ಕಳ್ಳೆಗದ್ದೆಗೆ ಕಾಲು ಸಂಕವೇ ರಹದಾರಿ

ಸಿದ್ದಾಪುರ: ತಾಲೂಕಿನ ವಾಜಗೋಡ ಗ್ರಾಪಂ ವ್ಯಾಪ್ತಿಯ ಕಳ್ಳೆಗದ್ದೆಗೆ ತೆರಳುವ ರಸ್ತೆ ಕೊಚ್ಚಿಕೊಂಡು ಹೋಗಿದ್ದು, ಓಡಾಟಕ್ಕೆ ಗ್ರಾಮಸ್ಥರೇ ಕಾಲು ಸಂಕ ನಿರ್ವಿುಸಿಕೊಂಡು ಇತರರಿಗೆ ಮಾದರಿಯಾಗಿದ್ದಾರೆ.

ಕಳೆದ ವಾರ ಬಿದ್ದ ಮಳೆಗೆ ಹಳ್ಳ ತುಂಬಿ ಹರಿದ ಪರಿಣಾಮ ರಸ್ತೆ ಸಂಪೂರ್ಣ ಕೊಚ್ಚಿಕೊಂಡು ಹೋಗಿದೆ. ತಾಲೂಕು ಕೇಂದ್ರದಿಂದ ಮೂವತ್ತು ಕಿಲೋ ಮೀಟರ್ ದೂರದಲ್ಲಿರುವ ಕಳ್ಳೆಗದ್ದೆಯಲ್ಲಿ ಮೂವತ್ತಕ್ಕೂ ಹೆಚ್ಚು ಮನೆಗಳಿವೆ. ಮುಖ್ಯರಸ್ತೆಗೆ ಸಂಪರ್ಕ ನೀಡುವುದಕ್ಕೆ ಇದೊಂದೆ ರಸ್ತೆ ಆಗಿರುವುದರಿಂದ ಸರ್ವಋತು ರಸ್ತೆಯ ಕನಸನ್ನು ಊರವರು ಹಲವು ವರ್ಷಗಳಿಂದ ಕಾಣುತ್ತಿದ್ದರೂ ಆಳುವ ದೊರೆಗಳಿಗೆ ಮಾತ್ರ ಇವರ ಸಂಕಷ್ಟದ ಅರಿವು ಗೊತ್ತಾಗುತ್ತಿಲ್ಲ.

ರಸ್ತೆ ಕೊಚ್ಚಿಕೊಂಡು ಹೋಗಿದ್ದರಿಂದ ಸಂಪರ್ಕದ ಕೊಂಡಿಯೇ ಕಳಚಿ ಹೋಗುತ್ತದೆ ಎನ್ನುವ ಆತಂಕದಿಂದ ಜನತೆ ಮರದ ಸಂಕವನ್ನು ನಿರ್ವಿುಸಿಕೊಂಡು ಸಂಚರಿಸುತ್ತಿದ್ದಾರೆ.

ಹೊನ್ನಾವರ ತಾಲೂಕಿಗೆ ಸಂಪರ್ಕ ನೀಡುವ ರಸ್ತೆ: ಕಳ್ಳೆಗದ್ದೆಯಿಂದ ಹೊನ್ನಾವರ ತಾಲೂಕಿನ ವಾಟೆಹಳ್ಳದವರೆಗೆ ಕೇವಲ ಏಳು ಕಿ.ಮೀ. ದೂರವಿದ್ದು ಬೇಸಿಗೆಯಲ್ಲಿ ಕೆಲವು ಲಘುವಾಹನಗಳು ಸಂಚರಿಸುತ್ತವೆ. ಮಳೆಗಾಲದಲ್ಲಿ ಸಂಚಾರಕ್ಕೆ ತೊಂದರೆ ಆಗುತ್ತಿದೆ. ಗೊದ್ಲಮನೆ ಮುಖ್ಯ ರಸ್ತೆಯಿಂದ ಕಳ್ಳೆಗದ್ದೆ ಮೂಲಕ ಹೊನ್ನಾವರಕ್ಕೆ ತೆರಳಲು ಈ ಭಾಗದ ಜನತೆಗೆ ಇದು ಹೆಚ್ಚು ಉಪಯೋಗವಾಗುವುದರಿಂದ ಜನಪ್ರತಿನಿಧಿಗಳು ಈ ಕುರಿತು ಹೆಚ್ಚು ಗಮನ ನೀಡಿ ಸೇತುವೆ ಹಾಗೂ ಸರ್ವಋತು ರಸ್ತೆ ನಿರ್ವಿುಸುವುದಕ್ಕೆ ಮುಂದಾಗಬೇಕೆಂದು ಸ್ಥಳೀಯರ ಆಗ್ರಹವಾಗಿದೆ.