ಕಾಡುಪ್ರಾಣಿಗಳ ದಾಳಿಗೆ ಅಡಕೆ, ಬಾಳೆ ಹಾಳು

ಸಿದ್ದಾಪುರ: ತಾಲೂಕಿನ ಹಸರಗೋಡ ಹಾಗೂ ಅಣಲೇಬೈಲ್ ಗ್ರಾಪಂ ವ್ಯಾಪ್ತಿಯ 300ಕ್ಕೂ ಹೆಚ್ಚು ಹೆಕ್ಟೇರ್ ಅಡಕೆ ತೋಟದಲ್ಲಿ ಕಾಡುಪ್ರಾಣಿಗಳು ಹಲವು ದಿನಗಳಿಂದ ದಾಳಿ ನಡೆಸಿ ಅಡಕೆ ಸಸಿ ಹಾಗೂ ಬಾಳೆ ಗಿಡಗಳನ್ನು ನಾಶಪಡಿಸಿವೆ. ಇದಕ್ಕೆ ಅರಣ್ಯ ಇಲಾಖೆ ಸೂಕ್ತ ಪರಿಹಾರ ನೀಡಬೇಕು ಎಂದು ಬೆಳೆಗಾರರು ಆಗ್ರಹಿಸಿದ್ದಾರೆ.

ತಂಗಾರಮನೆ, ಶಮೇಮನೆ, ಬಾಳೇಸರ, ಹಸರಗೋಡ, ಹೇರೂರು, ಕುರಾ, ಕರ್ಜಿಗೆ ಮತ್ತಿತರ ಗ್ರಾಮಗಳಲ್ಲಿ ಕಾಡುಕೋಣ, ಕಾಡುಹಂದಿ, ಕ್ಯಾಸಾಳ, ಮಂಗಗಳು ದಾಳಿ ನಡೆಸಿ ಅಡಕೆ ಸಸಿ, ಒಂದೆರಡು ವರ್ಷದಲ್ಲಿ ಬೆಳೆ ಬರಬಹುದಾದ ಅಡಕೆ ಗಿಡ, ಈಗಾಗಲೇ ಬಿಟ್ಟ ಅಡಕೆ ಮಿಳ್ಳೆಗಳು, ಕೊಕೋ, ತೆಂಗು, ಫಸಲು ಬಂದ ಬಾಳೆ, ತರಕಾರಿಗಳನ್ನು ಕಾಡುಪ್ರಾಣಿಗಳು ನಾಶಪಡಿಸಿವೆ. ಈ ಕುರಿತು ಸಂಬಂಧಪಟ್ಟ ಅರಣ್ಯ ಇಲಾಖೆಗೆ ಮಾಹಿತಿ ನೀಡಲಾಗಿದೆ. ಆದರೆ, ಯಾವುದೇ ಪ್ರಯೋಜನವಾಗಿಲ್ಲ ಎಂದು ತಂಗಾರಮನೆಯ ಗೋಪಾಲಕೃಷ್ಣ ಹೆಗಡೆ, ಭಾಸ್ಕರ ಹೆಗಡೆ, ಶಶಿಧರ ಹೆಗಡೆ, ಲಕ್ಷ್ಮೀನಾರಾಯಣ ಹೆಗಡೆ, ಶಮೇಮನೆಯ ಗಣೇಶ ಹೆಗಡೆ, ಅಶೋಕ ಹೆಗಡೆ ಇತರರು ಹೇಳುತ್ತಾರೆ.

ಸೋಲಾರ್ ಬೇಲಿ ಅಳವಡಿಸಿ:ಬೆಳೆರಕ್ಷಣೆಗೆ ಅರಣ್ಯ ಇಲಾಖೆಯಿಂದ ಶಾಶ್ವತ ಪರಿಹಾರ ರೂಪವಾಗಿ ತೋಟದ ಸುತ್ತಲೂ ಸೋಲಾರ್ ಬೇಲಿ ನಿರ್ವಿುಸಲು ಆರ್ಥಿಕ ಸಹಕಾರ ಹಾಗೂ ಬೆಳೆ ಹಾನಿ ಆಗಿರುವುದಕ್ಕೆ ತಕ್ಷಣ ಪರಿಹಾರ ನೀಡಬೇಕು ಎಂದು ಕೃಷಿಕರು ಒತ್ತಾಯಿಸಿದ್ದಾರೆ.