ಪವನ್ ಆಚಾರ್ಯ ನೀರ್ಚಾಲು ಬೆಂಗಳೂರು
ಕಬ್ಬನ್ ಪಾರ್ಕ್ ಉದ್ಯಾನವನದಲ್ಲಿ ಪರಿಸರಕ್ಕೆ ಧಕ್ಕೆ ಉಂಟಾಗುವ ಚಟುವಟಿಕೆಗಳಿಗೆ ರ್ನಿಬಂಧ ವಿಧಿಸಲಾಗಿದ್ದು, 20ಕ್ಕಿಂತ ಹೆಚ್ಚು ಮಂದಿ ಸೇರುವ ಕಾರ್ಯಕ್ರಮಗಳಿಗೆ ತೊಟಗಾರಿಕೆ ಉಪ ನಿರ್ದೇಶಕರಿಂದ ಅನುಮತಿ ಪಡೆಯುವುದನ್ನು ಕಡ್ಡಾಯ ಮಾಡಲಾಗಿದೆ.
ಕಬ್ಬನ್ ಪಾರ್ಕ್ನಲ್ಲಿ ಕೆಲವರ ಹುಚ್ಚಾಟದ ಪ್ರಕರಣಗಳು ನಡೆದು ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದವು. ಇಂತಹ ಪ್ರಕರಣಗಳಿಗೆ ಕಡಿವಾಣ ಹಾಕಲು ಇಲಾಖೆಯು ಸರ್ಕಾರದ ಜತೆ ಚರ್ಚಿಸಿ, ಉದ್ಯಾನದೊಳಗೆ ಯಾವ ಚಟುವಟಿಕೆಗೆ ಅನುಮತಿ ನೀಡಬೇಕು& ನೀಡಬಾರದು ಎಂಬುದರ ಬಗ್ಗೆ ದೃಢಪಡಿಸಿಕೊಳ್ಳಲಾಗಿದೆ. ಇದನ್ನಾಧರಿಸಿ ಉದ್ಯಾನದೊಳಗೆ ಏನು ಮಾಡಬೇಕು ಮತ್ತು ಏನು ಮಾಡಬಾರದು ಎಂಬುದರ ರ್ನಿದಿಷ್ಟ ಪಟ್ಟಿಯನ್ನು ಹೊರಡಿಸಲಾಗಿದೆ.
ಇನ್ನು ಮುಂದೆ ಕಬ್ಬನ್ ಪಾರ್ಕ್ನಲ್ಲಿ ಹಮ್ಮಿಕೊಳ್ಳುವ ಕಾರ್ಯಕ್ರಮಗಳಿಗೆ ಜನರ ಸಂಖ್ಯೆಮಿತಿ, ಆಹಾರ ಮತ್ತು ಕೆಲವು ಆಟಿಕೆಗಳ ಮೇಲಿನ ನಿಷೇಧ ಇತ್ಯಾದಿ ವಿಷಯಗಳಿಗೆ ಮಾರ್ಗಸೂಚಿಯಲ್ಲಿ ಸ್ಪಷ್ಟಪಡಿಸಿದೆ. ಇದರನ್ವಯ ವಾಕಥಾನ್/ ಮ್ಯಾರಥಾನ್, ಸರ್ಕಾರಿ ಇಲಾಖೆಗಳಿಂದ ಸಾರ್ವಜನಿಕ ಜಾಗೃತಿ ಕಾರ್ಯಕ್ರಮ, ಮಾನ್ಯತೆ ಪಡೆದ ದತ್ತಿ ಟ್ರಸ್ಟ್ಗಳು ನಡೆಸುವ ಆರೋಗ್ಯ ಶಿಬಿರಗಳಿಗೆ ಬೆಳಗ್ಗೆ 5.30ರಿಂದ 9 ಮತ್ತು ಸಂಜೆ 4.30 ರಿಂದ ಸಂಜೆ 6ರ ವರೆಗೆ ಹಮ್ಮಿಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ.
ಇದರ ಹೊರತಾಗಿ ಉದ್ಯಾನವನಕ್ಕೆ ಬಿಎಸ್ಎನ್ಎಲ್ ಕಚೇರಿ ಕಡೆ ಪ್ರವೇಶ ಕಲ್ಪಿಸುವ ಸ್ಥಳದಿಂದ ಹೈಕೋರ್ಟ್ ಕಟ್ಟಡವರೆಗೆ ಸಾರ್ವಜನಿಕರು ವಾಣಿಜ್ಯೇತರ ಚಟುವಟಿಕೆಗಳಾದ ಯೋಗ, ಪುಸ್ತಕ ಓದುವುದು ಇತ್ಯಾದಿಗೆ ರ್ನಿಬಂಧ ವಿಧಿಸಿಲ್ಲ. ಆದರೆ, 20ಕ್ಕಿಂತ ಹೆಚ್ಚು ಮಂದಿ ಸೇರಿದರೆ ಆಯೋಜಕರು ಉಪ ನಿರ್ದೇಶಕರಿಂದ ಅನುಮತಿ ಪಡೆಯಬೇಕಾಗುತ್ತದೆ ಎಂದು ಆದೇಶದಲ್ಲಿ ಸ್ಪಷ್ಟಪಡಿಸಲಾಗಿದೆ.
ಈ ಹಿಂದೆ ಹೊರಡಿಸಿದ್ದ ಆದೇಶವು ಭಾರಿ ಟೀಕೆ ಒಳಗಾದ ಕಾರಣ ಸಾರ್ವಜನಿಕರು ಮತ್ತು ಪ್ರವಾಸಿಗರು ತಮ್ಮ ಮೊಬೈಲ್ ಅಥವಾ ಕ್ಯಾಮೆರಾ ಬಳಸಿ ಛಾಯಾಚಿತ್ರ ತೆಗೆದುಕೊಳ್ಳಲು ರ್ನಿಬಂಧ ಇರುವುದಿಲ್ಲ.
ಆಹಾರ ಸೇವನೆಗೂ ಕೊಕ್:
ಉದ್ಯಾನವನದೊಳಗೆ ಪ್ರಕೃತಿ, ಸಸ್ಯ ಅಥವಾ ವನ್ಯಜಿವಿ ಛಾಯಾಗ್ರಹಣ ಮಾಡಲು ಬಯಸುವವರು ಇಲಾಖೆಯಿಂದ ಅನುಮತಿ ಪಡೆದು ಚಿತ್ರೀಕರಿಸಬೇಕು. ಸೈಕ್ಲಿಂಗ್ ಮತ್ತು ಸ್ಕೇಟಿಂಗ್ನಂತಹ ಚಟುವಟಿಕೆಗೆ ಅನುಮತಿ ನೀಡಿದ್ದರೂ, ಸರ್ಕಾರವು ಉದ್ಯಾನದಲ್ಲಿ ತರಗತಿ, ತರಬೇತಿ ನಡೆಸುವಂತಿಲ್ಲ. ಪರಿಸರ ವ್ಯವಸ್ಥೆಗೆ ಅಪಾಯವನ್ನುಂಟು ಮಾಡುವ ಬಲೂನ್, ಗಾಳಿಪಟ ಇತ್ಯಾದಿಯೊಂದಿಗೆ ಉದ್ಯಾನವನದೊಳಗೆ ಆಟವಾಡುವುದನ್ನು ಹಾಗೂ ಆಹಾರ ಸೇವನೆಗೆ ನಿಷೇಧ ಹೇರಲಾಗಿದೆ.
