ಕೃಷಿ ಭೂಮಿಯಲ್ಲೇ ಟೌನ್​ಶಿಪ್​ ನಿರ್ಮಾಣ ಏಕೆ?

ಸರ್ಕಾರಕ್ಕೆ ವಿಪಕ್ಷ ನಾಯಕ ಆರ್​.ಅಶೋಕ್​ ಪ್ರಶ್ನೆ | ಬೈರಮಂಗಲ&ಕಂಚುಗಾರನಹಳ್ಳಿ ಭೂಸ್ವಾಧಿನ ವಿರೋಧಿ ಹೋರಾಟಕ್ಕೆ ಬಿಜೆಪಿ ನಾಯಕರ 'ಬಲ'

 ಬಿಡದಿ: ಹೌಸಿಂಗ್​ ಬೋರ್ಡ್​ನವರು ಬೆಂಗಳೂರಿನಲ್ಲಿ ನೂರಾರು ಎಕರೆಯನ್ನು ಸ್ವಾಧಿನಕ್ಕೆ ಪಡೆದು, ಮನೆಗಳನ್ನು ಕಟ್ಟಿದ್ದಾರೆ. ಅವೇ ಖಾಲಿ ಬಿದ್ದಿವೆ. ಹೀಗಿದ್ದರೂ ಬಿಡದಿಯಲ್ಲಿ ಸ್ಮಾರ್ಟ್​ ಸಿಟಿ ನಿರ್ಮಿಸಿ ಏನು ಸಾಧನೆ ಮಾಡುತ್ತಾರೆ? ಎಂದು ರಾಜ್ಯ ಸರ್ಕಾರದ ವಿರುದ್ಧ ವಿಧಾನಸಭೆ ವಿಪಕ್ಷ ನಾಯಕ ಆರ್​.ಅಶೋಕ್​ ಕಿಡಿಕಾರಿದರು.

ಬಿಡದಿ ಭೂಸ್ವಾಧಿನ ವಿರೋಧಿಸಿ ಬೈರಮಂಗಲದ ಶ್ರೀರಾಮ ದೇಗುಲ ಬಳಿ ಬೈರಮಂಗಲ&ಕಂಚುಗಾರನಹಳ್ಳಿ ರೈತರ ಭೂಹಿತರಕ್ಷಣಾ ಸಮಿತಿ ಹಮ್ಮಿಕೊಂಡಿರುವ ಅಹೋರಾತ್ರಿ ಧರಣಿ ಸ್ಥಳಕ್ಕೆ ಮಂಗಳವಾರ ಭೇಟಿ ನೀಡಿ, ಪ್ರತಿಭಟನಾ ನಿರತ ರೈತರಿಗೆ ಬೆಂಬಲ ಸೂಚಿಸಿ ಮಾತನಾಡಿದರು.

ಬೆಂಗಳೂರಿನಲ್ಲಿ ಬಿಡಿಎಯಿಂದ ನಿರ್ಮಿಸಿರುವ 8 ಲ ಪ್ಲಾಟ್​ಗಳೇ ಖಾಲಿ ಬಿದ್ದಿವೆ. ಆ ಪ್ಲಾಟ್​ಗಳಿಗೆ ನೀರು, ವಿದ್ಯುತ್​ ಸೇರಿ ಬೇಕಿರುವ ಸೌಕರ್ಯಗಳನ್ನು ಮೊದಲು ಕಲ್ಪಿಸಲಿ. ಆನಂತರ ಇಲ್ಲಿ ಸಿಟಿ ನಿರ್ಮಿಸಲಿ ಎಂದರು.

