ಹಂತಕ ಕಾಡಾನೆ ಚಲನವಲನದ ಮೇಲೆ ನಿಗಾ ಇಟ್ಟಿದ್ದ ಸಿಬ್ಬಂದಿ ಗುರುವಾರ ಮುಂಜಾನೆ ತಾಲೂಕಿನ ಹಸಿಡೆ ಗ್ರಾಮ ಸಮೀಪ ಸಂಚರಿಸುತ್ತಿರುವ ಬಗ್ಗೆ ಮಾಹಿತಿ ಪಡೆದರು. ಕಾರ್ಯಾಚರಣೆ ಆರಂಭಿಸಿದ ಸಿಬ್ಬಂದಿ ಹಸಿಡೆ ಹಾಗೂ ಹಲುಸುಲಿಗೆ ಗ್ರಾಮದ ಕಾಫಿ ತೋಟದಲ್ಲಿ ಅಡಗಿದ್ದ ಸುಮಾರು 20 ವರ್ಷದ ಗಂಡಾನೆ ಮೇಲೆ ಅರಿವಳಿಕೆ ತಜ್ಞರಾದ ಮುಜೀಬ್ ಹಾಗೂ ತೌಫಿಕ್ ಅರಿವಳಿಕೆ ಚುಚ್ಚುಮದ್ದು ಹಾರಿಸಿದರು. ಇದರಿಂದ ಬೆದರಿದ ಕಾಡಾನೆ ಕೆಲ ದೂರ ಓಡಿ ಕುಸಿದುಬಿತ್ತು. ತಕ್ಷಣ ಕಾಡಾನೆ ಸುತ್ತುವರಿದ ಅರಣ್ಯ ಇಲಾಖೆ ಸಿಬ್ಬಂದಿ ನೀರು ಹಾಕಿ, ಚೈನು ಹಾಗೂ ಹಗ್ಗದಿಂದ ಬಂಧಿಸಿದರು. ನಂತರ ಎಚ್ಚರಗೊಂಡ ಕಾಡಾನೆಯನ್ನು ರಸ್ತೆಗೆ ಎಳೆದು ತಂದು ಕ್ರೇನ್ ಮೂಲಕ ಲಾರಿಗೆ ಹತ್ತಿಸಿ ಮೈಸೂರಿನ ಮಲೆಮಹದೇಶ್ವರ ಬೆಟ್ಟಕ್ಕೆ ಸಾಗಿಸಿದರು.
