ಅಭಿವೃದ್ಧಿ ಜತೆಗೆ ಆಡಳಿತದಲ್ಲೂ ಪ್ರಾದೇಶಿಕ ಸಮತೋಲನ ಕಾಯ್ದುಕೊಳ್ಳುವ ಉದ್ದೇಶದಿಂದ ಕುಮಾರಸ್ವಾಮಿ, ಯಡಿಯೂರಪ್ಪ ಆಡಳಿತಾವಧಿಯಲ್ಲಿ ಒಟ್ಟು 10 ಕಚೇರಿಗಳ ಸ್ಥಳಾಂತರಕ್ಕೆ ನಿರ್ಧರಿಸಿದ್ದು, ಅಧಿಕೃತ ಆದೇಶ ಹೊರಡಿಸಲಾಗಿದೆ. ಈ ಪೈಕಿ ಬೆಳಗಾವಿಯ ಸುರ್ವಣಸೌಧದಲ್ಲಿ ಕರ್ನಾಟಕ ಮಾಹಿತಿ ಆಯೋಗದ ಪೀಠವು ಕಾರ್ಯಾರಂಭಿಸಿದ್ದು, ಜೂ.22ರಿಂದ ಕಾರ್ಯ-ಕಲಾಪ ಆರಂಭಿಸಿದೆ. ಬೆಳಗಾವಿಗೆ ಜವಳಿ ಅಭಿವೃದ್ಧಿ ನಿಗಮದ ಕಚೇರಿ ಸ್ಥಳಾಂತರವಾಗಿ 2019, ಅ.1ರಿಂದ ಕಾರ್ಯನಿರತವಾಗಿದೆ. ಮೈಸೂರಿನಲ್ಲಿದ್ದ ಪುರಾತತ್ವ ಸಂಗ್ರಹಾಲಯಗಳು, ಪರಂಪರೆ ಇಲಾಖೆ ಕಚೇರಿ ಹಂಪಿಗೆ ಸ್ಥಳಾಂತರವಾಗಿದ್ದು, 2019 ಏಪ್ರಿಲ್ನಿಂದ ಹಂಪಿಯಲ್ಲಿ ಉಪ ನಿರ್ದೇಶಕರ ಕಚೇರಿ ಕಾರ್ಯಾರಂಭಿಸಿದೆ. ಧಾರವಾಡಕ್ಕೆ ರಾಜ್ಯ ಮಾನವಹಕ್ಕು ಆಯೋಗದ ಒಬ್ಬ ಸದಸ್ಯ, ಒಂದು ಉಪ ಲೋಕಾಯುಕ್ತ ಕಚೇರಿ ಸ್ಥಳಾಂತರ ಆಡಳಿತಾತ್ಮಕ ತೊಡಕಿನಿಂದ ಕೈಬಿಡಲಾಗಿದೆ. ಅಧಿಕಾರಿಗಳ ಹಿಂದೇಟು, ಕಾನೂನು-ತಾಂತ್ರಿಕ ಅಡಚಣೆಯಿಂದ ಉಳಿದ ಕಚೇರಿಗಳ ಸ್ಥಳಾಂತರ ಕಾಗದದ ಮೇಲೆ ಉಳಿದುಕೊಂಡಿವೆ.