ಈ ಹಿಂದೆ ನಮ್ಮ ಸರ್ಕಾರವಿದ್ದಾಗ ಯಾವುದೇ ಭೂಸ್ವಾಧಿನಕ್ಕೆ ಕೈ ಹಾಕಿರಲಿಲ್ಲ. ಆದರೀಗ ರಾಜ್ಯದ ಮುಗ್ಧ ಜನರಿಗೆ ಕೂಪನ್​ ಕೊಟ್ಟು ಸದ್ಯ ಕತ್ತಲೆ ಕೂಪಕ್ಕೆ ತಳ್ಳಿರುವ ಈ ಕಾಂಗ್ರೆಸ್​ ಸರ್ಕಾರ ಇನ್ನು ಎರಡು ವರ್ಷ ಮಾತ್ರ ಇರುತ್ತದೆ. ಅಲ್ಲಿಯವರೆಗೆ ರೈತರ ಈ ಹೋರಾಟಕ್ಕೆ ನಮ್ಮ ಬೆಂಬಲ ಸದಾ ಇರಲಿದೆ ಎಂದು ಆರ್​.ಅಶೋಕ್​ ಅಭಯ ನೀಡಿದರು.

ಬಿಜೆಪಿ ಜಿಲ್ಲಾಧ್ಯಕ್ಷ ಎಂ.ಎನ್​.ಆನಂದಸ್ವಾಮಿ, ಬಿಜೆಪಿ ಮುಖಂಡರಾದ ಕೆ.ಆರ್​.ಪ್ರಸಾದ್​ ಗೌಡ, ಗೌತಮ್​ ಗೌಡ ಹೋರಾಟ ಸಮಿತಿಯ ರಾಮಯ್ಯ, ಮಂಡಲಹಳ್ಳಿ ನಾಗರಾಜು, ಪ್ರಕಾಶ್​, ಶೀನಪ್ಪ ರೆಡ್ಡಿ, ರಾಧಾಕೃಷ್ಣ, ಕೃಷ್ಣ, ಅಶ್ವತ್ಥ, ರೇವಣ್ಣ, ಶಿವರಾಮು ಹಾಗೂ ರೈತರು ಉಪಸ್ಥಿತರಿದ್ದರು.

ಯಾವುದೇ ಕಾರಣಕ್ಕೂ ಭೂಮಿ ಕೊಡಬೇಡಿ

ಬೆಂಗಳೂರಿಗೆ ಹತ್ತಿರ ಇರುವ ಬಿಡದಿ ಭಾಗದ ಲವತ್ತಾದ ಕೃಷಿ ಜಮೀನುಗಳ ಮೇಲೆ ಏಕೆ ನಿಮ್ಮ ಕಣ್ಣು? ಫಲವತ್ತಾದ ಭೂಮಿಯಲ್ಲೇ ಏಕೆ ಟೌನ್​ಶಿಪ್​? ಬಂಜರು ಭೂಮಿಯಲ್ಲಿ ಸ್ಮಾರ್ಟ್​ ಸಿಟಿ ನಿರ್ಮಿಸಿದರೆ ಯಾರೂ ಅಡ್ಡಿ ಪಡಿಸಲ್ಲ ಎಂದ ಆರ್​.ಅಶೋಕ್​, ರೈತರು ಯಾವುದೇ ಕಾರಣಕ್ಕೂ ಜಮೀನು ಬಿಟ್ಟು ಕೊಡಬಾರದು. ಒಂದು ವೇಳೆ ಬಿಟ್ಟರೆ ನಿಮ್ಮದೆ ಭೂಮಿಯಲ್ಲಿ ಮುಂದೆ ನೀವೇ ವಾಚ್​ಮನ್​ ಆಗಬೇಕಾದಿತು ಎಂದು ಎಚ್ಚರಿಕೆ ನೀಡಿದರು.

