ಜೊಯಿಡಾ: ಸುಗ್ಗಿ ಹಬ್ಬದ ಪ್ರಯುಕ್ತ ತಾಲೂಕಿನ ಗುಂದ ಗ್ರಾಮದ ಕುಣಬಿ ತಂಡದವರು ಗ್ರಾಮ ದೇವರಿಗೆ ಶುಕ್ರವಾರ ಪೂಜೆ ಸಲ್ಲಿಸಿದರು. ಶನಿವಾರದಿಂದ ವಿವಿಧ ಗ್ರಾಮಗಳಲ್ಲಿ ಸುಗ್ಗಿ ಕುಣಿತ ಪ್ರದರ್ಶನಗೊಳ್ಳಲಿದೆ. ಮನೆಮನೆಗೆ ತೆರಳಿ ‘ಸೈನಕೊಲೆ ಮತಿನ ಬೊಲೆ’ ಎನ್ನುವ ಕೊಂಕಣಿ ಹಾಡಿಗೆ ಕುಣಿಯುವ ತಂಡಕ್ಕೆ ಗ್ರಾಮಸ್ಥರು ಊಟೋಪಹಾರ ನೀಡಿ ಸತ್ಕರಿಸುತ್ತಾರೆ. ಬಣ್ಣ ಬಣ್ಣದ ಬಟ್ಟೆ ಧರಿಸಿ ಶೃಂಗರಿಸಿಕೊಂಡ ಸುಗ್ಗಿ ಕುಣಿತದ ತಂಡಗಳು ಒಮ್ಮೆ ಧರಿಸಿದ ಬಟ್ಟೆಗಳನ್ನು ಮತ್ತೊಮ್ಮೆ ಬಳಸುವುದಿಲ್ಲ. ಹೋಳಿಯ ಸಂದರ್ಭದಲ್ಲಿ 5 ದಿನ ಊರ ಹೊರಗೆ ಇದ್ದು, ಸುಗ್ಗಿ ಕುಣಿಯುವುದು ವಿಶೇಷ. ಗುಂದದ ತಂಡ ತಾಲೂಕಿನ ಇತರ ಸುಗ್ಗಿ ತಂಡಕ್ಕಿಂತಲೂ ವಿಶಿಷ್ಟವಾಗಿದೆ. ತಾಲೂಕಿನ ತೆರಾಳಿ, ಕುಂಡಲ್, ಕೆಲೋಲಿ, ಕಾರಸಿಂಗಳ, ಪಾಟ್ನೆ, ಭಾರಾಡೆ, ಶಿಸೈ, ಕುಶಾವಳಿ ತಂಡಗಳು ಬೇರೆ ಬೇರೆ ಗ್ರಾಮಗಳಲ್ಲಿ ಮಾ. 7 ರಿಂದ ಸುಗ್ಗಿ ಕುಣಿಯುವುದು ವಿಶೇಷವಾಗಿದೆ.</
