ಗುಡುಗು ಸಹಿತ ಮಳೆ ಬುಧವಾರ ಸಂತೆ ಅಸ್ತವ್ಯಸ್ತ

ಕಕ್ಕೇರಾ: ಬುಧವಾರ ಬೆಳಗಿನ ಜಾವ ಆರಂಭವಾದ ಭಾರಿ ಮಳೆಯಿಂದಾಗಿ ವಾರದ ಸಂತೆ ಅಸ್ತವ್ಯಸ್ತಗೊಂಡು ವ್ಯಾಪಾರಸ್ಥರು ಅತೀವ ನಷ್ಠ ಅನುಭವಿಸುವಂತಾಯಿತು.

ಪಟ್ಟಣದ ಮಾರುಕಟ್ಟೆಗೆ ನಿರೀೆಯಂತೆ ಪ್ರತಿ ಬುಧವಾರಕ್ಕೊಮ್ಮೆ ಬೆಳಗಿನ ಜಾವ ದೂರದ ಲಿಂಗಸೂಗೂರು, ದೇವದುರ್ಗ, ಸುರಪುರ, ಶಹಾಪುರ, ಮುದ್ದೇಬಿಹಾಳ, ನಾಲತವಾದ, ತಾಳಿಕೋಟೆ, ಹುಣಸಗಿ, ಕೊಡೇಕಲ್​, ಗುರುಗುಂಟಾ, ನಾರಾಯಣಪುರ ಸೇರಿ ಇತರೆ ಪಟ್ಟಣಗಳಿಂದ ಭಾರಿ ಪ್ರಮಾಣದಲ್ಲಿ ವ್ಯಾಪಾರಸ್ಥರು ಆಗಮಿಸಿ ಭರ್ಜರಿ ಲಾಂತರ ರೂ. ವ್ಯಾಪಾರ&ವಹಿವಾಟು ನಡೆಸುತ್ತಾರೆ.

ಅದರಂತೆ ರೈತರೂ ಸಹ ಬೆಳೆದ ವಿವಿಧ ತರಹದ ತರಕಾರಿ, ಸೊಪ್ಪು ಸೇರಿ ಅನೇಕ ದಿನಸಿಗಳೊಂದಿಗೆ ಮಾರುಕಟ್ಟೆಗೆ ಆಗಮಿಸುತ್ತಿದ್ದಂತೆ ಬೆಳಗಿನ 6ರ ಸುಮಾರಿಗೆ ಆರಂಭವಾದ ಭಾರಿ ಪ್ರಮಾಣದ ಗುಡುಗು ಮಿಶ್ರಿತ ಮಳೆ ಧರೆಗಿಳಿಯುತ್ತಿದ್ದಂತೆ ವ್ಯಾಪಾರಸ್ಥರು ಕಂಗಾಲಾಗಿ ತಂದ ವಸ್ತುಗಳನ್ನು ಮಾರುಕಟ್ಟೆ ಆವರಣದಲ್ಲಿ ಬಿಟ್ಟು ಆಶ್ರಯದ ಮೊರೆ ಹೋದರು.

ಸುಮಾರು 5 ತಾಸುಗಳವರೆಗೆ ಬಿಡದೇ ಸುರಿಯಿತು. ಮಳೆಗೆ ತರಕಾರಿ, ಸೊಪ್ಪು ತಾಜಾಗೊಂಡರೆ ಕಾಳು&ಕಡಿ ವ್ಯಾಪಾರಸ್ಥರು ತಮ್ಮ ವಾಹನಗಳಲ್ಲಿಯೇ ಇರಿಸಿಕೊಂಡಿದ್ದರು. ಮದ್ಯಾಹ್ನದ ಹೊತ್ತಿಗೆ ಮಳೆ ಪ್ರಮಾಣ ಕಡಿಮೆಯಾಗುತ್ತಿದ್ದಂತೆ ಗ್ರಾಹಕರು ಸಂತೆಗೆ ಆಗಮಿಸಿ ಭರ್ಜರಿ ವ್ಯಾಪಾರ ವಹಿವಾಟು ನಡೆಸಿ ಸಂತೆಗೆ ಮೆರಗು ತಂದರು. ಸಂಜೆಯಾಗುತ್ತಿದ್ದಂತೆ ಧಗೆ ಆವರಿಸಿ ಮೋಡ ಕವಿದಿತ್ತು.

ಬಕ್ರೀದ್​ ಭರ್ಜರಿ ವ್ಯಾಪಾರ: ಗುರುವಾರ ಬಕ್ರೀದ್​ ಹಬ್ಬದ ನಿಮಿತ್ತ ಸಂತೆಯಲ್ಲಿ ಮಸಾಲೆ ದಿನಸಿ ವಸ್ತುಗಳು, ಕೊತ್ತಂಬರಿ, ಪುದಿನಾ ಸೇರಿ ಇತರೆ ವಸ್ತುಗಳು ಹೆಚ್ಚಿನ ಪ್ರಮಾಣದಲ್ಲಿ ಮಾರಾಟವಾದವು. ಈ ವೇಳೆ ಮಿರಗಾ ಕೂಡುವ ಮುನ್ನವೇ ಪೂರ್ವ ಮುಂಗಾರು ಮಳೆಯಿಂದಾಗಿ ರೈತರ ಮೊಗದಲ್ಲಿ ಮಂದಹಾಸ ಮೂಡಿದ್ದು, ಜಮೀನುಗಳ ಸ್ವಚ್ಛತೆ, ಹದ ಮಾಡುವ ಮೂಲಕ ಹತ್ತಿ ಬೀಜ ಊರಲು ಭರ್ಜರಿ ಸಿದ್ಧತೆ ನಡೆಸುತ್ತಿದ್ದಾರೆ.