ಜಮೀನು ಕಬಳಿಸುವ ಹುನ್ನಾರ: ಮಾಜಿ ಉಪಮುಖ್ಯಮಂತ್ರಿ ಡಾ.ಸಿ.ಎನ್​.ಅಶ್ವತ್ಥ ನಾರಾಯಣ್​ ಮಾತನಾಡಿ, ತಾತಮುತ್ತಾತರ ಕಾಲದಿಂದ ಉಳುಮೆ ಮಾಡಿಕೊಂಡು ಬರುತ್ತಿರುವ ಭೂಮಿ ಉಳಿವಿಗಾಗಿ ರೈತರು ಹೋರಾಡುತ್ತಿದ್ದಾರೆ. ಈಗಾಗಲೇ ಭೂಸ್ವಾಧಿನ ವಿರೋಧಿಸಿ ಹಲವು ಹೋರಾಟಗಳು ನಡೆದಿವೆ. ಆದರೂ ಹೋರಾಟಗಾರರ ಕೂಗು ಕೇಳಿಸಿಕೊಳ್ಳುವ ಕಿವಿ, ನೋಡುವ ಕಣ್ಣುಗಳು ಕಾಂಗ್ರೆಸ್​ ಸರ್ಕಾರಕ್ಕೆ ಇಲ್ಲ. ಇದೊಂದು ರೈತ ವಿರೋಧಿ ಸರ್ಕಾರ. ಸ್ಮಾರ್ಟ್​ ಸಿಟಿ ಹೆಸರಿನಲ್ಲಿ ರೈತರಿಂದ ಜಮೀನು ಪಡೆದು ರಿಯಲ್​ ಎಸ್ಟೇಟ್​ನವರಿಗೆ ಮಾರಾಟ ಮಾಡುವ ಯೋಜನೆ ಇದಾಗಿದೆ ಎಂದು ಅಶ್ವತ್ಥನಾರಾಯಣ ಪ್ರತಿಭಟನಾ ನಿರತ ರೈತರಿಗೆ ತಿಳಿಸಿದರು.

ಎಚ್​ಡಿಕೆ ಮೇಲೆ ಗೂಬೆ ಕೂರಿಸುವುದು ಬೇಡ: ಸಂಸದ ಡಾ.ಸಿ.ಎನ್​.ಮಂಜುನಾಥ್​ ಮಾತನಾಡಿ, ಬೆಂಗಳೂರಿನ ಶಿವರಾಮ ಕಾರಂತ ಬಡಾವಣೆ, ಕೆಂಪೇಗೌಡ ಬಡಾವಣೆ ಸೇರಿ ಹಲವು ಬಡಾವಣೆಗಳಲ್ಲೇ ಲಾಂತರ ನಿವೇಶನಗಳು ಮಾರಾಟವಾಗದೆ ಖಾಲಿ ಬಿದ್ದಿವೆ. ಈ ಭೂಸ್ವಾಧಿನ ವಿಚಾರದಲ್ಲಿ ಕುಮಾರಸ್ವಾಮಿ ಅವರ ಮೇಲೆ ಗೂಬೆ ಕೂರಿಸಲಾಗುತ್ತಿದೆ. ಕುಮಾರಸ್ವಾಮಿ ಅವರು ಟೌನ್​ಶ್​ಿ ಮಾಡಲು ಮುಂದಾಗಿದ್ದರಾದರೂ ರೈತರಿಂದ ಮನವಿಗಳು ಬಂದ ಬಳಿಕ ಮುಂದಾಗಲಿಲ್ಲ ಎಂದು ಸ್ಪಷ್ಟ ಪಡಿಸಿದರು.

