಕ್ಷೇತ್ರದಿಂದ ೬, ಬಾದಾಮಿ ಕ್ಷೇತ್ರದಿಂದ ೪, ಹುನಗುಂದ ಕ್ಷೇತ್ರದಿಂದ ೪, ಮುಧೋಳ ಕ್ಷೇತ್ರದಿಂದ ೨, ತೇರದಾಳ ಕ್ಷೇತ್ರದಿಂದ ೧ ಹಾಗೂ ಬೀಳಗಿ ಮತ್ತು ಜಮಖಂಡಿಯಲ್ಲಿ ಯಾವುದೇ ನಾಮಪತ್ರ ಸಲ್ಲಿಕೆಯಾಗಿರುವದಿಲ್ಲ.
ಬಾಗಲಕೋಟೆ ಮತಕ್ಷೇತ್ರದಿಂದ ಕಾಂಗ್ರೆಸ್ ಪಕ್ಷದಿಂದ ಹುಲ್ಲಪ್ಪ ಮೇಟಿ ೨ ನಾಮಪತ್ರ ಸಲ್ಲಿಸಿದರೆ, ಪಕ್ಷೇತರದಿಂದ ಮಲ್ಲಿಕಾರ್ಜುನ ಚರಂತಿಮಠ, ಜೆಡಿಎಸ್ ಪಕ್ಷದಿಂದ ದೇವರಾಜ ಪಾಟೀಲ, ಕರ್ನಾಟಕ ರಾಷ್ಟ್ರ ಸಮಿತಿ ಪಕ್ಷದಿಂದ ಬಾಬುಶಾ ರೊಳ್ಳಿ, ಆಮ್ ಆದ್ಮಿ ಪಕ್ಷದಿಂದ ರಮೇಶ ಬದ್ನೂರ ತಲಾ ಒಂದು ನಾಮಪತ್ರ ಸಲ್ಲಿಸಿದ್ದಾರೆ. ಬಾದಾಮಿ ಮತಕ್ಷೇತ್ರದಿಂದ ಕಾಂಗ್ರೆಸ್ ಪಕ್ಷದಿಂದ ಭೀಮಸೇನ್ ಚಿಮ್ಮನಕಟ್ಟಿ ಮತ್ತು ಕರ್ನಾಟಕ ಜನತಾ ಪಕ್ಷದಿಂದ ಮಾರುತಿ ಜಮೀನ್ದಾರ ತಲಾ ಎರಡು ನಾಮಪತ್ರ ಸಲ್ಲಿಸಿದ್ದಾರೆ.
