Web Exclusive: ಲಾಕ್​ಡೌನ್​​ನಿಂದ ತಪ್ಪಿತು ಸಂಗೀತದ ತಾಳ; ವಿದ್ಯಾರ್ಥಿಗಳ ಕಾಯುವಿಕೆಗೆಂದು ಕೊನೆ?

| ಎ.ಎನ್. ಪ್ರಸನ್ನ ಚಿಕ್ಕಮಗಳೂರು

ಸಹಪಠ್ಯ ಕ್ರಮದ ಚಟುವಟಿಕೆಗಳಾದ ಸಂಗೀತ, ನೃತ್ಯ, ತಾಳವಾದ್ಯ ಪರೀಕ್ಷೆಗಳು ಲಾಕ್​ಡೌನ್​ನಿಂದ ಮುಂದಕ್ಕೆ ಹೋಗಿದ್ದು, ಜಿಲ್ಲೆಯ 500 ಸೇರಿ ರಾಜ್ಯದ 15 ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಸರ್ಕಾರದ ಹಸಿರು ನಿಶಾನೆಗಾಗಿ ಕಾತರರಾಗಿದ್ದಾರೆ.

ಮೇನಲ್ಲಿ ನಡೆಯಬೇಕಿದ್ದ ಪರೀಕ್ಷೆ ಲಾಕ್​ಡೌನ್​ನಿಂದ ಮುಂದೂಡಿದ್ದರಿಂದ ಶಿಕ್ಷಕರು ನೃತ್ಯದ ಅಭ್ಯಾಸ ನಿಲ್ಲಿಸಿದ್ದಾರೆ. ಕೆಲವು ವಿದ್ಯಾರ್ಥಿಗಳು ಮನೆಗಳಲ್ಲಿ ಅಭ್ಯಾಸ ಮುಂದುವರಿಸಿದ್ದರೆ ಹಲವರು ಕೈಚೆಲ್ಲಿ ಒಂದು ವರ್ಷ ಮುಂದೆ ಹೋಗುತ್ತದೇನೊ ಎನ್ನುವ ಗೊಂದಲದಲ್ಲಿದ್ದಾರೆ.

ಪ್ರತಿ ವರ್ಷ ಶೈಕ್ಷಣಿಕ ವರ್ಷಾಂತ್ಯ ಮೇ ಅಥವಾ ಜೂನ್​ನಲ್ಲಿ ಪ್ರೌಢಶಿಕ್ಷಣ ಪರೀಕ್ಷಾ ಮಂಡಳಿ ಪರೀಕ್ಷೆ ನಡೆಸುತ್ತಿದ್ದು ಈ ಸಮಯದಲ್ಲಿ ಕರೊನಾ ಲಾಕ್​ಡೌನ್ ಘೊಷಣೆಯಾದ ಕಾರಣ ಮುಂದೂಡಲಾಗಿದೆ. ಅನ್​ಲಾಕ್ ಘೊಷಣೆ ನಂತರ ಎಸ್​ಎಸ್​ಎಲ್​ಸಿ, ದ್ವಿತೀಯ ಪಿಯುಸಿ ಪರೀಕ್ಷೆಗಳನ್ನು ಸರ್ಕಾರ ಯಶಸ್ವಿಯಾಗಿ ನಡೆಸಿ ಪೂರಕ ಪರೀಕ್ಷೆಯೂ ಮುಗಿಯುವ ಹಂತ ತಲುಪಿದೆ. ಆದರೆ ಸಂಗೀತ, ನೃತ್ಯ ಪರೀಕ್ಷೆಗಳನ್ನು ಇನ್ನೂ ನಿಗಿದಪಡಿಸಿಲ್ಲ.

