ಪ್ರಕರಣದ ಹಿನ್ನೆಲೆ: ಸಾಮಾನ್ಯ ವರ್ಗದ ಮಾರಮ್ಮ ಕೃಷಿಕ ಬಡ ಕುಟುಂಬದ ಮಹಿಳೆ. ಇತ್ತೀಚೆಗೆ ಕೃಷಿ ಜಮೀನು ಸರ್ವೇ, ಗಡಿರೇಖೆ ಗುರುತಿಸುವ ವಿಚಾರವಾಗಿ ವಂಟೀರವಾಂಡ್ಲಪಲ್ಲಿಯ ಎಸ್ಟಿ ಜನಾಂಗದ ನರಸಿಂಹಪ್ಪ ಹಾಗೂ ಮಾರಮ್ಮ ಕುಟುಂಬ ಸದಸ್ಯರ ನಡುವೆ 2024ರ ಜನವರಿಯಲ್ಲಿ ಜಗಳ ನಡೆದು, ಎರಡು ಗುಂಪಿನವರು ಪಾತಪಾಳ್ಯ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದರು. ಇದೇ ವೇಳೆ ಕೆಲ ಮುಖಂಡರ ಒತ್ತಡಕ್ಕೆ ಮಣಿದು ಮಾರಮ್ಮ ಹಾಗೂ ಅವರ ಕುಟುಂಬ ಸದಸ್ಯರ ವಿರುದ್ಧ ಅಟ್ರಾಸಿಟಿ ಕೇಸ್ ದಾಖಲಿಸಲಾಗಿತ್ತು ಎನ್ನಲಾಗಿದೆ. ನ್ಯಾಯಾಲಯದಲ್ಲಿ ವಿಚಾರಣೆ ಅಂತಿಮ ಟ್ಟದಲ್ಲಿರುವ ಸಮಯದಲ್ಲಿ ಎರಡು ಗುಂಪಿನ ನಡುವೆ ರಾಜಿ ನಡೆಸಿ ಕೇಸ್ ಖುಲಾಸೆಗೊಳಿಸುವುದಾಗಿ ದಲಿತ ಮುಖಂಡರೊಬ್ಬರು ಮಾರಮ್ಮ ಕುಟುಂಬಕ್ಕೆ ಭರವಸೆ ನೀಡಿದ್ದು, ಪ್ರಕರಣದ ಇತ್ಯರ್ಥಕ್ಕೆ ಹಣದ ಗೊಂದಲ ಉಂಟಾಗಿ ಸಂಧಾನ ಮುರಿದು ಬಿದ್ದಿತ್ತು ಎನ್ನಲಾಗಿದೆ. ಇದರ ನಡುವೆ ಆ.28 ರಂದು ಜಿಲ್ಲಾ ನ್ಯಾಯಾಲಯಕ್ಕೆ ಆಗಮಿಸಿದ್ದ ಮಾರಮ್ಮ (54) ಮತ್ತು ಕುಟುಂಬ ಸದಸ್ಯರಿಗೆ ಸಂಧಾನದ ಸೂತ್ರಧಾರಿಯೇ ಒಂದು ಗತಿ ಕಾಣಿಸಿ ಜೈಲಿಗೆ ಕಳುಹಿಸುವ ಬೆದರಿಕೆ ಹಾಕಿದ್ದಾನೆ. ಇದರ ಭಯದಲ್ಲಿ ವಿಚಾರಣೆಗೆ ಹಾಜರಾದ ಮಾರಮ್ಮ ಹೃದಯಾಘಾತವಾಗಿ ನ್ಯಾಯಾಲಯದಲ್ಲೆ ಕುಸಿದು ಬಿದ್ದಿದ್ದಾರೆ.
