ರಾಜರಾಜೇಶ್ವರಿನಗರದಲ್ಲಿ ಕಾಂಗ್ರೆಸ್​ಗೆ ಸಲೀಸಲ್ಲ!; ಆಂತರಿಕ ಸಮೀಕ್ಷೆಯಿಂದ ಕೈಗೆ ನಡುಕ..

| ಶ್ರೀಕಾಂತ್ ಶೇಷಾದ್ರಿ, ಬೆಂಗಳೂರು

ಕಾಂಗ್ರೆಸ್​ನ ಪ್ರಮುಖ ನಾಯಕರು ಪ್ರತಿಷ್ಠೆಯಾಗಿ ತೆಗೆದು ಕೊಂಡಿರುವ ಆಸ್.ಆರ್. ನಗರ ವಿಧಾನಸಭಾ ಕ್ಷೇತ್ರದ ಉಪ ಚುನಾವಣೆಗೆ ಕೆಲವೇ ದಿನಗಳು ಬಾಕಿ ಇರುವಾಗ ನಿರೀಕ್ಷಿತ ಮಟ್ಟದಲ್ಲಿ ಕ್ಷೇತ್ರ ಹಿಡಿತಕ್ಕೆ ಸಿಗುತ್ತಿಲ್ಲ ಎಂಬ ವರದಿ ಪಕ್ಷದ ಕೈಸೇರಿದೆ. 4 ಲಕ್ಷಕ್ಕೂ ಹೆಚ್ಚು ಮತದಾರರಿರುವ ಮತ್ತು ಚದುರಿದಂತೆ ಬೇರೆ ಬೇರೆ ಭೌಗೋಳಿಕ ವಾತಾವರಣದಲ್ಲಿರುವ ಈ ಕ್ಷೇತ್ರದ ಜನರ ಮನಸ್ಸಿನಲ್ಲೇನಿದೆ ಎಂದು ನಡೆಸಿದ ಆಂತರಿಕ ಸಮೀಕ್ಷೆ ಪಕ್ಷದ ನಾಯಕರಲ್ಲಿ ಬೆವರು ತರಿಸಿದೆ ಎಂದು ಮೂಲಗಳು ತಿಳಿಸಿವೆ. 

ಒಕ್ಕಲಿಗರ ಬಾಹುಳ್ಯದ ಕ್ಷೇತ್ರದಲ್ಲಿ ಡಿ.ಕೆ.ರವಿ ಪತ್ನಿ ಎಚ್. ಕುಸುಮಾ ಅವರನ್ನು ಕಣಕ್ಕಿಳಿಸಿದರೆ ವಿವಿಧ ಆಯಾಮಗಳಲ್ಲಿ ಪಕ್ಷಕ್ಕೆ ಒಳಿತಾಗುತ್ತದೆ ಎಂದು ಪಕ್ಷ ಭಾವಿಸಿತ್ತು. ಒಕ್ಕಲಿಗ ಮತ ಕ್ರೋಡೀಕರಣ, ಮಹಿಳೆ, ಎಲ್ಲಕ್ಕಿಂತ ಮುಖ್ಯವಾಗಿ ಅನುಕಂಪದ ಮತಗಳು ಮತ್ತು ಕಾಂಗ್ರೆಸ್​ನ ಸಾಂಪ್ರದಾಯಿಕ ಮತಗಳು ಸೇರಿದರೆ ಈ ಸಮೀಕರಣದ ಮೂಲಕ ಕ್ಷೇತ್ರ ಗೆಲ್ಲಬಹುದು ಎಂದು ಕಾಂಗ್ರೆಸ್ ಲೆಕ್ಕಹಾಕಿತ್ತು.

ಆದರೆ, ಸಮೀಕ್ಷೆಯಲ್ಲೂ ಪಕ್ಷ ಅಂದುಕೊಂಡ ವಾತಾವರಣ ಸೃಷ್ಟಿಯಾಗಿಲ್ಲ ಎಂಬ ಅಂಶ ಸಿಕ್ಕಿದೆ. ಒಕ್ಕಲಿಗ ಮತಗಳು ಹೆಚ್ಚು ಪ್ರಮಾಣದಲ್ಲಿ ಬಂದರೂ ಜೆಡಿಎಸ್ ಮತ್ತು ಬಿಜೆಪಿ ಕೂಡ ಒಂದಷ್ಟು ಪ್ರಮಾಣದಲ್ಲಿ ಪಡೆಯಬಹುದು, ಹಿಂದುಳಿದ ವರ್ಗದ ಮತ ಕಾಂಗ್ರೆಸ್​ಗೆ ಕಡಿಮೆ ಪ್ರಮಾಣದಲ್ಲಿ ಸಿಗಲಿದೆ, ಜತೆಗೆ ಎಸ್ಸಿ ಮತಗಳು ಬಿಜೆಪಿಗೆ ಹೆಚ್ಚು ಪ್ರಮಾಣದಲ್ಲಿ ಹೋಗುವ ಸಾಧ್ಯತೆ ಕಾಣಿಸಿದೆ. ಇದೆ ಕಾರಣಕ್ಕೆ ಒಕ್ಕಲಿಗ ಮತಗಳ ಪ್ರಮಾಣ ಹೆಚ್ಚಿಸಲು ಸರ್ಕಸ್ ನಡೆಸಿದ್ದಾರೆ. ಬಿಜೆಪಿಗರು ಮುನಿರತ್ನ ಪರವಾಗಿ ತಳಮಟ್ಟದಲ್ಲಿ ಕೈಜೋಡಿಸಿಲ್ಲ ಎಂಬುದು ಕಾಂಗ್ರೆಸ್​ಗೆ ಲಾಭಕರವಾದೀತು ಎಂಬ ಆಶಾಭಾವನೆಯಲ್ಲೇ ಪಕ್ಷದ ನಾಯಕರಿದ್ದಾರೆ.