ಕಲಾವಿದರಾಗಿ ರೂಪುಗೊಳ್ಳುವ ಸಲುವಾಗಿ ವಿದ್ಯಾರ್ಥಿ ಜೀವನದಲ್ಲೇ ಮಕ್ಕಳು ಕಲೆ, ಕ್ರೀಡೆ, ಸಂಗೀತ, ಸಾಹಿತ್ಯ, ನೃತ್ಯ, ತಾಳವಾದ್ಯದಂತಹ ಸಹಪಠ್ಯ ಚಟುವಟಿಕೆಯತ್ತ ಹೆಜ್ಜೆ ಹಾಕಿರುತ್ತಾರೆ. ಕೆಲವರು ಇದನ್ನೇ ವೃತ್ತಿಯಾಗಿಸಿಕೊಂಡು ಜೀವನ ನಿರ್ವಹಣೆ ಮಾಡುವ ಕನಸು ಕಂಡಿರುತ್ತಾರೆ. ಹಲವು ವಿದ್ಯಾರ್ಥಿಗಳು ಜ್ಯೂನಿಯರ್, ಸೀನಿಯರ್ ಮತ್ತು ವಿದ್ವತ್ ಪರೀಕ್ಷೆಯನ್ನು ತೆಗೆದುಕೊಂಡಿದ್ದು ಅದಕ್ಕಾಗಿ ವರ್ಷಾನುಗಟ್ಟಲೆ ಶ್ರಮಪಟ್ಟು ಅಭ್ಯಾಸ ಮಾಡಿ ತಯಾರಾಗಿದ್ದಾರೆ. ಇದನ್ನೂ ಓದಿ: Web Exclusive: ಅಪೌಷ್ಟಿಕತೆ ಮರಣ ಪ್ರಮಾಣ ತಗ್ಗಿಸಲು ‘ಮೀನು’ ಪ್ರಯೋಗ

10ನೇ ವರ್ಷದ ನಂತರ ಈ ಪರೀಕ್ಷೆಗಳಿಗೆ ಅರ್ಹತೆ ಪಡೆದು ಶೈಕ್ಷಣಿಕ ಪಠ್ಯಕ್ರಮದ ಜತೆ ಹಂತ ಹಂತವಾಗಿ ಪೂರ್ಣಗೊಳಿಸಿಕೊಂಡು ಉನ್ನತ ಶಿಕ್ಷಣಕ್ಕೂ ಮುನ್ನ ವಿದ್ವತ್ ಪಡೆಯಲು ಗುರಿ ಹೊಂದಿರುತ್ತಾರೆ. ಈ ಸಂದರ್ಭದಲ್ಲಿ ಪರೀಕ್ಷೆ ವಿಳಂಬದಿಂದ ಮಕ್ಕಳ ಗುರಿಸಾಧನೆಗೆ ತೊಡಕಾಗುತ್ತಿದೆ. ಪರೀಕ್ಷೆ ನಡೆಸುವ ಹೊಣೆ ಹೊತ್ತಿರುವ ಪ್ರೌಢಶಿಕ್ಷಣ ಇಲಾಖೆ ಇತರೆ ಪರೀಕ್ಷಾ ವಿಭಾಗದಿಂದ ಶಾಲೆಗಳು ತೆರೆಯುವ ಮುನ್ನಾ ಪರೀಕ್ಷೆ ನಡೆಸಿದರೆ ಮಕ್ಕಳಿಗೆ ಅನುಕೂಲವಾಗುತ್ತದೆ ಎಂಬುದು ಸಂಗೀತ, ನೃತ್ಯ ಶಿಕ್ಷಕರ ಅಭಿಪ್ರಾಯ.

