ಕಾರವಾರ: ನಿಸರ್ಗ ಚಂಡಮಾರುತದಿಂದಾಗಿ ಕಾರವಾರದಲ್ಲಿ ಎರಡನೇ ದಿನವೂ ಭಾರಿ ಮಳೆಯಾಗಿದೆ. ಶಿರಸಿ ಸೇರಿ ಜಿಲ್ಲೆಯ ವಿವಿಧೆಡೆ ಹದವಾಗಿ ಮಳೆಯಾಗಿದೆ. ಬುಧವಾರ ಬೆಳಗಿನ ವರದಿಯಂತೆ ಹಿಂದಿನ 24 ಗಂಟೆಗಳ ಅವಧಿಯಲ್ಲಿ ಕಾರವಾರದಲ್ಲಿ 154 ಮಿ.ಮೀ. ಮಳೆಯಾಗಿದೆ. ಬುಧವಾರ ಬೆಳಗ್ಗೆ 8 ರಿಂದ ಸಂಜೆ 5.30 ರವರೆಗೆ 124.1 ಮಿ.ಮೀ. ಮಳೆಯಾಗಿದೆ. ಮಧ್ಯಾಹ್ನ 3 ರ ನಂತರ ಮಳೆ ಕೊಂಚ ಬಿಡುವು ನೀಡಿದೆ. ಜಿಲ್ಲೆಯಲ್ಲಿ ಇನ್ನೂ ಒಂದು ದಿನ ಮಳೆ ಹಾಗೂ ಗಾಳಿ ಇರಲಿದೆ ಎಂದು ಹವಾಮಾನ ಇಲಾಖೆ ಎಚ್ಚರಿಸಿದೆ. ಮಳೆಯಿಂದಾಗಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಅರಗಾ ಸಮೀಪ ನೀರು ತುಂಬಿದೆ. ಅರಗಾ, ಬಿಣಗಾ ಭಾಗದಲ್ಲಿ ಹೆದ್ದಾರಿಯ ಪಕ್ಕ ಗುಡ್ಡ ಕುಸಿತ ಪ್ರಾರಂಭವಾಗಿದೆ. ಭಾರಿ ಗಾಳಿಯಿಂದ ಕಾರವಾರದ ಮಾಜಾಳಿ, ದೇವಬಾಗ ಭಾಗದಲ್ಲಿ ಕಡಲ ಅಬ್ಬರ ಹೆಚ್ಚಿ ಸಮುದ್ರ ಕೊರೆತ ಉಂಟಾಗುತ್ತಿದೆ.
ರೈಲುಗಳ ಮಾರ್ಗ ಬದಲಾವಣೆ: ನಿಸರ್ಗದ ಚಂಡಮಾರುತದ ಕಾರಣದಿಂದ ಕೊಂಕಣ ರೈಲ್ವೆ ಮಾರ್ಗದಲ್ಲಿ ತೆರಳಬೇಕಿದ್ದ 3 ವಿಶೇಷ ರೈಲುಗಳ ಮಾರ್ಗವನ್ನು ಬದಲಾಯಿಸಲಾಗಿದೆ. ಮಂಗಳವಾರ ತೆರಳಬೇಕಿದ್ದ ಎರ್ನಾಕುಲಂ- ಹಜರತ್ ನಿಜಾಮುದ್ದೀನ್, ತಿರುವನಂತಪುರಂ- ಮುಂಬೈ ರೈಲುಗಳನ್ನು ಮಡಗಾಂವ್ ಜಂಕ್ಷನ್ನಿಂದ ಲೋಂಡಾ, ಮೀರಜ್- ಪುಣೆ ಮಾರ್ಗವಾಗಿ ಓಡಿಸಲಾಗುತ್ತಿದೆ. ನವದೆಹಲಿ- ತಿರುವನಂತಪುರಂ ರೈಲನ್ನು ಸೂರತ್, ವಾಸೈರೋಡ್, ಕಲ್ಯಾಣ, ಮೀರಜ್ ಲೋಂಡಾ, ಮಡಗಾಂವ ಮಾರ್ಗವಾಗಿ ಓಡಿಸಲಾಗುತ್ತಿದೆ. ಮುಂಬೈ- ತಿರುವನಂತಪುರಂ ವಿಶೇಷ ರೈಲನ್ನು ಬುಧವಾರ 18 ತಾಸು ವಿಳಂಬವಾಗಿ ಓಡಿಸಲಾಗಿದೆ.