ಸಮೀಕ್ಷೆ ಹೇಗಾಯ್ತು?

ನಾಲ್ಕು ಲಕ್ಷ ಪ್ಲಸ್ ಮತದಾರ ನಾಡಿಮಿಡಿತ ಏನಿದೆ ಎಂಬುದನ್ನು ತಿಳಿಯುವ ಪ್ರಯತ್ನ ಪಕ್ಷದಿಂದ ಮಾಡಲಾಗಿತ್ತು. ಶೇ.2 ಮತದಾರರನ್ನು ತಲುಪುವಲ್ಲಿ ಪಕ್ಷ ಸಫಲವಾಗಿದ್ದು, ಅವರಲ್ಲಿನ ಅಭಿಪ್ರಾಯ ಹೆಕ್ಕಿ ಕ್ಷೇತ್ರದ ಮೇಲೆ ಹಿಡಿತ ಸಾಧಿಸಲು ಆಗಬೇಕಾದ ಕೆಲಸಗಳ ಬಗ್ಗೆ ಪಕ್ಷ ಗಮನ ನೀಡಿದೆ ಎಂದು ಹಿರಿಯ ಮುಖಂಡರೊಬ್ಬರು ‘ವಿಜಯವಾಣಿ’ಗೆ ತಿಳಿಸಿದ್ದಾರೆ.

ಪಕ್ಷ ಕಂಡುಕೊಂಡ ಮುಖ್ಯಾಂಶ

• ಮೂಲ ಬಿಜೆಪಿಗರು, ಸಂಘ ಪರಿವಾರ ಕ್ಷೇತ್ರದಲ್ಲಿ ಅಭ್ಯರ್ಥಿ ಪರವಾಗಿ ತೊಡಗಿಕೊಂಡಿಲ್ಲದೆ ಇರುವುದೇ ಕಾಂಗ್ರೆಸ್​ಗೆ ದೊಡ್ಡ ಪ್ಲಸ್ ಪಾಯಿಂಟ್.
• ಕರೊನಾ ಲಾಕ್​ಡೌನ್ ಸಂದರ್ಭದಲ್ಲಿ ಪರಿಹಾರ ಕಾರ್ಯಾಚರಣೆಯಲ್ಲಿ ಮುನಿರತ್ನ ತೊಡಗಿ ಕೊಂಡಿದ್ದು ಇದೀಗ ಅವರಿಗೆ ಹೆಚ್ಚು ಲಾಭ ತರಲಿದೆ.
• ಸ್ಲಂಗಳ ಮೇಲೆ ಮುನಿರತ್ನ ಹೆಚ್ಚಿನ ಹಿಡಿತವಿದೆ. ತಮಿಳು, ತೆಲುಗು ಭಾಷಿಗರ ಮತಗಳು ಅವರಿಗೆ ಹೆಚ್ಚಿನ ಅನುಕೂಲವಾಗಬಹುದು.
• ಒಕ್ಕಲಿಗರ ಮತಗಳು ಮೂರು ಪಕ್ಷಕ್ಕೆ ಸಮಾನ ಹಂಚಿಕೆಯಾಗುವುದರಿಂದ ಪಕ್ಷಕ್ಕೆ ಹೆಚ್ಚಿನ ಲಾಭವಾಗುತ್ತಿಲ್ಲ. ಸಮಗ್ರವಾಗಿ ಮತ ಲಭಿಸಿದ್ದರೆ ಕಡಿಮೆ ಪ್ರಯತ್ನ ಸಾಕಿತ್ತು.
• ಮುನಿರತ್ನ ವಿರುದ್ಧ ಒಂದಷ್ಟು ಅಸಮಾಧಾನವಿದೆ, ಋಣಾತ್ಮಕ ಅಂಶಗಳಿವೆ. ಅದು ಕಾಂಗ್ರೆಸ್​ಗೆ ವರವಾದಲ್ಲಿ ಲಾಭವಾಗಬಹುದು. ಹೀಗಾಗಿ ಆ ವಿಷಯಗಳನ್ನು ಹೆಚ್ಚು ಚರ್ಚೆಯಾಗಬೇಕು.