ಶನಿವಾರ ರಾತ್ರಿ ರನ್ನ ಬೆಳಗಲಿ ಗ್ರಾಮದಲ್ಲಿ ರನ್ನ ವೈಭವ ಉತ್ಸವ ಉದ್ಘಾಟನೆಗೂ ಮುನ್ನ ಸಂಜೆಯಿಂದಲೆ ಸಾಂಸ್ಕೃತಿಕ ಕಾರ್ಯಕ್ರಮಗಳ ಕಲರವ ಆರಂಭಗೊಂಡಿತು. ಯಮನಪ್ಪ ಪೂಜೇರಿ ಅವರ ಔಡಕಿ ಪದಗಳು, ಕುಮಾರ ಬಡಿಗೇರ ಅವರ ಶಾಸ್ತ್ರೀಯ ಸಂಗೀತ,ಕೃಷ್ಣಪ್ಪ ಹಾರೂಗೇರಿ ಅವರ ಡೊಳ್ಳಿನ ಪದಗಳು, ಇತ್ತೀಚಿಗೆ ಪದ್ಮಶ್ರೀ ಪ್ರಶಸ್ತಿಗೆ ಬಾಜನರಾದ ಡಾ.ವೆಂಕಪ್ಪ ಸುಗೇತಕರ ಅವರ ಗೋಂದಳಿ ಪದಗಳು, ಕಾಂಚನ ಅರವಿಂದ ಅವರ ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತ, ನಟರಾಜ ಸಂಗೀತ ನೃತ್ಯನಿಕೇತನ ತಂಡದಿಂದ ಮೂಡಿಬಂದ ಸಮೂಹ ನೃತ್ಯ, ಈರಪ್ಪ ಅಥಣಿ ಅವರ ಭಜನಾ ಪದ ಮನಸೂರೆಗೊಳಿಸಿದವು. ಸಂಜೆ ಗದಗ ನಟರಂಗ ಕಲ್ಚರಲ್ ಅಕಾಡೆಮಿ ವತಿಯಿಂದ ನಡೆದ ಲಂಬಾಣಿ ನೃತ್ಯ ಜನರನ್ನು ಸೆಳೆಯಿತು. ರಬಕವಿಯ ಯಶವಂತ ವಾಜಂತ್ರಿ ಅವರ ಹಾಸ್ಯಸಂಜೆ ಜನರನ್ನು ನಗೆಗಡಲಲ್ಲಿ ತೇಲಿಸಿದರೆ, ರಾಚಯ್ಯ ಮುಧೋಳ ನೇತೃತ್ವದ ತಂಡದಿಂದ ಆಕರ್ಷಕ ದೀಪ ನೃತ್ಯ ಹಾಗೂ ಪ್ರಸಿದ್ಧವಾದ ಜೋಗತಿ ನೃತ್ಯ ಬೇರೊಂದು ಲೋಕವನ್ನು ಸೃಷ್ಟಿಸುವಲ್ಲಿ ಯಶಸ್ವಿಯಾಯಿತು. ಹುಟ್ಟಿ ಬಂದೆ ಎಲ್ಲಮ್ಮನಾಗಿ ನಿನ್ನ ಮದುವೆ ಮಾಡಿ ಕೊಟ್ಟಾರವ್ವ ಜಾಮಾದಾಗ್ನಿಗೆ ಎನ್ನುವ ನೃತ್ಯವೂ ಜನರಿಂದ ಕಿಕ್ಕಿರಿದು ತುಂಬಿದ್ದ ಆವರಣದಲ್ಲಿ ಸಂಚಲನ ಸೃಷ್ಟಿಸಿತು.
