ಕಾರವಾರ: ಅಂಕೋಲಾ ತಾಲೂಕಿನ ಡೋಂಗ್ರಿ ಗ್ರಾಪಂ ವ್ಯಾಪ್ತಿಯ ಹಳವಳ್ಳಿ ಗ್ರಾಮದ ಹಸೇಹಳ್ಳಕ್ಕೆ ಕೃಷಿ ಹಾಗೂ ಕುಡಿಯುವ ನೀರಿನ ಉದ್ದೇಶಗಳಿಗೆ ಅಳವಡಿಸಿದ್ದ 350 ಕ್ಕೂ ಪಂಪ್ಸೆಟ್ಗಳಿಗೆ ವಿದ್ಯುತ್ ಕಡಿತ ಮಾಡಲಾಗಿದ್ದು, ಗ್ರಾಮಸ್ಥರು ಅದಕ್ಕೆ ತೀವ್ರ ವಿರೋಧ ವ್ಯಕ್ತಪಡಿಸಿದರು.
ಕಾರವಾರ ಜಿಲ್ಲಾಧಿಕಾರಿ ಕಚೇರಿಗೆ ಆಗಮಿಸಿದ 100 ಅಧಿಕ ಗ್ರಾಮಸ್ಥರು, ನಾವು ತಲೆ, ತಲಾಂತರಗಳಿಮದ ತೋಟ ಮಾಡಿಕೊಂಡು ಬಂದಿದ್ದು, ಅದಕ್ಕೆ ಹಳ್ಳದ ನೀರೇ ಆಧಾರ ಈಗ ಬೇಸಿಗೆಯ ಅವಧಿಯಲ್ಲಿ ನೀರು ಕಡಿತ ಮಾಡಿರುವುದರಿಂದ ಹತ್ತಾರು ವರ್ಷಗಳಿಂದ ಬೆಳೆಸಿದ ತೋಟಗಳಿಗೆ ಹಾನಿಯಾಗಲಿದೆ. ಮಾನವೀಯತೆಯಿಂದ ಪಂಪ್ಸೆಟ್ಗೆ ವಿದ್ಯುತ್ ಸಂಪರ್ಕ ಒದಗಿಸಬೇಕು ಎಂದು ಗ್ರಾಮಸ್ಥರು ಜಿಲ್ಲಾಧಿಕಾರಿ ಗಂಗೂಬಾಯಿ ಮಾನಕರ್ ಅವರಿಗೆ ಮನವಿ ಮಾಡಿದರು.
ನಂತರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಹಸೇಹಳ್ಳ ನೀರು ಬಳಕೆದಾರರ ಸಂಘದ ಅಧ್ಯಕ್ಷ ಸದಾನಂದ ಭಟ್, ಹಳವಳ್ಳಿ,ಮಳಗಾಂವ, ನುಗ್ಗನಮನೆ, ಸಾಕನಮನೆ, ಕಮ್ಮಾಣಿ ಭಾಗದಲ್ಲಿ ತಲೆ, ತಲಾಂತರಗಳಿಂದ ನಾವು ಜೀವನ ಮಾಡಿಕೊಂಡು ಬಂದವರು. ಕೊಡಸಳ್ಳಿ ಅಣೆಕಟ್ಟೆಯಿಂದ ನಿರಾಶ್ರಿತರಾಗಿ ನಮ್ಮೂರಿಗೆ ಹಲವು ಕುಟುಂಬಗಳು ಬಂದಾಗ ನಾವು ಸ್ವಾಗತ ಮಾಡಿ, ಅವರಿಗೂ ವ್ಯವಸ್ಥೆ ಮಾಡಿಕೊಟ್ಟಿದ್ದೆವು. ಮೂಲ ನಿವಾಸಿಗಳು ಹಾಗೂ ನಿರಾಶ್ರಿತರು ಎಂಬ ಬೇಧವಿಲ್ಲದೇ ಎಲ್ಲರೂ ಒಟ್ಟಾಗಿ ಜೀವನ ನಡೆಸುತ್ತಿದ್ದೇವೆ. 350 ಕುಟುಂಬಗಳು ಇಲ್ಲಿ ಕೃಷಿ ಮಾಡಿಕೊಂಡು ಜೀವನ ನಡೆಸಿವೆ. ಇದೇ ಹೊಳೆ ಹಾಗೂ ನದಿಯಿಂದ 1 ಸಾವಿರ ಎಕರೆ ಪ್ರದೇಶಕ್ಕೆ ನೀರುಣಿಸಿ ಕೃಷಿ ಮಾಡುತ್ತಿದ್ದೇವೆ. ಶಾಲೆ, ದೇವಸ್ಥಾನಗಳಿಗೆ ನೀರುಣಿಸುತ್ತಿದ್ದೇವೆ. ಕುಡಿಯಲು, ಜಾನುವಾರುಗಳಿಗೆ ಬಳಕೆ ಮಾಡುತ್ತಿದ್ದೇವೆ. ಆದರೆ, ವಿದ್ಯುತ್ ಕಡಿತ ಮಾಡಿದ್ದರಿಂದ ಎಲ್ಲವನ್ನೂ ಕಡಿತ ಮಾಡಲಾಗಿದೆ ಎಂದು ವಿವರಿಸಿದರು.