ವಿಷ ಸೇವಿಸಿ, ಆತ್ಮಹತ್ಯೆಗೆ ಯತ್ನ ಭೂಸ್ವಾಧಿನ ವಿರೋಧಿ ಹೋರಾಟ ಬೆಂಬಲಿಸಿ ಧರಣಿ ಸ್ಥಳಕ್ಕೆ ವಿಪಕ್ಷ ನಾಯಕ ಆರ್​.ಅಶೋಕ್​ ಹಾಗೂ ಬಿಜೆಪಿ ನಾಯಕರು ಆಗಮಿಸಿದಾಗ, ನಮ್ಮ ಭೂಮಿಯನ್ನು ಕಿತ್ತು ಕೊಂಡರೆ ನಮಗೆ ಸಾಯುವ ದಾರಿ ಬಿಟ್ಟು ಬೇರೆ ದಾರಿ ಇಲ್ಲ ಎಂದು ಪ್ರತಿಭಟನಾ ನಿರತ ರೈತರಾದ ಚಿಕ್ಕಬೈರಮಂಗಲದ ನಾಗೇಶ್​ ಕುಮಾರ್​, ರಮ್ಯಾ, ಶಾರದಮ್ಮ ಎಂಬುವವರು ವಿಷಸೇವಿಸಿ ಆತ್ಮಹತ್ಯೆ ಮಾಡಿಕೊಳ್ಳಲು ಮುಂದಾದರು. ಈ ವೇಳೆ ಇತರ ಮಹಿಳೆಯರು ವಿಷದ ಬಾಟಲಿ ಕಿತ್ತುಕೊಂಡರಾದರೂ ಅಷ್ಟರಲ್ಲೇ ನಾಗೇಶ್​ ಕುಮಾರ್​ ವಿಷ ಸೇವಿಸಿಯೇಬಿಟ್ಟರು. ಕೂಡಲೇ ಅವರನ್ನು ಬೈರಮಂಗಲ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗಿದ್ದು, ಸದ್ಯ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ರೈತರು ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದಕ್ಕೆ ಬೇಸರ ವ್ಯಕ್ತ ಪಡಿಸಿದ ವಿಪಕ್ಷ ನಾಯಕ ಅಶೋಕ್​ ಹಾಗೂ ಅಶ್ವತ್ಥ ನಾರಾಯಣ, ಯಾವುದೇ ಕಾರಣಕ್ಕೂ ರೈತರು ಆತ್ಮಹತ್ಯೆಯಂತಹ ದುಡುಕು ನಿರ್ಧಾರ ತಗೆದುಕೊಳ್ಳಬಾರದು. ಸರ್ಕಾರದ ವಿರುದ್ಧ ಹೋರಾಟ ಮಾಡಿ ನ್ಯಾಯ ಪಡೆಯೋಣ ಎಂದು ಆತ್ಮ ಸ್ಥೆರ್ಯ ತುಂಬಿದರು.

ಶೀಟ್​ ಹಾಕಿ ಕೊಳ್ಳಲು ಅನುಮತಿ ಕೊಡಿ

ಬೈರಮಂಗಲದ ಶ್ರೀರಾಮ ಮಂದಿರದ ಮುಂದೆ ಹಮ್ಮಿಕೊಂಡಿದ್ದ ಧರಣಿ ಸ್ಥಳದಲ್ಲಿ ಮಳೆ, ಬಿಸಿಲು ಗಾಳಿಯಿಂದ ರಣೆ ಮಾಡಿಕೊಳ್ಳಲು ಶೀಟ್​ ಹಾಕುವುದಕ್ಕೆ ಪೊಲೀಸರು ಅನುಮತಿ ನೀಡುತ್ತಿಲ್ಲ ಎಂದು ರೈತರು ಆರ್​.ಅಶೋಕ್​ ಗಮನಕ್ಕೆ ತಂದರು. ಈ ವೇಳೆ ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಶ್ರೀನಿವಾಸ್​ ಗೌಡ ಅವರಿಗೆ ಪೋನ್​ ಕರೆ ಮಾಡಿದ ಆರ್​.ಅಶೋಕ್​, ಶೀಟ್​ ಹಾಕಿಕೊಳ್ಳಲು ಏಕೆ ಅನುಮತಿ ನೀಡುತ್ತಿಲ್ಲ ? ನೀವು ಕೂಡಲೇ ಸ್ಥಳಕ್ಕೆ ಬರಬೇಕೆಂದು ಸೂಚಿಸಿದರು. ಪ್ರತಿಭಟನಾ ಸ್ಥಳಕ್ಕೆ ಬಂದ ಎಸ್​ಪಿಯನ್ನು ತರಾಟೆ ತೆಗೆದುಕೊಂಡ ವಿಪಕ್ಷ ನಾಯಕರು, ಇದು ರೈತರ ಶಾಂತಿಯುತ ಹೋರಾಟ. ಹಾಗಾಗಿ ಅವರಿಗೆ ಶೀಟ್​ ಹಾಕಿಕೊಳ್ಳಲು ಅನುಮತಿ ನೀಡಿ ಎಂದು ಸೂಚಿಸಿದರು.