ತಿಟ್ಟಮಾರನಹಳ್ಳಿ ಗ್ರಾಮದ ಸಭೆಯಲ್ಲಿ ಕೆಲವರು ಗ್ರಾಮಾಂತರ ಪಿಎಸ್ ಐ ಲಿಯಾಕತ್ ವಿರುದ್ಧ ಶಾಸಕರಿಗೆ ದೂರು ಸಲ್ಲಿಸಿದರು. ಆ ಅಧಿಕಾರಿ ಹಣ ಕೊಟ್ಟವರ ಪರವಾಗಿ ಕರ್ತವ್ಯ ನಿರ್ವಹಿಸುತ್ತಾರೆ. ಜಮೀನು ವ್ಯಾಜ್ಯ ನ್ಯಾಯಾಲಯದಲ್ಲಿದ್ದು, ಹಣ ಪಡೆದುಕೊಂಡು ಒಬ್ಬರ ಪರವಾಗಿ ಸಹಾಯ ಮಾಡಿದ್ದಾರೆ ಎಂದು ಗಂಭೀರವಾಗಿ ದೂರಿದರು. ಇದರೊಂದಿಗೆ, ಗ್ರಾಮದ ಕೆರೆಏರಿ ಮೇಲೆ ಅಳವಡಿಸಿರುವ ತಡೆಗೋಡೆಯನ್ನು ಕಳ್ಳರು ಕದಿಯುತ್ತಿದ್ದಾರೆ. ಈ ಬಗ್ಗೆ ದೂರು ಸಲ್ಲಿಸಿದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಪಿಎಸ್ಐ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದರು. ಕೂಡಲೇ ಪಿಎಸ್ ಐ ಲಿಯಾಕತ್ ರವರಿಗೆ ದೂರವಾಣಿ ಕರೆ ಮಾಡಿದ ಶಾಸಕರು, ಎಲ್ಲರ ಎದುರು ಅಧಿಕಾರಿಯನ್ನು ತೀವ್ರ ತರಾಟೆಗೆ ಪಡೆದರು. ನಿನ್ನ ಬಗ್ಗೆ ಸಾಕಷ್ಟು ದೂರುಗಳು ಕೇಳಿಬರುತ್ತಿವೆ. ಸಾರ್ವಜನಿಕ ವಸ್ತುಗಳನ್ನು ಕದ್ದವರನ್ನು ಕೂಡಲೇ ಕಂಡುಹಿಡಿದು, ಅವರಿಂದ ರಿಕವರಿ ಮಾಡಿ. ಯಾವುದೇ ಸ್ಟೇ ಇರುವ ಜಮೀನಿಗೆ ಬೇಲಿಹಾಕಿಸುವುದಲ್ಲ. ರಿಯಲ್ ಎಸ್ಟೇಟ್ ಯಾಕಣ್ಣ ನಿನಗೆ? ಎಂದು ಕಿಡಿಕಾರಿದರು.