ಫೆಬ್ರವರಿ, ಮಾರ್ಚ್​ವರೆಗೂ ತರಬೇತಿ ನೀಡಿ ಪರೀಕ್ಷೆಗಾಗಿ ವಿದ್ಯಾರ್ಥಿಗಳನ್ನು ತಯಾರಿ ಮಾಡಲಾಗಿತ್ತು. ಶಾಲಾ-ಕಾಲೇಜುಗಳಲ್ಲಿ ಈಗಾಗಲೆ ಆನ್​ಲೈನ್ ಪಾಠ ಪ್ರವಚನಗಳು ಆರಂಭವಾಗಿರುವುದರಿಂದ ಈ ಪರೀಕ್ಷೆ ತೆಗೆದುಕೊಂಡಿರುವ ಮಕ್ಕಳಿಗೆ ಇತ್ತ ಓದಿನ ಕಡೆಯೂ ಮನಸ್ಸು ಸಂಪೂರ್ಣವಾಗಿ ಸೆಳೆಯದೆ ಗೊಂದಲದಲ್ಲಿ ಸಿಲುಕಿದ್ದಾರೆ. ಶೀಘ್ರದಲ್ಲಿ ಪರೀಕ್ಷೆ ದಿನಾಂಕ ಪ್ರಕಟಿಸಿದರೆ ವಿದ್ಯಾರ್ಥಿಗಳ ಭವಿಷ್ಯಕ್ಕೆ ಅನುಕೂಲವಾಗುತ್ತದೆ ಎಂದು ಕರ್ನಾಟಕ ಶಾಸ್ತ್ರೀಯ ನೃತ್ಯ ಕಲಾವಿದರ ಒಕ್ಕೂಟ ಸಚಿವ ಸುರೇಶ್​ಕುಮಾರ್ ಅವರಿಗೂ ಮನವಿ ಮಾಡಿದ್ದಾರೆ.  ಇದನ್ನೂ ಓದಿ: Web Exclusive: ಬಂಜರು ಭೂಮಿಗೆ ನ್ಯಾಯ ನೀಡಿದ ವಕೀಲ; ಬಂಗಾರದ ಬೆಳೆ ತೆಗೆದ ಸಾಧಕ

ಅಕ್ಟೋಬರ್​ನಲ್ಲೇ ಪರೀಕ್ಷೆ ಸೂಕ್ತ

ಸಾಮಾನ್ಯವಾಗಿ ಸಂಗೀತ ಪರೀಕ್ಷೆ 15 ದಿನಗಳ ಕಾಲ ನಡೆಯುತ್ತದೆ. ಈಗ ವಿದ್ಯಾರ್ಥಿಗಳನ್ನು ಪರೀಕ್ಷೆಗೆ ತಯಾರು ಮಾಡಲು ತರಬೇತಿಗೆ ಒಂದು ತಿಂಗಳಾದರೂ ಬೇಕು. ಹೀಗಾಗಿ ಅಕ್ಟೋಬರ್​ನಲ್ಲೇ ಪರೀಕ್ಷೆ ದಿನಾಂಕ ಪ್ರಕಟಗೊಳಿಸಿ ತರಬೇತಿ ತರಗತಿಗೆ ಅವಕಾಶ ಕಲ್ಪಿಸಿ ಪರೀಕ್ಷೆ ನಡೆಸಿದರೆ ತರಬೇತಿಗೂ ಕೊಂಚ ಒಳಿತಾಗಲಿದೆ. ಒಂದು ವರ್ಷ ವ್ಯಯವಾಗುವುದೂ ತಪ್ಪಿ ವಿದ್ಯಾರ್ಥಿಗಳ ಭವಿಷ್ಯದ ಶಿಕ್ಷಣಕ್ಕೆ ಹೆಚ್ಚು ಅನುಕೂಲವಾಗಲಿದೆ ಎಂಬುದು ಶಿಕ್ಷಕರು ಹಾಗೂ ಪರೀಕ್ಷಾರ್ಥಿಗಳ ಅಭಿಪ್ರಾಯ. ಅರ್ಜಿ ಸಲ್ಲಿಸದ ವಿದ್ಯಾರ್ಥಿಗಳಿಗೆ ಅವಕಾಶ ಸಿಕ್ಕರೆ ಅನುಕೂಲ ಎಂಬುದು ಇನ್ನೂ ಕೆಲವರ ವಾದ.

https://www.vijayavani.net/dm-chandrashekhar-judge-birth-anniversary/